1 Gumlox Siyiex hoek ka aux ah nin, 2 Kawn pui eue, kieh veng Yerusaliem tawng ka krax pa seeing brai cao nawh khankix, 3 ah nin, Siyiex ah yuh nin ka veng Yerusaliem, dee kaoh dee keh maix mawh khaing daux haktiex Khanan, keeing maix mawh ceu pui Amon mai miex maix mawh ceu pui Hitix heue. 4 “Phan mawh grawng pa keh kung maix, yam hoik keh maix, kix ang pat ka maox sitaing maix mai ang heem ka rawm, sonsang singax mai ang kraix kih mai ang pua maix ka leem heue.” 5 Ang koe ngai tix mu kawx pa sang caux rhawm ka maix sonsang koe krax moh ti yuh tix ceuceu ka maix, viang mawh nan maix hoik mawh pa tik tix ka daux kaung, mawh kheu hoik seeing cao maix ka daux singaix keh tix heue. 6 Yam preeng Aux tix hu dex maix mai yaox ka lu lieh maix tix ka daux nham tix, Aux ah nin ka maix yam kawn ot maix ka daux nham, ‘Im ju, 7 mai Aux hoik kieh maix kuah ting lhaong awm khaox tix pang ka daux tiag.’ Mai maix hoik ting lhaong mai lih mawh pa kied mhawm grang heue. Teeih maix kawx hoik lih ti koe pakpeung mai hauk maix hoik lang heue. Viang mawh nan maix hoik ot ka kaong heue. 8 Yam baox preeng Aux ti hu dex maix mai Aux jhak ka maix jhak heue, yam hoik hoek bawg yam pa tawng maix tix koe krax moh, mawh kheu nan, Aux hoik naih toh kraung ceep tix ka piang maix mai kheem tokaux ka kaong maix ka, Aux hoik tiextu ti ah nin ka maix mai hoik yuh lox mukheu tau mai maix mai maix hoik lih ti mawh cie Aux,” Siyiex ah nan heue. 9 “Khaix an Aux hoik heem maix ka rawm mai Aux hoik sigrhah maix khaing nham pa kawb ka maix mai Aux hoik kraix rawm bee ka maix heue.” 10 “Aux hoik tawx maix ceep kraung pa hoik jawg ti caing ka man mhawm kuceu mai hoik tawx maix ceep kiiep hak Tahasha, Aux hoik kieh maix ceep man rhi ceu pa mhawm mai hoik lhop maix ka man luat heue.” 11 “Aux hoik jawg maix ka kraung pa ceep pa mawh ble ka taix maix mai maox soi ka ngawg maix heue. 12 Aux sau krim siang simaox pa laoh lie ka meeh maix mai krim ka yhaok maix mai ceep mhok pa mhawm grang ka piang kaing maix heue. 13 “Awm an maix hoik jawg tix ka khri ka mau mai kraung ceep man rhi pa mhawm mai luat, pa hoik jawg ti caing ka man mhawm kuceu, maix yaox ti ih blah phawng nghox ca ceu pa mhawm, rawm hia mai rawm bee khankix heue. Maix hoik kied mhawm grang ti yaox mai hoik pon tix mawh moeng simiang, pa ot ka daux nyiex haw heue.” 14 “Krax pa ao min maix hoik tah hu ka daux haktiex, kheu jao pa kied mhawm grang maix mai an hoik mawh min pa grum naog pa hoik ap Aux ka maix heue,” Siyiex ah yuh nan heue.

