1 Kuad song ceu pui Isarelax tiblah hoek bleeh ka aux mai ngawm ka plak sivoe aux heue. 2 Gumlox Siyiex hoek bleeh ka aux ah nin, 3 “Kawn pui eue, pui inkix hoik pang ti deuh riang grang pa krub tix ka daux rhawm rhi kix mai hoik deuh pa sang sideeing pa kieh lud ka plak sivoe kix heue. Mawh sang kieh Aux tokaux tix kham ka pa chawk cheng kix khawmuik lie?” 4 Mawh kheu nan, krai ka kix ah nin, Siyiex ah nin, “Khaing daux nyiex ma ceu pui Isarelax khankix tix kaux kaux pa yuh ti deuh riang grang krub ka daux rhawm rhi tix mai deuh pa sideeing kieh lud ka plak sivoe nawh mai hoek bleeh ka cao jhai, Aux tak deeh pawk ka nawh ah nin, awm pa koe riang grang pa krub nawh khankix, 5 sonsang pon aux ti giex awm pa koe rhawm rhi nyiex ma ceu pui Isarelax. Mawh kheu kix mawh pa hoik singai hu khaing Aux, kheu jao grawng riang grang krub kix heue.” 6 Mawh kheu nan krai ka ceu pui Isarelax, Siyiex ah nin, “Koe krax pa deeh doh keud ka phimap tix! Deeh veeh tix luan khaing riang grang krub pex mai deeh veeh ngai tix luan khaing pa seeing brai khawmuik heue.” 7 “Mawh kheu khaing daux nyiex ma ceu pui Isarelax tix kaux ang ah, khaing nyo sinie pa hoek ti peung ka daux haktiex Isarelax tix kaux kaux ang ah, pa hoik gwieh ti hu khaing Aux mai pang ti deuh riang grang krub ka daux rhawm rhi tix mai pa deuh ceu pa sang sideeing kieh lud plak sivoe nawh mai hoek bleeh ka cao jhai, sonsang chawk cheng ka grawng Aux, Aux pa mawh Siyiex tak deeh pawk krai ka nawh, khaing tokaux cao tix heue.” 8 “Aux jeung ngai tix ka pui an mai yuh nawh mawh mhai ruk mai lox been yie krai pui mai Aux tak tat ti tik nawh khaing sinax ceu pui Aux mai pex tak tawng mawh Aux Siyiex heue.” 9 “Phan cao jhai an krai lox pie lhien, Aux, Siyiex tak pie lhen ka cao jhai an mai Aux tak nyeu taix tix ciyang ka nawh mai yuh nawh laux leeing khaing sinax ceu pui Aux Isarelax heue. 10 “Kix tak kham geu phimap cao tix, krax kham geu cao jhai mai krax kham geu pui pa chawk cheng tak awm paox tix heue.” 11 Son ang nyiex ma ceu pui Isarelax lai tang tiah khaing Aux mai son ang lai baox yuh tokaux tix seeing khaix in tix bawg kawx tau mai krax lud tix, viang mawh nan, kix tak sang pon ti mawh pui Aux mai Aux tak mawh Siyiex kix, “Siyiex ah nan heue.”

12 Gumlox Siyiex hoek bleeh ka aux ah nin, 13 “Kawn pui eue, yam lud haktiex ka piang Aux mai hawt yuh kaing pa ang kaux sijax mai Aux tak nyeu taix ti yuh haktiex mai tat ti tik priex preem mai ploi sibhawm praix hoek ka piang haktiex mai yuh kawn pui laux mai to brie totiag khaing haktiex heue.” 14 Viang pui inkix loe kaux, pa mawh Noax, Danyelax mai Yawbax ot ka daux haktiex in, kix tak taoh kaux cao tix nong nong, ka pa rahsee kix, Siyiex ah nan. 15 “Phan Aux kieh totiag pa vao lailing ka daux haktiex an mai yuh laux kieh dee an yi mai mawh dee yiien mai mawh dee ang pui lai pon lailing ka kheu jao totiag khankix, 16 “Viang pui ankix loe kaux ot ka daux haktiex an, awm pa im ju Aux, kix tak ang lai pon taoh kawn simex kawn bun tix, mawh ngie tokaux kix nong nong pa pon boek khaing, haktiex an tak mawh dee pa yiien,” Siyiex ah nan heue. 17 Phan ang mawh nan, phan Aux viex vaig hoek ka piang haktiex an ah nin, “Vaig eue, hu tiag haktiex an, mug ti tik pui mai totiag khaing ka daux haktiex an; 18 Viang pui inkix loe kaux ka daux haktiex an awm im ju Aux, kix tak ang lai pon taoh kawn simex kawn bun tix khankix, mawh ngie tokaux kix nong nong pa pon boek khaing heue. Siyiex ah nan heue.” 19 Phan ang mawh nan, phan Aux ploi jhawm saux preng hoek ka daux haktiex an mai klup krax pa song rhawm tix ka piang haktiex an ka nham mai mug ti tik pui mai totiag khaing daux haktiex an, 20 viang pui inkix loe kaux pa mawh Noax, Danyelax mai Yawbax ot ka daux haktiex in, awm im ju Aux, kix tak ang lai deeh pon taoh kawn simex kawn bun tix, mawh ngie tokaux kix nong nong pa pon boek khaing, kheu pa rahsee kix, Siyiex ah nan heue. 21 Mawh kheu Siyiex ah nin, “Aux tak sang baox ploi krax ciyang pa kin pon ceu hoek ka piang veng Yerusaliem, pa mawh lawm vaig mai sibhawm praix, totiag pa sang yuh laux, jhawm saux preng, sonsang yuh laux ka pui mai to brie mawh pa sang nie kin ka veng an miex ding lie?”Ref 14:21 Jhi 6:8 22 Jhak heue, pui tak sang prah pui pa boek pa kawn deuk ka daux veng an tix cub, pa tak viex kawn simex kawn bun tix lih khaing an, kix tak lih hoek ka pex mai pex tak nyawm rhawm rhi son pa caox caig, pa viex Aux hoek ka piang veng Yerusaliem son can ceu pa viex Aux hoek ka daux haktiex an heue. 23 “Pex tak nyawm rhawm kheu kix, yam yaox pex ka daux krax mai kaing ceu pa yuh kix mai pex tak tawng ka ang Aux tie yuh tix ceu kawx, ka daux pa ang koe grawng, ka can pa hoik yuh Aux, ka daux veng an,” Siyiex ah nan heue.