1 Yam hoek ka daux tixngoe num tix num, daux khix pon, phwan ngaix, yam ot aux tau mai pui pa giex laung khankix, hawt rawm klawng Kehebax, raoma baoh mai aux hoik yaox ka riang susai Siyiex heue.Ref 1:1 Jhi 19:11 2 Yam haok khix phwan ngaix, ka daux phwan num tix num yam kawn ot simiang Yehoyakhim ka daux pa giex laung, Ref 1:2 2Sim 24:10-16; 2Been 36:9-10 3 gumlox Siyiex hoek ka cao giex kaing li kawn simex Buzix, ka daux haktiex pui Kaladie hawt rawm klawng Khebax mai plawng taix Siyiex koe ka piang nawh tan heue. 4 Khaix an yam jhak aux ka an mai aux yaox hoek bhaung ting khaing plak lhaong mai paiawm pa kied ting tau mai pa toh riang hawt vung viang an mai klia ngu pa rup ang jud ang jai, ka daux sigreung ngu an awm grang siang simaox lheung pa lih khaing heue. 5 Khaing ka daux sigreung ngu an, pa awm totiag pa im ju lih khaing heue. Grang pakpeung totiag ankix hoik awm pakpeung pui heue.Ref 1:5 Jhi 4:6 6 Kix ku kaux koe pakngai pon plak mai koe pruik pon mu heue. 7 Caong kix hoik rah mai tiag caong kix awm tiag caong kawn mawie, an khankix hoik plang awm grang tawng lheung pa hoik thui ti plang heue. 8 Greem pruik kix ka piang pruik kix pon plak, hoik koe taix kawn pui ka mai kix khawm pon kaux hoik koe pakngai mai pruik khankix heue. 9 Pruik kix hoik teeh ka paox tix, tix mu hoik tix mu, totiag an khankix hu sivoe rahsee mai ang lai gi plak khaix tix yam hu kix heue. 10 Pakngai kix ku mu hoik awm pakngai kawn pui mai pakngai kix khawm pon kaux, plak khawn dawm hoik koe pakngai grang sivai sangsi mai pakngai kix khawm pon kaux, plak khawn gwiex koe pakngai grang mawie mai kix khawm pon kaux hoik koe pakngai grang klang heue.Ref 1:10 Yez 10:14; Jhi 4:7 11 Pakngai kix mawh pa awm in, pruik kix hoik neh ti haok plak piang mai pruik an ra mu hoik teeh ka paox tix, tix mu hoik tix mu mai pruik an ra mu hoik kheem ka tokaux cao kix heue. 12 Kix ku kaux hoik hu sivoe rahsee, kix hoik hu awm pa koe rhawm rhi khwan kix ti sang hu dee mawx ang ah mai kix ang lai gi ka plak khaix tix yam hu kix heue. 13 Grang pakpeung totiag pa im ju an khankix, awm grang gaox ngu rup pa jhan riang awm ngu di heue. Taox ngu an hoik tah hu hawt vung viang sinax totiag an khankix mai pa riang ngu an hoik jhan riang tix lih khaing daux ngu an awm pluk plak praix heue. 14 Totiag im ju an khankix to hu mai deeh hoek awm pluk plak praix heue. 15 Yam jhak aux ti yaox ka totiag pa im ju an khankix, jhak heue, jaong ling lawx koe ka piang haktiex hawt praok totiag im ju an khankix ku mu, ka plakngai nawh khawm pon plak heue.Ref 1:15-21 Yez 10:9-13 16 Grang pakpeung jaong ling lawx an khankix, awm grang siang simaox pa toh riang kuceu mai khawm pon mu an hoik koe awm paox tix heue. Pak peung pa yuh kix hoik awm koe jaong ling lawx an tix mu khaing mai hoik plaik tix laig ka daux sigreung jaong ling lawx an tix mu heue. 17 Yam hu kix, kix hu see tau mai paox tix khawm pon plak tidum neh khawmuik heue. Yam hu kix kawx kix ang lai gi ka plak khaix tix yam hu kix heue.Ref 1:18 Jhi 4:8 18 Gawng jaong ling an khankix kied lhaong mai mawh pa koe krax lhat graung kah heue. Gawng jaong ling an hawt vung viang nawh hoik mawh pa naog ka ngai, khawm pon mu heue. 19 Yam hoik hu totiag im ju an khankix, jaong ling lawx an kawx hawt hu tau praok kix mai yam yaog totiag im ju an khankix khaing ka piang tiex, jaong ling lawx an khankix kawx hawt yaog tix haok tau heue. 20 Can dee sang koe rhawm khwan tix sang hu mai jaong ling lawx an khankix hoik yaog ti hu tidum neh tau mai kix heue. Grawh grawng nawh, khwan totiag im ju khankix hoik koe ka daux jaong ling lawx an khankix heue. 21 Yan hu totiag an khankix, jaong ling lawx an kawx hu heue. Yam cung totiag an khankix, jaong ling lawx an kawx cung mai yam yaog totiag tix haok khaing haktiex, jaong ling lawx an khankix kawx, hoik haok tau mai kix tidum neh, grawh grawng nawh, khwan totiag im ju an khankix hoik koe ka daux jaong ling lawx an khankix heue. 22 Ka piang kaing totiag im ju an khankix, awm braux raoma mai awm grang simaox paing pa koe ceu pa lhat graung, pa hoik neh ti lih ka piang kaing kix heue. Ref 1:22 Jhi 4:6 23 Greem braux an kix hoik neh pruik tix lih see see, ka an tix mu heue. Totiag an khankix koe pruik ra mu, pa kheem tokaux kix ku mu heue. 24 Yam hu kix, aux mhong lox sinum pruik kix mai awm lox sinum rawm khankix tom nie, pa siaox awm lox cao pa ting sibrawm, pa awm lox sinum cub kru naing mai yam cung kix, kix ploi pruik tix lih heue.Ref 1:24 Jhi 1:15, 19:6 25 Yam cung kix mai ploi ka pruik tix lih, lox lih khaing braux raoma ka piang kaing kix heue. 26 Ka piang braux raoma ka piang kaing kix, hoik lih koe pa awm dang ngeung tix mu mai grang pakpeung an, awm siang simaox raoh mai ka piang dang ngeung an, hoik lih koe pa awm grang pakpeung pui heue.Ref 1:26 Yez 10:1; Jhi 4:2-3 27 Jah khaing nyoi nawh mai haok plak piang aux yaox grang pakpeung pa koe awm siang simaox lheung, pa toh awm rup ngu khankix hawt vung viang daux nawh khawmuik mai jah khaing nyoi nawh mai lih plak greem aux yaox grang pakpeung pa toh awm rup ngu pa jhan riang ti hawt vung viang nawh khawmuik heue.Ref 1:26 Yez 10:1; Jhi 4:2-3 28 Grang pakpeung pa jhan riang tix hawt vung viang an khawmuik awm siyawng sijax mukheu ka daux paiawm singaix yam lih lhiex heue. In mawh grang pakpeung pa awm min sibrawm Siyiex heue. Mawh kheu nan, yam yaox aux ka riang susai an, aux hoik gup ngai tix mai aux mhong lox sikah heue.