15 Viang mawh nan maix hoik een rhawm tix ka pa mhawm grang tix mai hoik yuh bun coh kaux kheu jao pa ao min tix mai hoik tawx krax pa lud vao ka piang pui pa lailing baoh an, ku kaux, pa koe rhawm tix lud vao ka heue. 16 “Maix hoik teei kraung ceep maix tiblah mai jawg tix ka kraung pa mhawm grang kuceu dee lhaong mai yuh bun coh kaux ka dee an, ceu pa ang khaw tix lih koe mai pa ang caw tix koe heue.” 17 “Baox teei siang simaox pa mhawm khri mai mau pa hoik tawx Aux ka maix mai yuh ti cie riang grang simex ka son tokaux tix mai hoik lud vao tau mai an kix heue.” 18 “Maix teei kraung pa hoik caing maix ti deuh kuceu mai hoik lhop riang grang ankix mai maix deuh rawm bee mai nyawng bhawng Aux ka plak sivoe riang grang ankix heue.” 19 “Can pa ih pa hoik tawx Aux ka maix, pa mawh blah phawng nghox ca pa mhawm, rawm bee mai rawm hia pa hoik tawx Aux maix ih maix hoik deuh nawh sivoe riang grang sonsang sioe bhawng ka heue,” Siyiex ah nan heue. 20 “Lheu khaing an maix baox teei kawn simex kawn bun tix, pa hoik keh maix ka son Aux mai maix hoik appong tix tan ka riang grang an, sonsang mawh pa laux leeing heue. Krax lud vao ceu pa yuh maix mawh grawng ceu pa iak tix ceu lie? 21 Maix hoik pah kawn praix aux yum mai ap tix tawx kix ka riang grang sonsang tan, ka daux ngu lie? 22 Ka daux ceu pa yuh maix ceu pa seeing brai mai pa lud vao khankix maix ang lai doh keud ka baux singaix awn ju tix, yam ang maix ceep kraung mai ot ka kaong ka daux pa lu lieh tix daux nham cao tix heue.” 23 Khaix hoik yuh maix krax pa caox caig, kieh krax pa kha rhawm mai krax pa kied kha rhawm koe ka piang maix, Siyiex ah nan heue. 24 Maix baox sum nyiex moeg tix lhang son tix mai hoik yuh dee pa lhaong ka son tix, ka krax ku dah heue. 25 “Maix hoik sum dee pa lhaong ka piang kaing krax ting ku krax mai kieh pa mhawm grang tix mawh pa seeing brai maix hoik di ba viang tix ka pui ku kaux pa lailing hawt baoh tan mai baox nie lheu yuh kaing pa lud vao tom nie heue.” 26 “Maix baox lud vao mai pui Ejiptux, pa mawh paox plawg maix pa kied seeing mai baox nie yuh kaing pa lud vao sonsang so aux koe krax pa song rhawm ka heue.” 27 “Mawh kheu nan jhak heue, Aux nyeu taix tix ka piang maix mai hoik tat ti tik pa ih maix, maix hoik ap tix tawx maix ka pui pa koeng ka maix, pa mawh kawn bun ceu pui Philitix pa hoik koe krax nie seeing ka maix heue.” 28 “Maix baox lud vao tau mai pui Asurix, kheu ang maix chix koe krax pa fah rhawm. Maix hoik yuh bun tau mai kix mai ang nyang bax koe krax pa fah rhawm ka heue.” 29 “Lheu khaing an maix baox nie yuh kaing pa lud vao an khankix, tom hoek haktiex pui pa yuh lai yuh geu ka daux haktiex Khaladie mai khaix hoik yuh maix ceu an maix ang nyang koe krax pa fah rhawm ka heue. 30 Rhawm maix hoik mawh pa kied caox caig miex ding, yam yaox Aux pa yuh maix ceu in khawmuik, pa mawh kaing yuh bun coh kaux pa laux min heue.”

31 Maix hoik sum ti deuh nyiex moeg ka piang kaing krax ku krax mai hoik sum dee pa lhaong ka piang krax ku krax heue. Viang mawh nan maix ang tie awm bun coh kaux, kheu ang maix tie mhaing ngawh tix heue. 32 “Maix awm moeng pa hoik lud vao mai nyo sinie tang kaux son tang mex tix heue.” 33 “Simex khankix tawx totaix ka bun coh kaux, viang mawh nan maix hoik tawx totaix ka paox moh tix mai hoik vai kix pa ot hawt baoh vung viang ti hoek, sonsang lud vao mai tix heue. 34 Maix mawh pa tang siyox khaing bun tang kaux khankix, ka daux kaing pa lud vao yuh tix, mawh kheu pui tix kaux kawx ang nyaw glaw maix yuh bun coh kaux mai maix deeh tawx ngawh riang ka daux pa ang pui sax tawx awm maix mawh kheu nan maix mawh pa tang siyox heue.”

