10
Teei Khlawp Simaox Bawg Ra
(Lih 34:1-10)
1 “Yam an Simiang Siyiex ah nin ka aux, saik khlawp simaox pa awm phao voe ra khlawp mai haok ka Aux piang gawng mai yuh teug khaox tix mu.
2 Aux tak sang deeh tiiem gumlox pa hoik koe piang khlawp simaox awm bawg voe pa hoik kieh maix max maix tak deuh khlawp simaox in daux teuk.
3 Mawh kheu nan, aux tom yuh teug ka khaox Akasha mai saik khlawp simaox ra khlawp awm phao voe mai haok piang gawng tau mai khlawp simaox an ra khlawp daux taix tix.
4 Nawh Cao tiiem gumlox pingnyap kao gum piang khlawp simaox an awm phao ka, pa mawh lox sikah Simiang Siyiex ka pex piang gawng khaing daux sigreung ngu, singaix khrawm pex paox tix, Simiang Siyiex deeh tawx ka aux.
5 Khaix an aux deeh lih khaing gawng mai deuh khlawp simaox an, daux teug pa hoik yuh aux, yam in hoik koe daux teug tan, awm gumlox pa hoik tawm Simiang Siyiex ka aux.
6 Pui Isarelax khankix lih hu khaing rawm daux Beneyakan mai hoek ka haktiex Moserax. Arun hoik yumRef 10:6 Si 20:28; 33:38. mai kix sipaung nawh tan mai kawn simex nawh Eliza dee plud ti yuh kaing jhaw cao giex kaing li tang nawh.
7 Jah khaing tan, kix lih hu ka haktiex Gugodax mai kix deeh lih khaing Gugodax mai hoek ka Yobatax haktiex koe rawm klawng tix dah.
8 Yam an Simiang Siyiex tang gwieh pui Lewix, Ref 10:8 Si 3:5-8. tawx beeh glawm kieh klawm teug bwan sijax mukheu Simiang Siyiex, sonsang cung kix ka plak sivoe Simiang Siyiex mai yuh kaing jhaw son Nawh Cao mai sonsang nawb kix bwan ka daux min ceu kaux Nawh Cao tom hoek in singaix.
9 Mawh kheu nan, pui Lewix tak ang koe nyum cie mai ang koe sinngao tau mai puxaik nawh khankix, Simiang Siyiex mawh sinngao nawh, awm hoik yuh Simiang Siyiex maix sijax mukheu tix ka nawh.
10 Aux ot piang gawng tixpon ngaix tixpon sawmRef 10:10 Lih 34:28. awm bawg phao ka, yam an Simiang Siyiex deeh baox nghiet ka lox aux mai ang lai yuh pex laux leeing.
11 Simiang Siyiex ah nin ka aux, kaoh thong krax mai hu sivoe pui khankix, sonsang pon laig kix mai teei ti cie haktiex pa hoik tiextu Aux ka keeing kix khankix mai pa sang tawx Aux ka kix.
Num Miex Gumlox Beenli
12 “Pui Isarelax khankix eue, yam in pa mhaing Simiang Siyiex pex yuh mawh ceu patix lie? ceu an khankix mawh pa lhat graung pex ka Simiang Siyiex pex mai sonsang hawt pex ti hu ka daux krax Nawh Cao khankix mai sonsang moh pex ka Nawh Cao mai sonsang yuh pex kaing jhaw Nawh, khawm rhawm tix mai khawm ju tix khawmuik.
13 Sonsang priex pex ti hawt gumlox pingnyap Nawh mai gumlox beenli pa deuh Nawh Cao khankix, awm pa hoik tawm aux ka pex in singaix, sonsang pon pex bwanson ceu pa mhawm.
14 Meung raoma mai piang raoma pa kied ting lhaong mawh cie Simiang Siyiex pex, haktiex in mai khawm pa koe piang haktiex khawmuik kawx mawh cie Nawh Cao.
15 Simiang Siyiex khaw rhawm ka keeing maix mai kied moh ka kix, Nawh Cao hoik laug ti teei doeh ru kix khaing sinax ceu pui khankix awm pa koe ka daux in singaix.
16 Mawh kheu nan, pat hak rhawm pex mai paw lai baox kieh ngawg pex kiien khaix in.
17 Grawh grawng nawh Simiang Siyiex mawh Siyiex piang siyiex khankix mai Nawh Cao mawh Simiang piang simiang khankix mai Nawh Cao mawh Siyiex pa ting lhaong mai pa ting riang rao mai pa khaw tix lhat graung ka mai pa ang jhak pakngai puiRef 10:17 Cau 10:34; Ro 2:11; Ka 2:6; Efe 6:9. mai pa ang teei ka totaix chun praok khankix.
18 Nawh Cao priex rien mai prawng ca son miexmai kawn doe ka daux pa rahsee mai Nawh Cao moh ka nyo sinie mai tawx pa ih khawm kraung ceep ka nawh.
19 Mawh kheu nan, moh ka nyo sinie, pex kawx hoik mawh nyo sinie daux meung Ejiptux.
20 Maix tak koe krax lhat graung ka Simiang Siyiex maix mai yuh kaing jhaw Nawh Cao mai maix tak kleuk tix mai Nawh Cao mai yuh krax tiextu ka daux ceu kaux Nawh Cao.
21 Nawh Cao mawh krax pa yaogyaw maix mai Nawh Cao mawh Siyiex maix pa hoik yuh ceu pa ting lhaong mai ceu pa lhat grawng an khankix mawh pa hoik yaox maix ka ngai tix.
22 Keeing maix khankix lih hu ka daux meung Ejiptux pui atixgliah kauxRef 10:22 Jah 46:27. mai yam in Simiang Siyiex maix, hoik deeh yuh maix koe awm simuing raomaRef 10:22 Jah 15:5, 22:17, 46:27 khankix ka daux pa nie pre haoh hun heue.