1 Raoma eue, veeh yhaok tix nghiet mai aux sang krai, Haktiex eue, nghiet gumlox pa kaoh khaing daux jheeh aux, 2 Kieh lox pa sidiex gau aux lih awm rawm lhiex mai kieh gumlox aux, jauh lih awm rawm ciex mai jauh awm rawm lhiex piang khaox pa awn mai lih awm lhiex poe piang rib riem. 3 Mawh kheu aux krai pao min ceu kaux Simiang Siyiex mai aux yaogyaw krax pa ting lhaong Siyiex, 4 Nawh Cao mawh rang ting, kaing jhaw Nawh Cao mawh pa grum pa naog, daux krax Nawh Cao mawh pa khaw caw mai mawh Siyiex pa mawh meh mai pa ang koe krax lud, Nawh Cao mawh pa rahsee mai pa kaux sijax. 5 Kix hoik yuh pa caox caig ka Nawh, mawh kheu koe krax pa lud kix mai kix mawh doeh ru pa tieh feen mai ang kaux sijax. 6 Pui pa daox aw pa ang koe pingnya khankix eue, mawh sang deeh pawk maix bwanson ka Simiang Siyiex yuh nin lie? Nawh Cao mawh keeing pa hoik kieh pex koe ang mawh lie? Nawh Cao hoik mawh pa phan pa deuh pex mai pa deuh pex kaux cong ang mawh lie? 7 Deeh doh keud ka singaix pa hoik luan mai deeh keud tix yaox num pa hoik luan, chawk tix yaox keeing maix mai nawh tak jhi maix yaox, chawk tix yaox kwad song khankix mai kix tak krai ka maix, 8 yam jah Siyiex dee pa kied ting lhaong tix gwieh sinngao ka ceu pui khankix, pa mawh doeh ru Adam khankix, Nawh Cao tat ti deuh mee haktiex ka son ceu pui khankix, awm diag koe pui Isarelax khankix. 9 Grawh grawng nawh son nyum cie Simiang Siyiex mawh ceu pui Nawh Cao khankix mai Yakop hoik mawh sinngao Nawh Cao. 10 Nawh Cao hoik yaox nawh daux haktiex dee yiien, dee riag yo totiag khankix, Nawh Cao hoik vie hoik lawm nawh mai priex rien ka nawh mai kia ngiien ka nawh awm kawn ngai tix. 11 Awm kraix klang mheem tix mai di pruik tix piang kawn tix mai priex kix mai viex kix hu piang pruik tix. 12 Mawh Simiang Siyiex tix kaux khaing pa thong bung Yakop hu mai siyiex tang dah tang meung khankix ang lai ot tau mai nawh. 13 Nawh Cao kieh nawh brug ti ot ka dah dee pa kied ting lhaong haktiex mai nawh tak pon ti ih can ceu pa lih khaing daux tong kaung nawh khankix, Nawh Cao tak kieh nawh teei rawm hia khaing daux rang mai rawm bee khaing daux rang. 14 Klon bee rawm teeih mawie mai rawm teeih yung mai khlawp bee kawn yung mai kawn yung mhaing pa keh khaing tobrie Bashan mai pex mhaing, khawm nghox ca ceu pa mhawm pa hoik laug ti deuh maix tak yaox ti nyaux rawm plix siiet, khaing plix siiet khankix. 15 Viang mawh nan, Yeshurun baox nie kluing nie bee mai deeh tiied ka caong ti, khaix nie kluing nie plang kaux hak nawh, klon bee hoik kheem piang nawh, khaix an nawh tik vud ka Siyiex, pa phan deuh nawh mai nunai ka rang ting pa mawh krax taoh nawh. 16 Kix hoik yuh ti kieh Nawh Cao song rhawm kheu krub siyiex tang kaux, ceu pa seeing brai yuh kix, hoik so krax pa song rhawm Nawh Cao. 17 Kix hoik tan ka phicaox pa ang mawh siyiexRef 32:17 1Kaw 10:20. mai ka siyiex pa ang kix sax tawng khankix mai ka siyiex ang keeing kix sax koe krax lhat graung ka. 18 Maix hoik piawm ka rang ting dee keh kung maix khaing maix ang lai doh keud ka Siyiex pa mawh keeing maix. 19 Yam hoik yaox Simiang Siyiex an, Nawh Cao song rhawm ka kix mai tik vud ka kawn simex kawn bun Nawh Cao khankix. 