4
Mose Tawm Lox Kieh Cu Nghiet
1 “Yam in pui Isarelax eue, nghiet ka lox lai beenli mai lox tat jhawm prawng pa gau aux pex yuh khankix, sonsang im ju pex mai hu laig teei ti cie haktiex pa tawx Simiang Siyiex keeing pex ka pex.
2 Pex tak ang pon baox ka gumlox tawm Aux ka pex mai ang pon ti tieh khaing an, Ref 4:2 Jhi 22:18-19. pex tak priex ka lox tawm pingnyap Simiang Siyiex pex awm pa tawm Aux ka pex.
3 Pex hoik yaox pa yuh Simiang Siyiex ka Balapegurax ka ngai tix, mawh kheu Simiang Siyiex pex hoik yuh pui pa hawt khaix Balapegurax khawmuik laux lak pak leeing khaing sinax pex.Ref 4:3 Si 25:1-9.
4 Pex pa een rhawm ka Simiang Siyiex tix tom kaux cong, hoik yaox ti im ju ku kaux tom in singaix.
5 Aux hoik gau pex ka lox lai beenli mai lox tat jhawm prawng awm pa hoik tawm Simiang Siyiex aux ka aux, sonsang hawt yuh pex awm an ka daux haktiex pa teei pex ti cie.
6 Priex rien mai hawt ti yuh, mawh kheu in tak mawh pingnya mai krax tawng yung son pex ka sivoe ngai pui pa mhong ka lox lai beenli in tak ah nin, ceu pui pa ting haoh hun in, mawh pa koe pingnya mai koe krax tawng tete.
7 Mawh Siyiex mawx pa ot dex ceu pui pa ting haoh hun in awm ot Simiang Siyiex ex dex ex, yam kok yo ex ka Nawh Cao lie?
8 Mawh ceu pui pa ting haoh hun mawx pa koe lox lai beenli mai lox tat jhawm prawng pa rahsee khankix, awm koe lox tat jhawm prawng pa deuh Aux ka sivoe pex daux in singaix lie?
9 Yuh satix pex mai rien rhawm tix, phan ang mawh nan, pex tak piawm ka ceu pa hoik yaox pex ka ngai tix khankix mai ankix tak lih khaing daux rhawm pex, ka daux singaix pa im ju pex, mai kieh kawn praix pex mai kawn saux kawn sex pex tawng ka ceu in khankix,
10 daux singaix cung pex ka plak sivoe Simiang Siyiex pex ka baoh Hawrax, Simiang Siyiex ah nin ka aux, khrawm pui hoek ka Aux mai Aux tak kieh kix mhong ka lox tix, sonsang gau kix ti lhat graung ka Aux yam im ju tix piang haktiex mai sonsang gau kix ka kawn praix tix khankix
11 Pex hoek dex mai cung hawt caong gawng mai ngu gleeing ka gawng tom faik hoek ka sigreung raoma tau mai paiawm pa faik.
12 Simiang Siyiex hoik sikah ka pex khaing daux sigreung ngu, Ref 4:11-12 Lih 19:16-18; He 12:18-19. pex hoik mhong sinum lox sikah khankix, viang mawh nan, pex ang yaox ka riang grang, mai pex mhong ngie lox sinum khaing.
13 Nawh Cao hoik krai lox sijax mukheu pa hoik tawm Nawh Cao ka pex, sonsang hawt yuh pex ka, pa mawh lox pingnyap kao gum, mai Nawh Cao hoik tiem khankix piang khlawp simaox ra khlawp.Ref 4:13 Lih 31:18.
14 Simiang Siyiex hoik tawm lox ka aux yam an, sonsang gau aux pex ka lox lai beenli mai lox tat jhawm prawng, Ref 4:14 Lih 21:1. sonsang hawt yuh pex ka an daux haktiex pa tiang pex ti hu teei ti cie.
Tawx Satix Ka Pa Krub Riang Grang
15 “Yuh satix pex mhawm mhawm. Mawh kheu singaix an pex tak ang yaox riang grang tix ceu kawx, yam sikah Simiang Siyiex ka pex, baoh Hawrax khaing daux sigreung ngu,
16 phan ang mawh nan, lhat pex yuh krax pa lud loe mai yuh riang grangRef 4:16 Lih 20:4; Krub 26:1; Pi 5:8; 27:15. pa hoik saik tix son tokaux tix mai pa koe riang grang tix ceuceu, pa mawh riang grang simex, bun,
17 pa awm riang grang totiag pa koe piang haktiex mai pa awm riang grang sim koe pruik pa po ka raoma,
18 pa awm riang grang pa chix mu tix ceuceu, piang tiex mai pa awm riang grang kax tix ceuceu pa koe daux rawm greem haktiex.
