1 Khaix an khwan singax hoik yaog aux haok mai viex aux hoek ka daux diang siviex plak lih singaix nyiex bwan Siyiex, pa veeh pakngai tix plak lih singaix mai jhak heue, daux siviex an, koe pui pa singax tixnga phwan kaux mai khaing sinax pui khankix, aux yaox ka Yazanix kawn simex, Azurax mai Pelatix kawn simex Benayax khankix pa mawh simiang pa kwang ka piang pui khankix heue. 2 Nawh ah nin ka aux, “Kawn pui eue, inkix mawh pui khankix, pa keud tix sang yuh krax pa lud mai pa tawx krax keud pa caox ka daux veng in, 3 pa ah nin “Bawg yam ang nyang dex, sonsang sum ka nyiex, veng in mawh aw mai ex mawh nex heue.” 4 “Mawh kheu nan, kawn pui eue, ah lox jhai mai sidiex ka kix heue.” 5 Khaix an khwan Siyiex lih hoek ka piang aux mai ah nin ka aux, “Krai heue, Siyiex ah nin, ceu pui Isarelax khankix eue, pex ah yuh nin, mawh kheu Aux tawng ka ceu pa kaoh khaing daux rhawm rhi pex heue.” 6 “Pex hoik nie pah pui yum ka daux veng in mai pex hoik tik pui yum naog ka daux krax khankix heue.” 7 Mawh kheu nan, Siyiex ah nin, “Pui yum pa hoik pah pex, pa deuh pex sigreung krax, kix mawh nex mai veng in mawh aw heue. Viang mawh nan, Aux tak sang viex pex lih khaing daux veng heue. 8 “Pex hoik lhat ka vaig mai Aux tak sang viex vaig hoek ka piang pex heue,” Siyiex ah nin heue. 9 “Aux tak viex pex lih khaing ka daux veng an mai ap pex ka daux taix pui haktiex tang praix khankix mai tawx krax ciyang ka piang pex heue. 10 “Pex tak goh tix yum ka vaig, Aux tak ciyang pex can daux mee haktiex Isarelax tom sidah heue. Khaix an pex tak tawng ka mawh Aux, Siyiex heue.” 11 “Veng in tak ang lai mawh aw pex mai pex tak ang lai mawh nex ka daux aw an heue. Aux tak ciyang pex daux mee haktiex Isarelax tom sidah heue.” 12 “Pex tak tawng mawh Aux Siyiex. Mawh kheu ang pex lawng ka daux krax lox lai beenli pa deuh Aux khankix mai ang lai hawt ti yuh awm lox tat jhawm prawng Aux heue. Viang mawh nan, pex hoik hawt yuh awm koe beenli pui tang ceu, pa ot hawt vung viang pex khawmuik heue.” 13 Glang yam krai aux lox jhai, Pelatix kawn simex Benayax hoik yum. Khaix an aux gup pakngai tix mai kok yo lox pa ting ah nin, “Siyiex eue, mawh sang yuh maix ceu pui Isarelax pa kawn deuk khankix laux leeing khawmuik lie?”

14 Gumlox Siyiex baox deeh hoek ka aux ah nin, 15 “Kawn simex kawn pui eue, puxaik maix, paox nyiex maix, pui doeh ru maix mai nyiex ma ceu pui Isarelax khawmuik, mawh pui veng Yerusaliem hoik krai grawng kix ah nin, kix hoik lih hu singai khaing Siyiex heue. Haktiex in hoik mawh pa tawx tix ka yix, pa pon yix tix cie heue.” 16 “Mawh kheu nan krai ah nin Simiang Siyiex, ah nin, “Viang aux hoik tik kix luan dee singai ka daux sinax pui tang ceu khankix mai hoik prung prang kix ot ku sidah haktiex kawx, viang mawh nan, Aux tak sang mawh dee pa singax singeh tivud ticu ka son kix, ka daux haktiex ka dee hu ot kix heue. 17 Mawh kheu nan, krai ah nin, ‘Siyiex ah nin, Aux tak kraix khrawm pex khaing ceu pui khankix mai deeh khrawm pex khaing haktiex, ka dee prung prang pex tix ot mai Aux tak tawx haktiex Isarelax ka pex heue.’ 18 “Yam hoek kix ka haktiex an mai kix tak teei ti tik riang grang ceu pa seeing brai khankix mai khawm pa seeing khawmuik khaing haktiex an heue.” 19 Aux tak tawx kix koe rhawm pa awm paox tix mai tak sau rhawm pa khraox ka daux kix mai teei rhawm pa kiien awm simaox lih khaing daux tokaux kix mai tawx rhawm nex pa awn ka daux kix,Ref 11:19-20 Yez 36:26-28 20 sonsang pon hu kix ka daux lox lai beenli pa deuh Aux khankix mai priex tix hawt ka lox tat jhawm prawng Aux khankix mai hawt ti yuh mai kix tak sang mawh pui Aux mai Aux mawh Siyiex kix heue. 21 “Phan mawh son pui pa koe rhawm tix kawn sang hawt khaix ceu pa greeing khankix mai yuh pa seeing brai khankix, Aux tak sang deeh viied tix tawx krax kaing pa yuh kix hoek ka piang kaing kix heue,” Siyiex, Siyiex ah yuh nan heue.

22 Yam an Cherubin khankix di pruik tix haok mai jaong ling khankix kawx hoik haok hawt praok kix mai min plakngai Siyiex ceu pui Isarelax hoik koe ka piang kix heue.Ref 11:22-23 Yez 43:2-5 23 Min plakngai Siyiex haok khaing ka daux sigreung veng mai hoik cung tix ot ka piang gawng, pa koe plak lih singaix veng heue. 24 Khwan hoik yaog aux haok mai viex aux hu ka daux riang susai, ka khwan Siyiex tom hoek ka daux haktiex Khaladie, ka dee ot pui pa giex laung mai riang susai pa yaox aux hoik haok khaing aux heue. 25 Mawh kheu nan, aux hoik krai ka pui ankix pa ot ka daux pa giex laung khankix, ka grawng pa hoik jhi Siyiex aux yaox khawmuik heue.