1 Nawh Cao ah nin ka aux, “Kawn pui eue, kaoh cung ka caong maix mai Aux tak sang krai ka maix heue.” 2 Yam sikah Nawh ka aux mai khwan Nawh Cao laig ka daux aux, kieh aux kaoh cung ka caong tix mai aux hoik mhong lox Nawh, pa ah nin ka aux heue. 3 Nawh ah nin ka aux, “Kawn pui eue, Aux sang ploi maix hu ka kawn praix Isarelax khankix, pa mawh ceu pui pa tieh feen ka Aux, kix mai keeing kix pa hoik lud ka piang Aux tom hoek daux singaix in heue. 4 Kheu mawh kix kawn praix pa pu ngai mai pa kiien rhawm heue. Aux sang ploi maix hu ka kix mai maix tak ah nin ka kix, Siyiex ah nin heue. 5 Viang kix cu nghiet ang ah, thiang ang ah, kheu mawh kix ceu pui pa tieh feen, viang mawh nan, kix tak sang tawng ka dawg koe cao jhai tix kaux ka daux sinax kix heue. 6 “Pa mawh kawn pui eue, paw lhat graung ka kix mai paw ring ka lox kix, viang yeem pang kat koe rawp rim maix mai viang maix ot ka sinax tam tim mai paw lhat ka lox kix mai paw daox ka ngai jhak kix, mawh kheu mawh kix cub nyiex ma pa tieh feen heue. 7 Maix tak krai gumlox Aux ka kix, viang kix nghiet ang ah, thiang ang ah, kheu jao mawh kix pui pa chix tieh feen heue. 8 Viang mawh nan maix pa mawh kawn pui eue, nghiet ka ceu pa krai Aux ka maix. Paw koe rhawm pa tieh feen, awm cub nyiex ma pa tieh feen an khankix, ang ka jheeh maix mai ih ka ceu pa tawx Aux ka maix heue.” 9 Yam jhak aux, aux yaox ka khawn taix pa nyeu bua lai pa hoek ka aux tix pheen heue.Ref 2:9-10 Jhi 5:1 10 Khaix an Nawh naih bua lai an ka plak sivoe aux, pa hoik tiiem tix plak praix khawm plak daux, pa mawh grawng pa yiiem doe mai pa yiiem yo mai pa laux rhawm khankix heue.