19 Yuh satix tix lhat pex maong ti jhak ka raoma mai yam yaox pex ka singaix, khix, simuing mai kraung khrai raoma khawmuik, pex tak krub mai yuh kaing son an, ka pa gwieh Simiang Siyiex ka kawn pui pa koe greem raoma khawmuik.
20 Simiang Siyiex hoik teei pex lih khaing daux glah ngu rhiem, meung Ejiptux sonsang mawh pex pui cie Nawh CaoRef 4:20 Lih 19:5; Pi 7:6; 14:2; 26:18; Ti 2:14; 1Pe 2:9. awm pa koe pex daux in singaix.
21 Lheu khaing an Simiang Siyiex hoik song rhawm ka aux kheu jao pex mai tiextu sonsang ang aux pon tiang toi rawm klawng Yawdan, mai sonsang ang aux pon laig ka daux haktiex mhawm pa tawx Simiang Siyiex pex mawh sinngao cie pex.Ref 4:21 Si 20:12.
22 Aux tak yum daux haktiex in, aux tak ang yaox ti tiang ka toi rawm klawng Yawdan, viang mawh nan pex tak tiang ka plak an mai teei ti cie ka haktiex mhawm an.
23 Yuh satix tix, son ang pex piawm ka sijax mukheu Simiang Siyiex pex, pa hoik yuh Nawh Cao mai pex mai paw yuh riang grang pa saik tix mai pakpeung riang grang tix ceuceu pa ang Simiang Siyiex cu pex yuh.
24 Mawh kheu Simiang Siyiex pex mawh ngu pa gleeingRef 4:24 He 12:29. mai mawh Siyiex pa bak pa viang.
25 Yam pon pex kawn praix tix mai kawn saux kawn sex tix khankix mai hoik ot ka daux haktiex an tom rheung, phan pex lud loe mai yuh riang grang pa saik ti mawh riang grang tix ceuceu mai baox yuh pa caox caig ka plak sivoe ngai Simiang Siyiex pex, sonsang so Nawh Cao song rhawm,
26 Aux tak kok yo raoma mai haktiex mawh mhai rug sonsang puing ka pex daux in singaix mai pex tak grai grup dom mawx dom an khaing haktiex pa tiang pex plak toi rawm klawng Yawdan, pa pon pex ti cie, pex tak ang yaox ti ot rheung daux haktiex an, viang mawh nan, pex tak laux lak pak leeing.
27 Simiang Siyiex tak kieh pex prung prang rairuat ka sinax ceu pui khankix mai pex tak deuk ka sinax pui tang ceu ceeix khaing ka dee grheu Simiang Siyiex ka pex.
28 Ka dee an pex tak yuh kaing jhaw siyiex pa yuh ka taix tix, pa mawh khaox, simaox, Ref 4:27-28 Pi 28:36. pa ang chix yaox, pa ang chix mhong, pa ang chix ih mai pa ang chix ngheet.
29 Phan pex sawg ti yaox Simiang Siyiex tix baoh an, phan pex sawg Nawh Cao khawm rhawm mai khawm ju tix pex tak yaox ka.Ref 4:29 Ye 29:13.
30 Yam yaox pex krax laux rhawm mai ceu inkix hoek piang pex, ka daux singaix pa sang hoek, pex tak deeh hoek ka Simiang Siyiex tix mai cu nghiet ka lox Nawh Cao,
31 mawh kheu Simiang Siyiex pex, mawh Siyiex pa caux rhawm, Nawh Cao ang tik vud pex mai ang kieh pex laux leeing mai ang piawm sijax mukheu pa tiextu tix ka keeing pex khankix.
32 Mawh kheu nan, yam in chawk pex yaox grawng singaix pa hoik luan, pa hoik koe sivoe pex, jah ka singaix hoik phan Siyiex kawn pui piang haktiex mai chawk khaing caong ma seh, tom hoek ka caong ma laong, hoik sax koe grawng pa ting lhaong awm in phan ang mawh nan, hoik sax mhong pex grawng ceu in lie?