35 Mawh kheu bun coh kaux eue, nghiet ka gumlox pa kaoh khaing Siyiex, 36 Siyiex ah nin, “Mawh kheu hoik plak maix krax pa kaig pa tua tix lih mai pa ot ka kaong sidawng, ka daux pa lud vao tix mai paox moh tix khankix mai lud tau mai riang grang krub can pa seeing brai mai mawh kheu tan maix nham kawn praix tix ka an khankix, 37 Jhak heue, Aux tak khrawm paox moh maix khawmuik mai pui pa yuh maix krax nyawm rhawm rhi tix tau mai can pui pa moh ka maix mai khawm pui pa koeng ka maix khankix mai Aux tak khrawm kix hoek khaing ku plak sonsang hoek yuh maix laux leeing mai tak sang jhi krax pa ka kaong maix ka kix, sonsang yaox kix ka pa ot ka kaong maix heue. 38 Aux tak prawng ca ka maix awm prawng ca tix ka bun pa lud vao mai pa hoik kieh nham pui jauh khankix, Aux tak viex nham phimap an hoek ka piang maix, ka daux pa kied song rhawm rhi mai ka daux pa bak pa viang heue. 39 Aux tak ap maix ka daux tawm taix paox moh maix mai kix tak yuh nyiex moeg maix laux mai yieh dee pa lhaong maix laux leeing, kix tak peeik kraung ceep maix mai rhim ti teei kraung mhawm maix mai prah maix ot ka kaong heue. 40 Kix tak viex cub pui hun hoek puing ka maix mai kix tak dheem maix ka simaox mai mug maix lih mawh baux mawx baux an ka vaig kix heue. 41 Kix tak gleeing nyiex maix ka ngu mai ciyang ka piang maix ka plak sivoe ngai bun tom nie mai Aux tak kieh maix naox yoi khaing kaing yuh bun coh kaux mai maix tak ang lai yaox tix vai paox moh tix khaix in heue. 42 Aux tak kieh pa song rhawm tix vai ka piang maix mai kieh pa bak pa viang tix lih hu khaing maix, Aux tak koe pa nhim mai ang lai koe pa song rhawm tix bawg kawx heue. 43 Mawh kheu ang maix lai doh keud ka singaix yam awn ju tix mai hoik yuh Aux song rhawm ka ceu in, Aux tak sang viied ngawh kaing yuh maix ka piang kaing maix, yuh ka mawx maix lai baox hawt ti yuh pa caox caig mai baox gawp ka piang pa seeing brai lie? Siyiex ah yuh nan heue.

