5
Lox Tawm Pingnyap Kao Gum
(Lih 20:1-17)
1 Mose kok ka pui Isarelax khankix ah nin, “Pui Isarelax khankix nghiet heue, lox lai beenli mai lox tat jhawm prawng pa sang krai aux pex mhong daux in singaix, pex tak gau tix ka mai yuh satix ka yuh tix an khankix.
2 Simiang Siyiex ex hoik yuh sijax mukheu mai ex piang gawng Hawrap.
3 Simiang Siyiex ang yuh sijax mukheu tau mai keeing ex nong nong, viang mawh nan yuh tau mai ex, can pui pa ot tin pa im ju in singaix.
4 Simiang Siyiex hoik sikah tau mai pex pakngai taw pakngai, piang gawng daux sigreung ngu,
5 aux hoik cung sinax Simiang Siyiex mai pex yam an, sonsang krai pao gumlox Simiang Siyiex ka pex, mawh kheu pex hoik lhat ka ngu, pex ang cu ti haok piang gawng. Nawh Cao ah nin,
6 Aux mawh Simiang Siyiex pex, pa hoik viex pex lih khaing meung Ejiptux mai ka dee yuh pex siliex.
7 Lheu khaing Aux ang pon ti koe siyiex tang kaux.
8 “Ang pon ti yuh riang grang pa saik tix, tix ceuceu son tokaux ti, pa mawh riang grang tix ceuceu, pa koe daux raoma ang ah, pa koe plak greem mai piang haktiex ang ah mai pa koe daux rawm greem haktiex ang ah,
9 ang pon ti krub mai ang pon ti yuh kaing kix, Ref 5:8, 9 Lih 34:17; Krub 19:4; 26:1; Pi 4:15-19; 27:15. mawh kheu Aux mawh Simiang Siyiex pex, mawh Siyiex pa bak pa viang mai pa tawx phimap keeing pex, piang kawn praix tom hoek loe pon ju ru, ka pui pa koeng ka Aux,
10 viang mawh nan, Aux jhi krax moh tix ka pui pa moh ka Aux mai pui pa hawt ka lox tawm pingnyap Aux tom hoek kaing rheng ju.Ref 5:9-10 Lih 34:6, 7; Si 14:18; Pi 7:9-10.
11 Ang pon kok ceu kaux Simiang Siyiex maix giex going, Ref 5:11 Krub 19:12. mawh kheu pui pa kok ka ceu kaux Siyiex giex going Siyiex tak ang deuh nawh mawh pa ang koe phimap.
12 Doh keud ka singaix twah mai een mawh singaix singax singeh awm lox tawm Simiang Siyiex pex ka pex.Ref 5:12 Lih 16:23-30; 31:12-14.
13 Maix tak yuh kaing jhaw son tix liah ngaix,
14 viang mawh nan, daux ngaix aliah, mawh ngaix twah Simiang Siyiex maix, maix tak ang pon ti yuh kaing tix ceu kawxRef 5:13-14 Lih 23:12; 31:15; 34:21; 35:2; Krub 23:3. maix, khawm kawn simex, kawn bun maix, kawncau simex kawncau bun maix, khawm tobrie maix, mawie, la, nyo sinie maix pa ot daux diang siviex veng maix khankix, kawncau simex, kawncau bun maix khankix tak laux lee ti awm maix.
15 Maix tak doh keud ka hoik sax mawh tix siliex ka daux meung Ejiptux mai Simiang Siyiex pa mawh Siyiex pex viex pex lih khaing tan ka taix pa ting riang mai ka plawng taix pa hoik nih tix, mawh kheu nan Simiang Siyiex pex tawm lox kieh pex priex ka singaix twah.
16 Yungyi ka miex keeing maixRef 5:16 Pi 27:16; Mat 15:4; 19:19; Mak 7:10; 10:19; Luk 18:20; Efe 6:2. awm lox pa hoik tawm Simiang Siyiex maix ka maix, sonsang lang ju maix mai sonsang hu mhawm hoek mhawm pex tau ka daux haktiex pa tawx Simiang Siyiex maix ka maix.Ref 5:16 Efe 6:3.