20 Nawh Cao ah nin, “Aux tak mox pakngai tix khaing kix mai jhak tix yaox dee sidah ceu pa sang lih mawh kix, mawh kheu kix mawh doeh ru pa kiien rhawm mai ang kaux sijax. 21 Kix hoik so krax pa song rhawm Aux lih, Ref 32:21 1Kaw 10:22. ka ceu pa ang mawh siyiex. Kix hoik kieh krax pa song rhawm Aux lih kheu pa caox caig pa yuh kix ka riang grang ceu pa giex going, mawh kheu nan, Aux tak deeh teei pui pa ang koe cee koe cak kieh yuh kix laux rhawm ka mai teei pui pa ang koe pingnya cuyi kieh yuh kix koe krax pa song rhawm ka.Ref 32:21 Ro 10:19. 22 Mawh kheu krax pa song rhawm Aux hoik lih rup awm ngu mai an tak gleeing, tom hoek dee pa kied raux meung yum mai an tak gleeing haktiex laux leeing, tau mai plix khaox plix ox pa koe daux haktiex, tom hoek ka caong gawng. 23 Aux tak pum krax pa laux leeing piang kix mai puing te ak tix piang kix khawmuik. 24 Kix tak krawx rao kheu cai rhawm mai laux leeing ka jhawm saux mai hoek ka daux pa kied laux leeing, Aux tak ploi rhang totiag hoek ka kix, tau mai jai siuing piang haktiex ot kix. 25 Plak praix tak mawh lawm vaig, plak daux tak mawh krax pa lhat graung, son nyawm sinaw mai bun krih, son kawn nyawm pa kawn peuex mai son pui pa hoik paing hauk kaing khankix tak kieh laux leeing khawmuik. 26 “Aux tak sang kieh kix prung prang rairuat mai Aux tak yuh krax pa ang pui lai doh keud ka kix, sonsang grai min ceu kaux kix khaing daux sinax pui khankix.” 27 Aux ang lhat ka krax pa song rhawm pui pa koeng Aux khankix, phan ang mawh nan pui koeng khankix tak koe krax pa yaw rangdi ka tokaux tix, phan ang mawh nan kix tak ah nin, “Riang rao khawn taix yix mawh pa ting lhaong mai inkix ang mawh Simiang Siyiex, pa hoik yuh inkix khawmuik.” 28 Mawh kheu kix mawh ceu pui pa ang koe krax keud mai pa ang koe krax tawng ceeix kawx. 29 Kieh kix mawh pa koe pingnya cuyi mai tawng ka ceu inkix, sonsang pon keut gau kix dee sidah tix khaix in sax. 30 Pui tix kaux sang pon pheet ka pui tix rheng yuh ka mawx? mai pui ra kaux sang pon kieh pui tix mheen to yuh ka mawx? Phan rang ting kix ang coh ti tawx ka kix mai phan Simiang Siyiex ang ap kix, ceu an tak lih koe yuh ka mawx? 31 Mawh kheu rang ting kix, ang awm rang ting cie ex, pui koeng ex khankix kawx, tokaux cao kix, tak pon krax prawng ca. 32 Mawh kheu nhu plix siiet kix, mawh simie plix siiet Sawdom mai mawh pa kuah daux haktiex Gawmawrax, plix siiet kix mawh pa song awm ghin, sigleem plix siiet kix mawh pa kied song tete. 33 Rawm plix siiet kix mawh pa koe jai siyawng mai jai siuing pa kied caox khankix. 