33 Hoik sax mhong pui lox sikah Siyiex khaing daux sigreung ngu, awm hoik mhong pex mai im ju awm pex lie?
34 Mawh siyiex mawx pa hoik coca ti teei ceu pui tix cub khaing daux sinax pui tang ceu tix cub, ka daux pa cheuk cheu ti yuh mhai rug, ka daux pa daox deng, ka daux naing mai ka plawng taix pa ting riang pa nih tix mai ka daux pa lhat graung, awm pa hoik yuh Simiang Siyiex pex son pex, ka daux meung Ejiptux ka plak sivoe ngai pex?
35 Pa jhi Nawh Cao pex yaox khankix mawh sonsang tawng pex Simiang Siyiex mawh Siyiex, lheu khaing Nawh ang lai koe Siyiex tang kaux.Ref 4:35 Mak 12:32.
36 Nawh Cao kieh pex mhong lox tix khaing raoma, sonsang pon sidiex gau ka pex, Nawh Cao hoik jhi pex yaox ngu pa ting lhaong Nawh Cao piang haktiex mai pex hoik mhong lox Nawh Cao khaing daux sigreung ngu.
37 Mawh kheu hoik moh Nawh Cao ka keeing pex mai laug doeh ru pex mai viex pex lih khaing meung Ejiptux ka sivoe ngai tix tau mai pa ting siawp sibrawm Nawh,
38 mai grheu ceu pui pa ting lhaong mai pa ting riang rao khaing pex, ka sivoe pex, sonsang viex pex laig ka daux mai tawx pex cie haktiex kix tom hoek ka daux in singaix,
39 mawh kheu nan kieh pex tawng daux in singaix mai een ka daux rhawm tix, Simiang Siyiex mawh Siyiex pa koe piang raoma mai piang haktiex, ang lai koe Siyiex tang kaux.
40 Pex tak priex lox lai beenli mai lox pingnyap Nawh Cao, pa tawm aux ka pex in singaix, sonsang hu mhawm hoek mhawm pex tau mai kawn praix pex mai kawn saux kawn sex pex, sonsang lang singaix ju pex, daux haktiex pa tawx Simiang Siyiex pex ka pex leeing ju.”
Pui To Plak Lih Singaix
41 Mose gwieh ti deuh veng loe veng ka plak lih singaix rawm klawng Yawdan,
42 sonsang to pui pa pah ka pui tix klawd tan, pa mawh pui pah ka paox plawg tix ka daux pa ang su ti yuh mai pa ang koe krax koeng ka nawh ka bawg yam pa hoik luan mai yam to nawh ti hoek ka veng an tix veng veng, nawh tak im ju.
43 Veng an khankix mawh veng Beza pa koe ka daux tiag, daux lung mawh son pui Rubin, veng Ramok pa koe daux haktiex Gilat mawh son pui Gat mai veng Golan pa koe daux haktiex Bashan mawh son pui Manashe. Pa Kieh Tawng Ka Lox Tat Jhawm Prawng Siyiex..Ref 4:41-43 Yaw 20:8, 9.
44 In mawh lox tat jhawm prawng pa deuh Mose plak sivoe kawn praix Isarelax,
45 in khankix mawh lox kham sakse, ka lox lai beenli mai lox tat jhawm prawng, pa hoik krai Mose ka kawn praix Isarelax yam lih kix khaing meung Ejiptux,
46 plak lih singaix rawm klawng Yawdan ka ngawd see veng Betpegurax, daux haktiex Sihon simiang Amawrix, pa ot veng Heshabon, pa hoik pex Mose mai kawn praix Isarelax yam lih kix khaing meung Ejiptux.
47 Kix teei ti cie haktiex nawh mai haktiex Awgax pa mawh simiang Bashon mai kiex mawh simiang pui Amawrix pa ot ka plak lih singaix rawm klawng Yawdan,
48 jah ka veng Araw pa koe praok rawm klawng Anon tom hoek ka gawng Sirion, pa mawh gawng Heramon,
49 khawm Arabax khawmuik, pa koe plak lih singaix rawm klawng Yawdan, tom hoek ka rawm sigrit sigra Arabax mai caong gawng Pisaga heue.