1 Khaix an Nawh Cao hoik kok yo lox ting sinum hoek ka yhaok aux ah nin, “Kieh pui pa sang tuktiak pa sang yuh veng in laux, pex giex kraung naing ka taix tix hoek dex heue. 2 Pui liah kaux, hoek bleeh sijaox khaing siviex plak piang, pa veeh tix plak laong mai kix ku kaux hoik giex ka kraung naing pa sang yuh laux, ka daux pui tix kaux daux kix ceep kraung man rhi mai koe kraung pa tiiem lai tix mu hawt praok nawh, kix hoik laig ka daux mai hoik cung ka praok khu dee tan pa yuh ka tawng lheung heue. 3 Yam in, min plakngai Siyiex ceu pui Isarelax hoik haok luan khaing dee deuh riang Cherubin ka dee hoik dawg koe nawh mai hoik hoek ka piang pang siviex nyiex bwan heue. Nawh kok ka pui pa hoik ceep ka kraung man rhi an pa koe gawng pa tiiem lai hawt praok nawh, 4 mai Siyiex ah nin ka nawh, “Hu laig ka daux sigreung veng Yerusaliem mai tawk cum ka piang dong re kix, pa ngia ngheeik mai pa hoik yuh tix ka daux veng heue.”Ref 9:4, 6 1Pe 4:17; Jhi 7:3, 9:4, 14:1 5 Nawh Cao hoik ah nin, “Ka daux pa mhong aux, ka pui tang kaux khankix hawt khaix nawh ka daux veng mai pah kix yum, paw lai lhawk mai paw lai caux rhawm ka tix kaux kawx heue.” 6 “Pah yum ka pui pa riex ju mai pui awn ju, kawn bun krih sinaw khankix mai kawn nyawm iak khankix mai bun khankix pak lawg heue. Viang mawh kawx nan, paw greed tix dex paw chuh pa hoik koe mhai ka piang dong re mai jah ka dee pa singax singeh Aux heue. Mawh kheu nan, kix jah ti pah ka kuad riex ju pa ot ka plak sivoe nyiex bwan khankix yum heue. 7 Khaix an Nawh Cao hoik ah nin ka kix, “Yuh nyiex bwan seeing mai kieh brawk naog ka pa yum mai lih hu heue.” Kix hoik lih hu ti pah pui yum ka daux veng heue. 8 Yam kawn pah kix pui yum, prah aux ot nong nong mai aux gup pakngai tix piang tiex mai riag yo lox tix ah nin, Siyiex eue, Mawh sang yuh Maix Cao ceu pui Isarelax pa kawn deuk khankix laux leeing ka daux krax pa hoik klup Maix Cao krax pa song rhawm tix ka piang veng Yerusaliem lie.” 9 Khaix an Nawh Cao ah nin ka aux, “Phimap phighram nyiex ma ceu pui Isarelax mai ceu pui Yudax khankix, mawh pa kied ting lhaong mai haktiex hoik mawh pa naog ka nham mai veng hoik naog ka pa ang lai kaux sijax mai kix ah nin, Siyiex hoik tik vud ka haktiex mai Siyiex ang lai jhak ka heue.” 10 “Phan mawh ka son Aux, ngai Aux tak ang lai lhawk ka, Aux ang lai koe krax caux rhawm ka heue. Viang mawh kawx nan, Aux deeh viied kaing pa yuh kix hoek ka piang kaing kix heue.” 11 Khaix an pui pa ceep kraung man rhi an, pa hoik koe gawng tiiem hawt praok nawh, deeh krai grawh grawng an khankix ah nin, “Aux hoik yuh awm gumlox pa hoik tawm Maix Cao ka aux heue.”