44 “Pui pa chix krai lox kab khankix, tak sang shiao lox kab ka grawng maix, ‘Awm miex, awm kawn bun.’ 45 Maix mawh kawn bun khaing cub pa seeing ka mex mai kawn tix mai maix mawh puxo khaing bun pa seeing ka mex mai kawn tix. Miex maix mawh ceu pui Hitix mai keeing maix mawh ceu pui Amon heue.” 46 “Puxke bun maix mawh veng Samarix, pa ot tau mai kawn bun tix, ka plak laong mai pux bun maix, mawh veng Sawdom pa ot plak seh tau mai kawn bun tix heue.” 47 “Maix ang lawng hu ka daux krax hu kix maix ang yuh pa seeing brai awm kix maix hoik deuh grawng ankix, awm pa iak pa liied mai hoik nie lheu kin yuh pa caox caig khaing kix kuceu heue.” 48 Siyiex ah nin, “Awm im ju Aux, pux bun maix veng Sawdom mai kawn bun maix ang lai hawt yuh awm pa hoik yuh maix mai kawn bun maix khankix heue.” 49 “Jhak heue, in mawh phimap yuh pux bun maix veng Sawdom, nawh mai kawn bun nawh hoik ting rhawm ting rhi, ka daux pa kub ih kub un tix mai ka daux pa kied nyawm rhawm tix mai ang sax teem ka can pa lo pui hot sibhawm heue.” 50 Kix ting rhawm ting rhi mai yuh pa seeing brai ka plak sivoe Aux, mawh kheu nan, yam yaox Aux ceu pa yuh kix an, Aux hoik yuh kix laux leeing heue. 51 “Veng Samarix ang nyang yuh krax lud awm pa hoik yuh maix been tix plak; maix hoik nie lheu yuh pa seeing brai khaing kiex mai hoik kieh puxke bun mai pux bun tix awm pui rahsee, kheu pa seeing brai pa yuh maix heue. 52 Maix hoik deuh phimap mai prawng ca ka puxke bun mai pux bun tix, kieh maix laux min ka, mawh kheu phimap pa yuh maix kied nie lheu mawh ceu pa seeing brai khaing kiex, kiex nie lheu rahsee khaing maix heue. Mawh kheu nan, kieh maix kaig ka mai kieh maix kham geu pa laux min, mawh kheu hoik kieh maix puxke bun tix mawh pa rahsee heue. 53 Yam deeh viex Aux pui pa giex laung pa mawh pui Sawdom mai kawn bun nawh khankix mai pui Samarix mai kawn bun nawh khankix deeh ing, Aux tak sang viex pui pa giex laung maix deeh hoek tau mai kix, 54 “maix tak laux min mai hoek krax kaig tua kheu jao pa yuh tix, mawh kheu hoik kieh maix kix koe krax nyawm rhawm rhi heue.” 55 “Yam deeh ing pux bun maix, pa mawh Sawdom mai kawn bun nawh khankix, ka haktiex dee ot kix glang ka in mai yam deeh ing Samarix mai kawn bun nawh khankix ka haktiex dee ot kix glang ka in maix mai kawn bun maix khankix, tak yaox tix deeh ing ka haktiex dee ot tix glang ka in heue.” 56 Ang hoik mawh jheeh maix pa salao ka pux bun maix Sawdom ka daux singaix pa ting rhawm tix ang mawh lie? 57 Sivoe ang krax pa caox caig yuh maix nyang sidawng, yam in maix hoik lih tix awm Sawdom, pa yaox ti kham ka pa salao kawn bun Edom mai rawb biang maix mai kawn bun Philitix khankix mai pa nu nai pui pa ot rawb rim maix ka maix heue. 58 Maix tak yaox ti kham geu krax ciyang mai krax pa seeing brai pa yuh tix, Siyiex ah nan heue. 59 “Siyiex ah nin, Aux tak yuh ka maix, awm ceu pa hoik yuh maix, pa nu nai maix ka lox pa hoik tiextu tix mai yieh laux ka gumlox sijax mukheu heue.”

60 Viang mawh nan, Aux tak doh keud ka sijax mukheu pa hoik yuh tix tau mai maix baux singaix yam awn ju maix mai Aux tak yuh sijax mukheu leeing ju tau mai maix heue. 61 Khaix an maix tak doh keud ka pa yuh tix mai tak kaig tua ka, yam rieb maix ka puxke bun tix mai pux bun tix mai tawx kix sonsang mawh kawn bun maix, viang mawh nan, an ang lai mawh jao sijax mukheu pa yuh Aux tau mai maix heue. 62 Aux tak yuh sijax mukheu tix tau mai maix mai maix tak tawng ka mawh Aux Siyiex. 63 Aux tak pluat ploi ka can pa lud pa hoik yuh maix khankix, viang mawh nan, yam doh keud maix ka phimap an mai maix tak kaig tua tom ang tix lai pon ang jheeh tix, Siyiex ah nin heue.