9
Grawng Tieh Feen Pui Isarelax
1 Ceu pui Isarelax khankix eue, nghiet heue, pex tak tiang toi rawm klawng Yawdan daux in singaix mai laig sonsang grheu ka ceu pui pa nie lheu ting mai pa nie lheu ting riang khaing pex, pon ka veng pa ting mai veng pa kaux cong pa lhaong tom cux raoma,
2 pui pa ting lhaong kaux hak, pa mawh doeh ru Anakax, awm pa tawng maix khankix mai pa hoik mhong maix pui ah nin. Mawh pui mawx pa pon cung ka plak sivoe doeh ru pui Anakax?”
3 Mawh kheu nan, een tix tawng ka daux in singaix, Simiang Siyiex maix, tak hu ka sivoe maix, awm ngu pa gleeing. Nawh Cao yuh kix laux leeing mai grheu kix ka plak sivoe maix. Mawh kheu nan maix tak grheu kix lih mai nied ti yuh kix laux leeing, awm lox pa hoik tawm Simiang Siyiex ka maix.
4 Khaix hoik grheu Simiang Siyiex kix khaing plak sivoe maix, paw doh keud ti ah nin daux rhawm tix, “Mawh kheu koe pa rahsee aux, Simiang Siyiex hoik viex aux laig, sonsang pon aux tix cie haktiex in, mawh kheu jao krax pa caox caig ceu pui inkix, Simiang Siyiex tom grheu kix lih khaing plak sivoe maix.
5 Ankix ang lai mawh, kheu pa rahsee maix mai krax pa rauh rhawm maix, sonsang laig teei maix ti cie haktiex kix. Mawh kheu jao pa caox caig ceu pui inkix, Simiang Siyiex tom grheu kix lih khaing plak sivoe maix mai sonsang kieh Nawh Cao lox sijax mukheu tix grum naog ka pa hoik tiextu Nawh ka keeing maix Abraham, Icak mai Yakop.
Pa Tieh Feen Pui Isarelax
(Lih 31:18; 32:35)
6 Mawh kheu nan, een tix tawng, Simiang Siyiex tawx haktiex mhawm in ka maix, sonsang pon maix ti cie ang mawh kheu rahsee maix, Mawh kheu mawh maix ceu pui pa kiien ngawg.
7 Doh keud mai paw piawm ka grawng pa hoik kieh maix Simiang Siyiex song rhawm ka daux tiag, jah ka singaix lih maix khaing daux meung Ejiptux, tom hoek ka dee in maix hoik mawh pa tieh feen ka Siyiex.
8 Maix baox kieh Simiang Siyiex song rhawm ka daux haktiex Hawrax, Simiang Siyiex song rhawm ka maix, sang yuh maix laux leeing.
9 Yam haok aux piang gawng, sonsang rieb aux ti teei khlawp simaox, pa mawh khlawp simaox gumlox sijax mukheu pa hoik yuh Simiang Siyiex tau mai pex, yam an aux ot piang gawng tixpon ngaix tixpon sawm, Ref 9:9 Lih 24:18. aux ang ih blah mai ang nyaux rawm.
10 Simiang Siyiex ap khlawp simaox ra khlawp ka aux, pa hoik tiiem ka giien taix tix mai piang an hoik mawh gumlox pa sikah Simiang Siyiex ka pex, piang gawng khaing sigreung ngu, singaix khrawm pex paox tix.
11 Khaix hoik luan tixpon singaix tixpon sawm, Simiang Siyiex ap khlawp simaox an ra khlawp ka aux, pa mawh khlawp simaox lox sijax mukheu.
12 Simiang Siyiex ah nin ka aux, kaoh mai nied lih khaing tin. Grawh grawng nawh pui pa viex maix lih khaing meung Ejiptux khankix hoik yuh pa laux leeing. Kix nied tix veeh ti khaing daux pa tawm Aux ka kix, kix hoik yuh riang grang pa raug son tix.
13 Simiang Siyiex baox ah nin ka aux, Aux hoik yaox ka ceu pui in khankix, mawh ceu pui pa kiien ngawg.
14 Grham Aux sonsang yuh Aux kix laux leeing mai preet ceukau kix khaing greem raoma, Aux tak kieh maix mawh ceu pui pa nie lheu ting riang rao mai pa nie lheu ting khaing kix.
