31
Yawsux Mawh Cao Kaing
1 Khaix an, Mose hu krai gumlox inkix ka ceu pui Isarelax khankix,
2 ah nin, yam in aux hoik koe ju tix yieh tixnga num, aux ang lai pon lih pon laig awm ku bawg sivoe ngai pex, Simiang Siyiex hoik ah nin ka aux, “Maix tak ang pon ti tiang plak toi rawm klawng YawdanRef 31:2 Si 20:12. in, ”
3 Simiang Siyiex pex tak tiang mai thong pex hu toi plak an plak sivoe pex, Nawh Cao tak kieh ceu pui inkix laux leeing, khaing plak sivoe pex mai pex tak teei ti cie haktiex cie kix, tokaux Yawsux tak tiang ti hu plak sivoe pex, awm pa hoik krai Simiang Siyiex ka pex.
4 Simiang Siyiex tak yuh ceu an piang kix, awm pa hoik yuh Nawh Cao piang Sihon mai Awgax, pa mawh simiang haktiex Amawrix mai piang haktiex kix, yam yuh Nawh Cao kix laux leeing.Ref 31:4 Si 21:21-35.
5 Simiang Siyiex tak ap kix ka pex, sonsang yuh pex ka kix, awm gumlox pingnyap pa hoik tawm aux ka pex khawmuik.
6 Teei riang rao tix mai kieh koe rhawm kwa, paw khi rhawm mai paw lhat graung ka kix, Simiang Siyiex pex tak hu tau mai pex, Nawh Cao tak ang prah pex mai ang tik vud pex.
7 Mose kok ka Yawsux ah nin, ka nawh ka plak sivoe ngai ceu pui Isarelax khankix, “Teei riang rao tix mai kieh koe rhawm kwa, mawh kheu maix tak sang yaox ti hu tau mai pui inkix ka daux haktiex pa tiextu Simiang Siyiex ka keeing pex, sonsang tawx Nawh Cao haktiex an ka kix mai kieh kix pon ti cie sinngao an khankix.
8 “Tokaux Simiang Siyiex tak hu ka plak sivoe maix, Nawh Cao tak ot tau mai maix, Nawh Cao tak ang prah maix mai ang tik vud maix, Ref 31:8 Yaw 1:5; He 13:5. paw lhat graung mai paw laux rhawm ka.”
Beenli Pa Caw Tix Phat
9 Mawh kheu nan, Mose tiiem ti deuh gumlox beenli in mai ap ka cao giex kaing li, pa mawh kawn simex ceu pui Lewix khankix, pa teei beeh glawm tix klawm teug bwan gumlox sijax mukheu Simiang Siyiex mai ka kwad song ceu pui Isarelax khankix.
10 Mose tawm lox ah nin, “Yam hoik naog aliah numRef 31:10 Pi 15:12. daux num pa hoik tat ti deuh, sonsang ploi pex luad luan yam hoik hoek bawg yam yuh pex pawie nyiex gox bang khankix, Ref 31:10 Pi 16:13-15.
11 yam hoek bleeh ceu pui Isarelax plak sivoe Simiang Siyiex pex ka dah dee pa hoik laug Nawh Cao ti deuh, pex tak phat gumlox beenli inkix plak sivoe ceu pui Isarelax khankix, sonsang mhong kix ka.
12 Khrawm pui khankix tau, simex, bun, kawn nyawm mai nyo sinie pa ot ka daux veng pex khankix, sonsang pon kix tix mhong mai sonsang gau kix tix chix koe krax lhat graung ka Simiang Siyiex pex mai sonsang priex hawt ti yuh, awm gumlox pa koe ka daux lox lai beenli in khawmuik,
13 sonsang mhong kawn nyawm pa ang nyang sax tawng khankix mai sonsang hoek gau kix tix koe krax lhat graung ka Simiang Siyiex, glang yam kawn im ju pex daux haktiex pa sang tiang pex ti hu, plak toi rawm klawng Yawdan, pa sang teei pex ti cie khankix.
Lox Ghoik Krai Siyiex Ka Mose
14 Simiang Siyiex deeh ah nin ka Mose, “Jhak heue, singaix sang yum maix hoik dex, kok Yawsux hoek tau mai daux nyiex gox bwan man bang kum pui hun, sonsang tawx aux beeh glawm ka nawh.” Mawh kheu nan, Mose mai Yawsux laig daux nyiex gox bwan man bang kum pui hun tau tan,
15 Simiang Siyiex lih bleeh ka daux rong paiawm, hawt nyiex gox bwan man mai rong paiawm an ot piang diang siviex nyiex gox bwan man.