17 “Maix tak ang pon pah pui yum.Ref 5:17 Jah 9:6; Krub 24:17; Mat 5:21; 19:18; Mak 10:19; Luk 18:20; Ro 13:9; Jas. 2:11.
18 Maix tak ang pon ti lud vao mai moeng kawn pui.Ref 5:18 Krub 20:10; Mat 5:27; 19:18; Mak 10:19; Luk 18:20; Ro 13:9; Jas. 2:11.
19 “Maix tak ang pon ti briex.Ref 5:19 Krub 19:11; Mat 19:18; Mak 10:19; Luk 18:20; Ro 13:9.
20 “Maix tak ang pon ti kham sakse pa ang mawh ang meh ka paox plawg tix.Ref 5:20 Lih 23:1; Mat 19:18; Mak 10:19; Luk 18:20.
21 “Maix tak ang pon ti ghoing ka moeng paox plawg maix mai paw simie ti cie ka nyiex ma paox plawg tix, Ref 5:21 Ro 7:7; 13:9. kaung nawh, kawncau simex, kawncau bun nawh, mawie nawh, la nawh mai kraung tix ceuceu khaing paox plawg maix.
Krax Lhat Pui Hun
(Lih 20:18-26)
22 Gumlox in khankix mawh pa krai Simiang Siyiex ka pui hun khawmuik, piang gawng khaing sigreung ngu, daux paiawm mai ka daux pa faik sigrien sigre, tau mai lox ting sinum mai ang lai baox tidtix. Nawh Cao hoik tiiem piang khlawp simaox ra khlawp mai tawx an ka aux.
Pui Khankix Lhat Graung Ka Siyiex.
23 Yam mhong pex lox pa kaoh khaing sigreung pa faik, yam gleeing ngu ka gawng, hoek ka dex aux, pa mawh cao kaing doeh ru pex mai kwad song khawmuik,
24 mai pex ah nin, jhak heue, Simiang Siyiex ex hoik jhi min plakngai mai pa ting lhaong tix ka ex mai ex hoik mhong lox Nawh Cao khaing daux sigreung ngu, ka daux in sigaix ex hoik yaox pui sikah Siyiex tau kawn im ju.
25 Yam in ex lai sang yum yuh ka mawx lie? Mawh kheu ngu pa ting lhaong in tak gleeing ka ex, phan ex baox mhong ka lox Simiang Siyiex ex tak yum.
26 Mawh kheu kawn pui khankix, pa mhong ka lox sikah Siyiex pa im ju, khaing sigreung ngu, awm mhong ex mai im ju lie?
27 Maix tak hu dex mai nghiet lox krai Simiang Siyiex ex khawmuik mai deeh viex gumlox pa krai Simiang Siyiex ka maix khawmuik mai krai ex mhong mai ex tak nghiet mai hawt ti yuh.Ref 5:22-27 He 12:18-19.
28 Simiang Siyiex hoik mhong lox pex, yam sikah pex ka aux mai Simiang Siyiex ah nin ka aux, Aux hoik mhong ka lox sikah pui in khankix ka maix, lox pa krai kix khawmuik mawh pa khaw.
29 Kieh kix koe rhawm ceu an tix ka daux kix, sonsang lhat graung ka Aux mai priex ti hawt gumlox pingnyap Aux khankix jheung jheung, sonsang pon kix mai khawm kawn praix kix bwanson ceu pa mhawm leeing ju heue.
30 Hu ka kix, Deeh kieh kix ing ka nyiex gox tix.
31 Phan mawh maix cung dex Aux tin, Aux tak krai lox tawm pingnyap mai lox lai beenli mai lox tat jhawm prawng pa sang gau maix ka kix, sonsang hawt yuh kix daux haktiex pa tawx Aux kix cie.
32 Mawh kheu nan, pex tak rien rhawm tix sonsang hawt yuh pex awm gumlox pa hoik tawm Simiang Siyiex ka pex heue. Pex tak ang pon ti veh plak gwiex plak dawm.
33 Pex tak lawng daux krax pa hoik tawm Simiang Siyiex pex ka pex, sonsang im ju pex mai pon bwanson ceu pa mhawm tau mai lang ju ka daux haktiex pa sang pon pex ti cie heue.