1 Gumlox Siyiex hoik hoek ka aux ah nin, 2 “Kawn pui eue, maix ot sigreung nyiex ma pa tieh feen pa koe ngai ti sang yaox, viang mawh nan ang chix yaox mai koe yhaok ti sang mhong, viang mawh nan, ang chix mhong heue. Grawh grawng nawh, kix mawh nyiex ma pa tieh feen heue.”Ref 12:2 Isa 6:9-10; Ye 5:21; Mak 8:18 3 “Mawh kheu nan, kawn pui eue, khre kraung khrai maix sonsang to khaing haktiex in, lih hu plak sivoe kix yam pon singaix maix tak lih hu tang dah khaing plak sivoe ngai kix heue. Viang kix mawh nyiex ma pa tieh feen kawx ka kix kawn koe krax doh keud ka heue.” 4 “Ka daux plak pon singaix maix tak viex kraung khrai maix lih khaing ka daux plak sivoe ngai kix ka plak ponngaix awm kraung pui pa sang to, tang dah mai lih hu plak sivoe ngai kix plak ponbo, awm pui pa sang hu laig ka daux pa giex laung heue.” 5 “Kaong guh veng ka daux plak sivoe ngai kix mai teei ti viex kraung khrai maix lih hu khaing ka daux doh an heue.” 6 “Maix tak klawm ankix ka piang klip tix, ka plak sivoe ngai kix, viex ankix lih hu yam faik boi praix heue. Maix tak lhop pakngai tix, son ang maix chix yaox ka tiex heue. Mawh kheu Aux hoik yuh maix mawh mhai tix ceu ka son nyiex ma ceu pui Isarelax heue.” 7 Aux hoik yuh awm pa hoik tawm Nawh ka aux. Aux hoik viex kraung khrai tix lih hu ka plak ponngaix, awm pui pa sang hu laig ka daux pa giex laung mai aux hoik kaong guh veng doh ka taix tix ka plak ponbo, hoik viex ankix lih hu yam faik boi praix mai aux hoik klawm ankix ka piang klip tix, ka plak sivoe ngai kix heue. 8 Yam hoek ka plak ponngawb, gumlox Siyiex hoek bleeh ka aux ah nin, 9 “Kawn pui eue, ang hoik mawh nyiex ma ceu pui Isarelax khankix, pa mawh cub nyiex ma pa chix tieh feen, pa hoik ah nin ka maix, “Yuh maix patix lie?” 10 “Ah nin ka kix, Siyiex ah nin, gumlox in, dex dawd mai can simiang pa kwang ka daux veng Yerusaliem mai ceu pui Isarelax khawmuik, pa koe ka daux an heue.” 11 Ah nin “Aux mawh mhai ka son pex awm pa hoik yuh aux an tak sang yuh ka piang kix heue. Kix tak sang mawh pui pa hu laig ka daux pa giex laung heue.” 12 “Simiang kix tak klawm kraung khrai tix ka piang klip tix yam faik boi praix mai lih hu. Kix tak kaong guh veng doh, sonsang viex kraung khrai lih daux doh an heue. Nawh tak lhop pakngai tix, son ang nawh chix yaox ka tiex heue.” 13 “Aux tak naih rub, ka piang nawh mai nawh tak krix ka daux jhawk taong Aux heue. Aux tak viex nawh hoek ka veng Babulon, haktiex pui Khaladie. Viang nawh yum tan kawx nawh tak ang pon ti yaox ka veng an heue.Ref 12:13 2Sim 25:7; Ye 52:11 14 “Aux tak kieh bhaung ku plak prung prang ti tik, pui pa teem pa coi pa ot rawb rim nawh khankix mai pui naing nawh khawmuik mai Aux tak kiex vaig hawt khaix kix heue.” 15 “Khaix an kix tak tawng ka mawh Aux Siyiex, yam hoik prung prang Aux ti tik kix ka daux sinax ceu pui khankix mai ka daux haktiex an heue.” 16 “Viang mawh nan, Aux tak sang kieh kix glawd tiblah khaing vaig, khaing pa sibhawm praix mai khaing jhawm saux preng, sonsang pon krai lao grawng pa seeing brai kix khawmuik ka daux sinax pui tang ceu, ka can dee hu kix, khaix an, kix tak tawng ka mawh Aux Siyiex heue.”

17 Lheu khaing an, gumlox Siyiex hoik hoek ka aux ah nin, 18 “Kawn pui eue, ih blah tau mai pa yaoh yee tix mai nyaux rawm tau mai pa lhat graung khi rhawm tix heue.” 19 Ka pui haktiex khankix, Siyiex ah nin ka can pui pa ot ka daux veng Yerusaliem mai ka haktiex Isarelax.” Kix tak ih blah tau mai pa yaoh yee tix, nyaux tau mai pa daox am tix sonsang pon haktiex nawh ti luat luan khaing pa yiien si briem, kheu jao grawng pa kin yuh pui pa ot ka daux nawh khawmuik heue. 20 “Veng pa ot pui tak mawh pa laux leeing mai haktiex tak sang lih mawh dee yiien pui mai pex tak tawng ka mawh Aux Siyiex heue.” 21 Gumlox Siyiex hoek bleeh ka aux ah nin, 22 “Kawn pui eue, mawh in gumlox kab pa hoik shiao pui Isarelax son grawng haktiex, mawh koe yuh ka mawx lie?” Baux singaix nawh hoik luan mawh grawng pa plak jhi kuceu hoik koe krax som nai heue. 23 Mawh kheu nan, krai ka kix Siyiex ah nin, “Aux tak sang deuh gumlox kab in grai hu mai Isarelax tak ang lai yaox ti shiao gumlox kab in ka daux haktiex kix tix bawg kawx heue.” Mawh kheu nan, ah nin ka kix, ‘Singaix bawg yam khankix hoik dex mai pa plak jhi kiex yaox tak sang mawh pa grum naog kuceu heue.’ 24 “Mawh kheu ceu pa plak jhi pa giex going ang ah mai krai lox jhai pie lhen tak ang lai koe tix bawg kawx ka daux sinax nyiex ma ceu pui Isarelax heue.” 25 “Kheu mawh Aux Siyiex, phan Aux krai mai gumlox krai Aux tak mawh pa grum naog mai an tak ang mawh pa greed tix rheeng bawg yam, nyiex ma pa tieh feen khankix eue, mawh kheu ka daux bawg yam singaix pex khankix, Aux tak krai mai yuh grum naog awm pa hoik krai tix, Siyiex ah nin heue. 26 Gumlox Siyiex baox hoek bleeh ka aux ah nin, 27 “Kawn pui eue, jhak heue, ceu pui Isarelax khankix ah nin, riang susai pa yaox nawh mawh pa kawn rheeng, khaing yam in mai nawh krai lox jhai son bawg yam pa kawn kied singai heue.” 28 Mawh kheu nan, ah nin ka kix, Siyiex ah nin, “Gumlox Aux, tak mawh pa ang lai greed tix rheeng bawg yam. Viang mawh nan, awm gumlox pa krai Aux khankix, tak yuh grum naog heue, “Siyiex ah nin heue.”