16 Simiang Siyiex ah nin ka Mose, “Jhak heue, maix tak yaox ti laig it tau mai keeing maix khankix, pui inkix tak yaog ti kaoh hu yuh pa lud tau mai siyiex tang meung khankix, daux haktiex pa sang hu pex ti ot daux sinax kix mai kix tak tik vud Aux mai yuh gumlox sijax mukheu Aux laux leeing ka pa hoik yuh Aux tau mai kix.
17 Krax song rhawm Aux lih piang kix daux singaix an mai Aux tak tik vud kix mai mox pakngai tix khaing kix mai kix tak hoek krax laux leeing, pa caox caig mai pa kha rhawm, tak hoek piang kix mai kix tak ah nin daux singaix an, “Mawh kheu ang Siyiex ex lai koe ka daux sinax ex, ceu pa caox caig inkix tom hoek piang ex ang mawh lie?”
18 Kheu ceu pa caox caig pa hoik yuh kix grawng pa hoik veeh ti hu ka siyiex tang kaux khankix Aux tak mox pakngai tix daux ngaix an tete.
19 Yam in tiiem ti deuh lai rhax in son pex mai gau kawn praix Isarelax khankix, kieh kix pon rhax glip ngai, sonsang mawh lai rhax in mhai rug son Aux, ka sinax kawn praix ceu pui Isarelax khankix.
20 Yam hoik viex Aux kix hoek ka daux haktiex dee lih rawm teeih mai rawm hia, pa hoik tiextu Aux ka keeing kix mai khaix hoik ih kix ceu an tom sak mai kluing ka, khaix an kix tak veeh ti hu ka siyiex tang kaux mai hawt ti yuh kaing jhaw kix mai kix tak map ka Aux mai thiang ti tik ka gumlox sijax mukheu Aux.
21 Yam lih ceu pa cao caig mai pa kha rhawm tom nie piang kix, lai rhax in tak mawh jhi mhai rug ka kix, tak ang yaox ti piawm khaing daux jheeh doeh ru kawn praix pex, yam in Aux tawng krax keud kix, sivoe ang Aux nyang viex kix hoek ka daux haktiex pa hoik tiextu Aux ti tawx ka kix.
22 Mawh kheu nan, Mose hoik tiiem ti deuh lai rhax in, ka daux singaix an mai gau pui Isarelax khankix ka.
23 Nawh Cao tawx lox ka Yawsux kawn simex Nun ah nin, Ref 31:23 Si 27:23. “Teei riang rao tix mai kieh koe rhawm kwa, Ref 31:23 Si 27:23. mawh kheu maix tak yaox ti viex ceu pui Isarelax khankix laig ka daux haktiex pa hoik tiextu Aux ka kix mai Aux tak ot tau mai maix.
24 Yam an Mose tiiem gumlox beenli in tom grum naog ka daux phuk lai tix pheen tom hoik.
25 Mose tawx lox ka ceu pui Lewix khankix, pa sang klawm ka teug bwan sijax mukheu Simiang Siyiex mai nawh ah nin ka kix.
26 “Teei phuk lai been in mai deuh praok teug bwan sijax mukheu Simiang Siyiex, sonsang mawh mhai rug ka son pex.”
27 “Mawh kheu tawng aux pex koe rhawm pa tieh feen mai grawng pa kiien ngawg pex, glang yam kawn im ju Aux tau mai pex, daux in singaix, pex hoik tieh feen ka Simiang Siyiex, khaix hoik yum aux pex tak sang baox nie yuh miex ding?”
28 Khrawm kwad song, dohdoe pex mai cao kaing pex khankix hoek ka aux, sonsang krai aux kix mhong gumlox in khankix mai kok raoma mai haktiex mawh mhai rug ka daux sinax kix.
29 Grawh grawng nawh khaix yum aux sax, aux tawng grawng sang tieh feen pex mai veeh ti khaing daux krax pa hoik tawm aux ka pex mai kieh pa kha rhawm hoek piang pex khaix singaix in, jao yuh pa caox caig plak sivoe ngai Simiang Siyiex, sonsang nie kieh pex krax pa song rhawm Nawh Cao koe daux kaing pa yuh pex ka taix ti khankix.
30 Lai rhax pa krai Mose ka ceu pui Isarelax khankix mhong, tom grum tom naog ah nin.