6
Lox Tawm Pingnyap Pa Kied Ting
1 In mawh lox tawm pingnyap mai lox lai beenli mai lox tat jhawm prawng pa hoik tawm Simiang Siyiex pex, sonsang gau aux ka pex mai sonsang hawt pex ti yuh daux haktiex pa tiang pex ti hu teei ti cie,
2 sonsang lhat graung pex ka Simiang Siyiex pex mai kawn praix pex kawn saux kawn sex pex, tak priex rien ka lox lai beenli mai lox tawm pingnyap, pa tawm Aux ka pex, daux singaix yam im ju maix, sonsang lang singaix im ju maix.
3 O pui Isarelax khankix nghiet heue, yuh satix mai hawt yuh ceu an khankix mai sonsang hu mhawm hoek mhawm pex tan, sonsang haok hwan ting lhaong pex, awm hoik yuh Simiang Siyiex, Siyiex keeing pex sijax mukheu tau mai pex ka haktiex deeh lih rawm teeih mai rawm hia.
4 O pui Isarelax khankix nghiet heue, Simiang Siyiex, Siyiex ex mawh Siyiex tix kaux khaing, Ref 6:4 Mak 12:29.
5 maix tak moh ka Simiang Siyiex maix khawm rhawm tix tau mai khawm ju tix mai khawm riang rao tix khawmuik.Ref 6:5 Mat 22:37; Mak 12:30; Luk 10:27.
6 Priex lox tawm Aux daux rhawm tix daux in singaix,
7 maix tak coca ti gau kawn praix tix mai maix tak krai yam ngawm maix nyiex tix, yam hu maix krax laux mai yam it yam tum maix mai yam kaoh maix,
8 maix tak vien ti deuh lox ankix awm mhai rug pa koe piang taix maix mai ankix tak mawh pa awm mhai tiiem ti deuh piang dong re tix.
9 Maix tak tiiem ti deuh ankix piang pang siviex nyiex tix mai piang siviex veng khankix.Ref 6:6-9 Pi 11:18-20.
Tawx Satix Ka Pa Ang Cu Nghiet
10 “Yam viex Simiang Siyiex pex, pex laig ka daux haktiex pa hoik tiextu Nawh Cao ka keeing pex Abraham, Ref 6:10 Jah 12:7. IcakRef 6:10 Jah 26:3. mai Yakop, Ref 6:10 Jah 28:13. sonsang tawx Nawh Cao veng pa ting mai pa mhawm grang pa ang maix yaox ti sum,
11 mai nyiex ma pa naog kraung mhawm khankix, pa mawh pa ang pex tie khrawm mai rawm daux pa ang pex kaong, sipeem plix siiet mai khaox sanlun, pa ang maix sum mai maix hoik yaox ti ih tom sak,
12 yuh satix maix son ang maix piawm Simiang Siyiex, pa hoik viex maix lih khaing meung Ejiptux, ka dee yuh maix siliex.
13 Lhat graung ka Simiang Siyiex tix, maix tak yuh kaing jhaw NawhRef 6:13 Mat 4:10; Luk 4:8. mai tiextu tix ka ceu kaux Nawh.
14 Maix paw hawt khaix siyiex tang kaux, pa mawh siyiex pui pa ot vung viang maix,
15 mawh kheu Simiang Siyiex maix, pa ot sinax pex mawh Siyiex pa bak pa viang, mai lhat krax song rhawm Siyiex maix lih piang maix mai yuh maix laux leeing piang haktiex.
16 Ang pon ti cheuk cheu ka Simiang Siyiex tix, Ref 6:16 Mat 4:7; Luk 4:12. awm hoik cheuk cheu maix ka Nawh Cao ka daux Masa.Ref 6:16 Lih 17:1-7.
17 Pex tak coca ti priex ka lox tawm pingnyap Simiang Siyiex, Siyiex pex mai mhai rug Nawh Cao mai lox lai beenli pa hoik tawm Nawh ka pex.
18 Pex tak yuh pa khaw mai pa mhawm, ka plak sivoe ngai Simiang Siyiex, sonsang hu mhawm hoek mhawm pex, sonsang pon pex tix laig mai teei ti cie haktiex pa mhawm, pa hoik tiextu Simiang Siyiex tix tawx ka keeing pex,
19 mai grheu pui koeng pex khankix khaing sivoe ngai pex, awm pa hoik yuh Simiang Siyiex mukheu.
20 Bawg yam pa sang hoek kawn praix pex tak chawk ka pex ah nin, dee bleeh lox kham sakse mai lox lai beenli lox tat jhawm prawng pa hoik tawm Simiang Siyiex ex ka pex mawh tix?
21 Maix tak ah nin ka kawn simex tix, ex hoik mawh siliex Pharaw ka meung Ejiptux mai Simiang Siyiex hoik viex ex lih khaing meung Ejiptux tau mai plawng taix pa ting riang tix,
22 Simiang Siyiex hoik jhi mhai rug pa daox deng ka plak sivoe ngai ex, ka daux pa ting lhaong mai krax pa lang teung ka meung Ejiptux mai ka Pharaw mai ka pui nyiex ma nawh khankix,
23 mai Nawh Cao viex ex lih khaing tan, sonsang viex Nawh ex laig ka daux mai tawx haktiex pa hoik tiextu Nawh ka keeing ex khankix.
24 Simiang Siyiex hoik tawm lox sonsang hawt ex ka lox lai beenli mai lhat graung ka Simiang Siyiex ex, sonsang mhawm ex jheung jheung, sonsang priex Nawh Cao rhawm ex im ju, awm pa yaox ex daux in singaix.
25 Phan ex yuh satix mai hawt yuh awm lox tawm pingnyap ka plak sivoe Simiang Siyiex ex, awm pa hoik tawm Nawh Cao ka ex, an tak mawh pa rahsee ka ex.