15 Mawh kheu nan Aux deeh veeh ti lih hu khaing piang gawng mai gawng hoik gleeing ka ngu, khlawp simaox gumlox sijax mukheu an ra khlawp hoik koe ka daux tawm taix aux,
16 Yam jhak aux tix yaox, pex hoik lud ka Simiang Siyiex pex mai raug ka riang grang kawn mawie, pex nied tix veeh khaing pa hoik tawm Simiang Siyiex.
17 Aux taing ti tik khlawp simaox an ra khlawp khaing daux tawm taix ti khawm ra khawn mai hoik max ka plak sivoe ngai pex.
18 Aux deeh gup ti ka plak sivoe Simiang Siyiex awm phao voe tixpon singaix tixpon sawm, Aux ang ih blah mai ang nyaux rawm kheu jao phimap pex khawmuik, ka pa hoik lud pex ka daux pa yuh ti pa caox caig ka plak sivoe ngai Simiang Siyiex, sonsang song rhawm Nawh Cao.
19 Mawh kheu aux lhat graungRef 9:19 He 12:21. ka pa kied kin song rhawm Simiang Siyiex piang pex mai pa sang yuh Nawh pex laux leeing, viang mawh nan, ka daux bawg yam an, Simiang Siyiex hoik baox deeh nghiet ka lox aux,
20 Simiang Siyiex hoik kied song rhawm ka Arun mai dex sang yuh nawh laux leeing, mawh kheu nan, aux baox deeh rawg bwan, son Arun ka daux bawg yam an.
21 Aux teei riang kawn mawie pa hoik raug pex pa hoik kieh pex lud mai gleeing ka daux ngu mai krid tom phawng mai aux tik phawng an ka daux rawm klawng pa lih khaing piang gawng.
22 “Pex hoik kieh Simiang Siyiex song rhawm hawt baoh Taberax, Ref 9:22 Si 11:3. baoh MasaRef 9:22 Lih 17:7. mai baoh Kibarot Hatava khankix.Ref 9:22 Si 11:34.
23 Yam ploi Simiang Siyiex pex lih khaing haktiex Kadesha BanaRef 9:23 Si 13:17. Nawh ah nin, haok mai teei ti cie haktiex pa hoik tawx auxRef 9:23 Pi 1:21. ka pex Yam an pex deeh tieh feen ka lox pingnyap Simiang SiyiexRef 9:23 Si 13:31; Pi 1:26; He 3:16. mai ang yum rhawm ka Nawh Cao mai ang cu nghiet ka lox Nawh Cao.
24 Pex hoik tieh feen ka Simiang Siyiex jah khaing daux singaix hoik tawng aux pex.
25 “Mawh kheu nan, aux baox deeh gup ti ka plak sivoe Simiang Siyiex tixpon singaix tixpon sawm, kheu hoik ah Simiang Siyiex tix sang yuh pex laux leeing.
26 Mawh kheu nan, aux rawg bwan ka Simiang Siyiex ah nin, cao Simiang Siyiex eue, paw yuh pui maix khankix, laux leeing liak. Kix mawh sinngao Maix Cao pa hoik deeh taoh Maix Cao ka krax pa ting riang rao tix mai pa hoik viex Maix Cao kix lih khaing daux meung Ejiptux ka plawng taix pa ting riang Maix.
27 Doh keud ka kawncau maix Abraham, Icak mai Yakop liak, paw nyang keud ka pa kiien rhawm kix mai pa caox caig kix mai phimap kix.
28 Phan ang mawh nan, pui haktiex pa viex Maix Cao yix lih khaing ka daux, tak sang ah nin, “Mawh kheu ang Simiang Siyiex pon viex kix hu ka daux haktiex pa hoik deuh Nawh Cao lox sijax mukheu tix ka kix, mawh kheu koeng Nawh Cao ka kix, Nawh Cao hoik viex kix lih sonsang pah kix ka daux tiag.”
29 Mawh kheu kix mawh pui Maix Cao mai mawh sinngao Maix Cao, pa hoik viex Maix lih hu ka siawp sibrawm pa ting riang rao Maix Cao mai ka plawng taix pa hoik nih Maix Cao heue.