1 Gumlox Siyiex hoek bleeh ka aux ah nin, 2 “Kawn pui eue, tiebtie ka cao jhai Isarelax pa kaoh khaing daux rhawm rhi cao kix, ah nin ka kix, nghiet ka gumlox Siyiex liak.” 3 Siyiex ah nin, “Kieh krax kha rhawm koe ka cao jhai pa vao, pa hawt khaix rhawm cao kix mai pa ang sax yaox tix ceu kawx heue.” 4 “Ceu pui Isarelax eue, cao jhai pex awm sox praix pa ot ka daux tiag dau tu heue.” 5 Ceu pui Isarelax khankix ang haok hu ka dee laux guh veng, cox sum kieh kaux cong, sonsang tiebtie naing yam hoek baux singaix Siyiex heue. 6 Kix hoik yaox grawng ceu pa ang koe cee koe cak mai ka grawng pie lhen ah nin, “Siyiex ah nin, yam ang Siyiex tie ploi kix hu, mawh kheu kix kieh pui yum rhawm ka sang grum naog gumlox pa krai tix tom kriem heue.” 7 “Pex hoik yaox ka riang susai ceu pa giex going mai pex hoik krai lox jhai pie lhen? Pex ca kawn ah, “Siyiex ah nin, viang mawh nan, Aux ang sax krai heue.” 8 Mawh kheu nan, Siyiex ah nin, “Mawh kheu krai pex lox pa giex going mai yaox ka riang susai pie lhen khankix, mawh kheu nan, Aux tieh feen ka pex tete, Siyiex ah nan heue.” 9 “Taix Aux tak tiebtie ka cao jhai pa yaox ka riang susai pa giex going mai pa krai lox jhai pie lhien. Kix tak ang yaox ti ot ka daux dee kraix khrawm pui Aux tix khankix mai ang lai tiiem ti deuh carang kix ka daux nyiex ma ceu pui Isarelax mai tak ang lai yaox ti laig ka daux haktiex meung Isarelax mai pex tak tawng mawh Aux Siyiex heue.” 10 Grawh grawng nawh, phan ah tete, kheu hoik pie lhen ka pui Aux khankix daux pa ah nin, “Koe pa nhim, yam ang pa nhim koe mai pui tix kaux sum guh veng mai cao jhai kraix simaox ceed pa ang kaux.” Ref 13:10 Ye 6:14, 8:11 11 Krai ka pui pa kraix simaox ceed pa ang kaux an, ka tak sang grhup guh veng heue. Tak kieh lhiex lih rawm kheem mai mu pre pa kied ting tak cod ka piang pex mai bhaung tak phlu klah an grhup heue. 12 Khaix hoik grhup guh veng mai pui tak chawk grawng an ka pex, “Phawng simaox pid kaux cong pa hoik kraix pex ka piang an koe dee mawx lie?” 13 Mawh kheu nan, Siyiex ah nin, “Aux tak kieh bhaung ting hoek ti phlu klah an laux, ka daux pa song rhawm tix, mai kieh rawm lhiex kheem, ka daux krax pa song rhawm Aux mai kieh pre yuh guh veng laux leeing awm krax pa kied song rhawm tix heue. 14 “Mawh kheu nan, Aux tak sang yuh guh veng pa hoik kraix pex phawng simaox pid pa ang kaux cong an grhup ka piang tiex mai kieh num riah nawh glaoh mai tak goh mai dheem gut pex laux leeing ka daux sigreung an, khaix an, pex tak tawng mawh Aux Siyiex heue. 15 Aux tak kieh pa song rhawm Aux grum naog ka piang guh veng an mai ka piang pui pa kraix phawng simaox pid ka guh veng pa ang kaux cong, Aux krai ka pex, guh veng mai khawm pui pa kraix somaox ceed tak ang lai baox koe khaix in, 16 cao jhai ceu pui Isarelax, pa krai lox jhai son grawng veng Yerusaliem mai pa dha ti yaox riang susai jhi grawng pa koe pa nhim ka son nawh, yam ang pa nhim tie koe, “Siyiex ah nan heue.”

17 Lheu khaing an kawn pui eue, veeh ngai maix ka plak cub bun ceu pui maix, pa krai lox jhai khaing daux rhawm rhi cao tix mai krai lox jhai ka kix, 18 mai maix ah nin, “Kieh krax kha rhawm koe ka piang bun, pa hoik caing ti deuh kraung pa chix yuh simeed yuh sat hawt rhoi gawng caing ka piang taix sibex tix khankix mai pa yuh man tawb ka piang kaing pui pa iak pa ting, sonsang giex ka khwan ju kix heue, mawh sang pon giex pex khwan ju pui Aux khankix mai kieh tokaux tix im ju lie?” 19 Pex tak koe lox sibriem ka Aux, ka daux sinax pui khankix, son gaox nghox ca lang sidax tix jhawp mai shiah blah tiblah mai pah ka pui pa ang khaw ti yum mai deuh ka pui pa ang khaw ti im ju, pex krai grawng pie lhien ka pui Aux mai kix nghiet ka lox pie lox lhen an heue. 20 Mawh kheu nan Siyiex ah nin, “Jhak heue, Aux tak tieh feen ka pa yuh simeed yuh sat pa giex ka khwan pex, Aux tak sang riah ti tik rhoi gawng caing khaing ka piang plawng taix sibex pex mai ploi khwan khankix pa hoik giex pex ti deuh lih hu heue.” 21 “Aux tak baox riah ti tik man tawb kaing pex mai taoh pui Aux lih khaing daux tawm taix pex mai kix tak ang lai ot ka daux tawm taix pex heue. Khaix an pex tak tawng mawh Aux Siyiex heue.” 22 Ka pui pa rahsee pa ang Aux kieh laux rhawm khankix, pex hoik kieh laux rhawm kheu jao pie lhien an mai pex hoik tawx riang rao ka taix pui pa caox caig, son ang kix lai veeh khaing daux krax pa caox caig yuh tix mai taoh ka ju tix heue.” 23 “Mawh kheu nan pex tak ang lai yaox ka riang susai pa giex going mai ang yaox tix krai lox jhai. Mawh kheu sang deeh taoh Aux pui Aux khankix khaing daux tawm taix pex mai pex tak tawng mawh Aux Siyiex heue.”