1 Khaix an gumlox Siyiex hoek ka aux ah nin, 2 “Kawn pui eue, Nhu plix siiet sang nie lheu mhawm khaing khaox tang ceu yuh ka mawx? Kak plix siiet pa koe daux sinax tiag khaox daux nong sang nie lheu khaing kak khaox an yuh ka mawx? 3 Mawx teei nhu plix siiet an sonsang yuh ti kraung tix ceuceu lie? Phan ang mawh nan, mawx sang pon yuh pui kuk feuk kraung tix ceuceu ka an lie? 4 “Jhak heue, nawh yuh mawh khix taung daux ngu mai toh khawm ra plak proe ka ngu daux sigreung nawh lih ti mawh swah, an sang koe bwanson ceu patix lie?” 5 “Yam kawn grum mhawm an, phan ang chix ti shiao, khaix hoik gleeing lih ti mawh swah, sang nie baox koe bwan son yuh ka mawx, mawh kawn sang chix shiao tix ka an lie?” 6 Mawh kheu nan Siyiex ah nin, awm mawh nhu plix siiet pa ot daux sinax khaox daux nong, pa hoik tawx Aux, mawh khix taung son ngu, mawh kheu Aux tak ap ti tawx pui pa ot ka daux veng Yerusaliem khankix awm an heue. 7 Aux tak jeung ngai tix sonsang ciyang ka kix, viang glawd khaing pum ngu kawx mai pum ngu tak gleeing ka kix, khaix an, pex tak tawng mawh Aux Siyiex, yam jeung Aux ngai tix ciyang kix heue. 8 Mawh kheu nan, Aux tak sang kieh haktiex mawh dee yiien, kheu jao ang kix kaux sijax, Siyiex ah nan heue.