10
1 Aux jhak ti yaox ka plak raoma, pa koe ka piang kaing Cherubin tan, pa awm lon siang simaox tix mu, pa koe grang pakpeung awm dang ngeung pa sidawng ti yaox ka daux an heue.Ref 10:1 Yez 1:26; Jhi 4:2
2 Nawh Cao krai ka pui pa ceep kraung man rhi an ah nin, “Hu laig daux sinax jaong ling pa koe greem Cherubin mai dawm gaox ngu naog ka daux taix maix mai rhuat ka piang veng heue.” Nawh hu laig ka dee an, ka plak sivoe ngai aux heue.Ref 10:2 Jhi 8:5
3 Yam an Cherubin, kawn cung ka plak seh nyiex bwan, yam hu laig pui an ka plak daux mai paiawm hoik naog ka daux nyiex bwan heue.
4 Khaix an min plakngai Siyiex haok khaing Cherubin mai hoik tiang ka piang kaing pang siviex nyiex bwan mai nyiex bwan hoik naog ka pa ceep paiawm mai ka brawk an, hoik naog ka pa jhan riang min plakngai Siyiex heue.
5 Lox luah pruik Cherubin khankix hoik mhong tix tom hoek ka plak praix awm luah lox yam sikah Siyiex pa ting sibrawm heue.
6 Yam tawm Nawh Cao lox tix ka pui pa ceep kraung man rhi an ah nin, “Teei ngu khaing sinax jaong ling an khankix mai khaing sinax Cherubin heue.” Pui an laig ka plak daux mai cung hawt praok jaong ling ankix heue.
7 Cherubin an tix kaux nyeu taix tix lih khaing daux sinax cub Cherubin an khankix, ka ngu pa koe ka daux sinax kix mai teei ngu an tiblah tawx ka daux taix pui pa ceep kraung man rhi an, nawh rieb ti teei mai lih hu heue.
8 Cherubin an koe grang pakpeung taix pui ka greem pruik kix heue.
9 Yam jhak aux, aux yaox jaong ling pon mu koe hawt Cherubin an khankix tan mai jaong ling hoik tang koe hawt paw kix tix kaux tix mu heue. Jaong ling an khankix hoik koe grang pa awm siang simaox pa mhawm plang tix mu heue.
10 Phan mawh grang pakpeung kix, khawm pon mu, hoik awm paox tix khawmuik, awm krax pa hoik koe an mai jaong ling an tix mu hoik awm pa koe ka daux jaong ling an tix mu heue.Ref 10:9-13 Yez 1:15-21
11 Yam hu jaong ling ankix, hoik tang hu see sivoe tix khawm pon daog tidum neh heue. Kix ang lai veeh tix hu ka praok yam hu tix heue. Kix hawt hu ka plak dee veeh kaing tix mai ang lai veeh ka praok tix yam hu kix heue.
12 Tokaux kix khawmuik, blawg kix taix kix mai pruik kix mai khawm jaong ling pa koe Cherubin an khankix pon mu hoik naog ka ngai hawt vung viang khawmuik heue.Ref 10:12 Jhi 4:8
13 Phan mawh jaong ling an khankix, aux mhong kok kix ceu kaux nawh mawh, jaong ling pa yia tix heue.
14 Cherubin ankix ku mu koe pakngai pon plak, pakngai baoh tix, mawh pakngai Cherubin mai pakngai ra, mawh pakngai pui tix kaux mai pakngai loe hoik mawh pakngai baoh sivai sangsi mai pakngai pon, mawh pakngai klang krih heue.Ref 10:14 Yez 1:10; Jhi 4:7
15 Cherubin an khankix hoik yaog tix haok, in mawh totiag im ju, pa hoik yaox aux hawt rawm klawng Khebax tan heue.
16 Yam hu Cherubin an khankix, jaong ling hu hawt praok kix mai yam di Cherubin pruik tix, sonsang yaog tix haok khaing piang tiex, jaong ling ankix ang lai veeh khaing praok kix heue.
17 Yam Cherubin khankix cung tix kaog, jaong ling khankix kawx cung tix kaog mai yam yaog kix ti haok ka piang jaong ling khankix kawx yaog ti haok heue. Kheu jao koe khwan totiag pa im ka daux jaong ling an heue.
18 Khaix an min plakngai Siyiex lih khaing piang siviex nyiex bwan mai hoik cung tix ot ka piang Cherubin an khankix heue.
19 Yam an Cherubin khankix di pruik tix mai yaog tix haok khaing piang tiex ka daux plak sivoe ngai aux heue. Yam lih hu kix, jaong ling khankix kawx koe hawt praok kix mai kix cung tix ot ka diang siviex pa koe plak lih singaix khaing nyiex bwan Siyiex mai min plakngai Siyiex ceu pui Isarelax koe ka piang kix heue.
20 In mawh totiag im ju, pa hoik yaox aux greem Siyiex ceu pui Isarelax khankix hawt rawm klawng Khebax mai aux hoik tawng ka hoik mawh kix Cherubin heue.
21 Kix ku kaux koe pakngai pon plak mai koe pruik pon khawn mai pa awm pakpeung taix pui hoik koe greem pruik kix heue.
22 Plakngai kix, hoik awm pakngai pa hoik yaox aux hawt rawm klawng Khebax khawm krax pa koe grang pakpeung kix mai khawm kaux cao kix heue. Kix ku kaux hoik hu rah rahsee see ka plak see siviex heue.