34 In mawh pa priex ti deuh tau mai Aux mai mawh pa hoik tawk ti deuh cum ka daux krao sinngao cie Aux ang mawh lie? 35 Pa pawk bix mai pa deeh plud khankix mawh cie Aux, Ref 32:35 Ro 12:19; He 10:30. caong kix tak cang klad yam hoek bawg yam. Mawh kheu singaix pa sang laux leeing kix hoik dex mai can pa sang hoek khankix, hoik mawh pa kied phai son kix. 36 Mawh kheu Simiang Siyiex tak prawng ca ka ceu pui Nawh Cao mai koe krax caux rhawm piang siliex Nawh Cao khankix. Yam yaox Nawh Cao ka hoik grai siawp sibrawm kix mai ang lai koe pa pon luan khaing pa phyawk pa laung tix kaux kawx. 37 Nawh Cao tak ah nin, “Siyiex krub kix koe dee mawx mai rang ting pa sawk kix tix peung koe dee mawh?” 38 Pui mawx pa hoik ih ka pa appong kix mai pa hoik nyaux ka rawm plix siiet krax tan pa nyaux kix ot dee mawx? Kieh kix yaog ti kaoh mai teem ka pex mai kieh mawh dee peung pex. 39 “Jhak ka krax pa mawh Aux, lheu khaing Aux, Siyiex tang kaux ang lai koe, Aux pah ju mai Aux deeh kieh im ju, Aux tawx krax mat mai Aux deeh pai moi, pui pa pon ti taoh glawd khaing daux tawm taix Aux ang koe tix kaux kawx. 40 Aux yaog taix ti piang raoma mai tiextu ah nin, “Aux mawh pa im ju leeing ju. 41 Aux tak klaing vaig tix plang, taix Aux tak giex ka krax prawng krax ciyang, Aux tak deeh pawk bix tix, ka pui pa koeng Aux khankix mai deeh viied ka can pui pa koeng ka Aux. 42 Aux tak kieh te ak Aux khankix yoek ka nham mai vaig lawm Aux ih nex tau mai nham pa hoik pah tix mai ka pui pa giex laung Aux khankix, tom hoek ka kaing cao kaing pui pa koeng Aux khankix. 43 Ceu pui tang ceu khankix eue, gaux rhawm tau mai ceu pui Nawh Cao, Ref 32:43 Ro 15:10. grawh grawng nawh, Nawh Cao tak deeh pawk bix tix ka son nham siliex tix khankixRef 32:43 Jhi 19:2. mai Nawh tak deeh prawng ca ka pui koeng pui khoi Nawh Cao khankix, Nawh Cao tak sigrhah pa seeing brai, khaing haktiex Nawh Cao mai khaing ceu pui Nawh Cao.” 44 Mawh kheu nan, Mose hoek tau mai Yawsux kawn simex Nun mai krai lox lai rhax in sonsang mhong pui khankix. 45 Khaix hoik krai Mose gumlox in ka ceu pui Isarelax khankix, 46 Nawh baox ah nin ka kix, “Gumlox pa hoik kham Aux mhai rug ka sinax pex daux in singaix, een ka rhawm pex mai tawm kawn praix tix, sonsang priex kix ti yuh, awm lox pa krai aux pa koe ka daux lox lai beenli khawmuik. 47 Mawh kheu ankix, ang mawh ceu pa giex going ka son pex, mawh pa dex dawd mai ju pex, gumlox in tak kieh singaix im ju pex lang daux haktiex pa sang tiang pex plak toi rawm klawng Yawdan mai pon pex ti cie heue.”

48 Ka daux singaix an Simiang Siyiex krai ah nin ka Mose. 49 “Haok ka gawng Abarim piang choek gawng Nebo, pa koe ka daux haktiex Mawbax see veng Yerikho mai simi tix yaox ka meung Khanan, pa tawx Aux ka kawn praix Isarelax awm pa sang pon kix tix cie, 50 maix tak yum piang gawng pa hoik haok maix mai mawh pa deeh khrawm ti ka dee ot pui ceu maix khankix, awm hoik yum puxke maix Arun piang gawng Hawrax mai nawh hoik mawh pa deeh khrawm ti dee ot pui ceu nawh khankix. 51 Mawh kheu hoik lud maix ka Aux, sinax kawn praix Isarelax khankix, hawt dee lih rawm Meribax, ka yaong Kadesha, daux tiag Zina. Mawh kheu ang maix nab yam ka Aux, ka daux sinax pui Isarelax. 52 Viang maix yaox haktiex pa ah Aux ti sang tawx ka pui Isarelax khankix ka ngai tix kawx, maix tak ang yaox ti laig ka daux haktiex an heue.”Ref 32:48-52 Si 27:12-14; Pi 3:23-27.