5
1 Siyiex eue, doh keud ka ceu pa hoik hoek ka piang yix, jhak ti yaox ka lox salao pa hoik kham yix liak.
2 Sinngao yix hoik deeh veeh ti hu ka ceu pui tang ceu khankix mai nyiex ma yix hoik deeh veeh ti hoek ka daux tawm taix pui tang meung khankix heue.
3 Yix hoik mawh kawn doe pa ang koe keeing, miex yix hoik mawh pa awm miexmai heue.
4 Yix yaox ti tawx mau son rawm pa sang nyaux yix mai khix taung yix mawh pa liag ka pui heue.
5 Kix hawt ti leue yix tom phoek loek caong yix heue. Yix hoik taug mao mai ang lai koe krax laux lee heue.
6 Yix hoik yaog taix tix tu ka pui Ejiptux mai ka pui Asurix khankix, sonsang sawg ka pa ih heue.
7 Keeing yix khankix hoik lud mai kix ang lai koe heue. Yix yaox ti kham geu krax pa lud kix heue.
8 Siliex khankix kwang ka piang yix mai pui pa sang deeh taoh yix khaing daux tawm taix kix ang lai koe heue.
9 Yix hoik kham ti tik ju ka vaig lawm ka daux tiagtu kheu jao sang pon pa ih heue.
10 Hak yix hax awm daux glah ngu, mawh kheu hax jao sibhawm praix heue.
11 Kix hoik khin ti lud vao tau mai bun khankix ka daux veng Zion mai bunkrih ka daux veng Yudax heue.
12 Taix simiang khankix mawh pa phyawk tix mai tak teue ka kix mai ang lai koe krax yungyi nab yam ka kuad song khankix heue.
13 Pui awn ju khankix hoik krid ka mhaw mai kawn nyawm khankix, hoik sideeing tix goh greem gawg khix heue.
14 Kuad song khankix hoik grai hu khaing krax pa kraix khrawm ti hawt siviex veng mai pui awn ju khankix kawx hoik grai hu khaing daux pawie yuh kix heue.
15 Krax pa gaux daux rhawm yix hoik grai mai krax graoh yix hoik deeh tieh ti mawh krax pa ngia pa ngheeik heue.
16 Mhok khri hoik rau khaing kaing yix, krax pa kha rhawm koe ka yix, kheu jao hoik lud yix heue.
17 Mawh kheu jao grawng in, rhawm rhi yix koe krax pa taug pa mao, mawh kheu jao grawng inkix ngai yix hoik vuvix,
18 mawh kheu jao hoik yiien hu pui khaing gawng Zion, sox praix khankix hoik lailing ka baoh dee an heue.
19 Siyiex eue, Maix Cao koe leeing ju heue. Dang neung Maix tak koe ku ju leeing ju heue.
20 Maix Cao sang piawm ka yix leeing ju mai sang tik vud ka yix, tom rheung bawg yam yuh ka mawx lie?
21 Siyiex eue, deeh veeh yix ing ka Maix Cao mai yix tak sang pon veeh tix ing heue. Deeh cox baux singaix yix khankix mawh pa khraox, awm baux singaix pa prim dix heue.
22 Phan Maix Cao ang yang bax thiang ti tik yix pak lawg mai ang koe krax pa kied song rhawm ka yix hoik mhawm heue.