8
Doh Keud Ka Simiang Siyiex Pex
1 “Lox tawm pingnyap pa tawm aux ka pex ka daux in singaix, pex tak priex mai hawt ti yuh sonsang im ju mai nie pre haoh hun pex mai laig ka daux, sonsang teei ti cie haktiex pa tiextu Simiang Siyiex ka keeing pex.
2 Doh keud ka pa hoik thong Simiang Siyiex pex, ka krax hu pex ka daux tiag tixpon num, sonsang kieh Nawh Cao koe rhawm awn rhawm tiiem mai cheuk cheu rhawm pex mawh pa yuh ka mawx mai sonsang tawng ka priex rien pex ka lox tawm pingnyap mai ang priex rien ka.
3 Nawh Cao kieh pex koe rhawm awn rhawm tiiem mai ploi pex cai rhawm mai tawx pex ih ka mannax, pa ang pex sax tawng mai pa ang keeing pex sax tawng, mai sonsang kieh Nawh Cao pex tawng ka ang pui im ka blah nong nong, viang mawh nan im kheu lox pa lih khaing jheeh Simiang Siyiex.Ref 8:3 Mat 4:4; Luk 4:4.
4 Ka daux tixpon num an, kraung ceep pex ang sax prim sax griah mai caong pex kawx ang sax saux sax uah.
5 Deuh pex tawng an khankix ka daux rhawm tix, awm sidiex gau keeing ka kawn simex tix, Simiang Siyiex, Siyiex pex kawx sidiex gaux ka pex.
6 Mawh kheu nan, pex tak priex rien ka lox tawm pingnyap Simiang Siyiex, Siyiex pex mai hawt daux krax Nawh mai lhat graung ka Nawh Cao.
7 Mawh kheu Simiang Siyiex, Siyiex pex viex pex laig ka daux haktiex pa mhawm, dee koe rawm klawng, rawm keut, rawm daux, pa lih khaing daux ngawd mai khaing daux gawng khankix,
8 haktiex pa koe nghox ca, koi, nhu plix siiet, khaox ruh, plix kla jiang, khaox sanlun mai rawm hia khankix,
9 Mawh haktiex pa sang yaox maix ti ih blah mai pa ang koe ceu pa cud cha, pa grum naog mai haktiex simaox pa mhawm rhiem, pex tak yaox ti kaong tawng khaing gawng khankix.
10 Pex tak yaox ti ih mai sak mai pex tak yaogyaw bwanson Simiang Siyiex, Siyiex pex, son haktiex mhawm pa hoik tawx Nawh ka pex.
11 Yuh satix pex son ang pex piawm ka Simiang Siyiex, Siyiex pex, ka daux pa ang tix priex rien lox tawm pingnyap, lox tat jhawm prawng mai lox lai beenli pa tawm Aux ka pex daux in singaix.
12 lhat ka yam hoik ih pex mai hoik sak mai yam sum pex ka nyiex mhawm khankix,
13 mai yam deeh pre haoh hun cub tobrie pex mai cub yung pex mai yam deeh haoh hun mau khri pex mai can ceu pa koe pex khankix,
14 mai rhawm pex tak yaw rangdi ka kix, pex tak piawm ka Simiang Siyiex, Siyiex pex, pa viex pex lih khaing meung Ejiptux, khaing dee mawh pex siliex,
15 Kaw pa hoik thong hu ka daux tiag pa ting, dee lhat graung, ka dee koe siuing ngu mai tamtim khankix mai haktiex dee kroh ang rawm koe kawx pa hoik kieh rawm lih khaing daux rang kiien son pex,
16 Kaw pa hoik tawx pex ih mannax ka daux tiag, pa ang keeing pex nyang sax tawng, sonsang kieh Nawh pex koe rhawm awn rhawm tiiem mai cheuk ka pex mai sonsang yuh pa mhawm ka pex daux pa ghoik, Ref 8:11-16 Ho 13:5-6.
17 lhat pex keud ah nin daux rhawm tix, aux hoik magmi, kheu siawp sibrawm mai riang rao plawng taix ti,
18 Kieh pex doh keud ka Simiang Siyiex, Siyiex pex, mawh kheu Nawh mawh pa tawx siawp sibrawm riang rao krax magmi ka pex, sonsang kaux cong sijax mukheu pa tiextu Nawh ka keeing pex khankix, awm pa koe daux in singaix.
19 Phan maix piawm ka Simiang Siyiex maix mai phan maix hawt grawng lawng khaix siyiex tang kaux mai yuh kaing jhaw kix mai krub ka kix, aux tak kham sakse ka son maix, ka daux in singaix mai maix tak laux leeing tete.
20 Awm ceu pui pa hoik yuh Simiang Siyiex kix laux leeing ka plak sivoe maix khankix, mawh kheu ang kix cu nghiet ka lox Simiang Siyiex maix kawx tak laux leeing awm an heue.