30
Pon Bwanson Yam Deeh Hoek Siyiex
1 Yam hoek ceu inkix piang maix, can krax pa nawb bwanson mai pa jhax lawg, pa hoik deuh aux plak sivoe maix, maix tak deeh keud ceu an khankix daux sinax ceu pui khankix, ka dee pa grheu Simiang Siyiex maix lih hu,
2 phan maix mai kawn praix maix, deeh hoek ka Simiang Siyiex maix mai cu nghiet ka lox Nawh Cao, khawm rhawm tix mai khawm ju tix khawmuik, awm lox pa tawm aux ka maix daux in singaix,
3 mai Simiang Siyiex tak deeh viex maix ing khaing krax pa giex laung mai Nawh Cao tak koe krax caux rhawm piang maix mai deeh khrawm maix khaing ceu pui khawmuik, dee pa hoik kieh Simiang Siyiex pex prung prang rairuat.
4 Phan pui maix tix kaux kaux mawh pa hoik grheu ti tik ka dee pa kied singai khaing greem raoma, Simiang Siyiex maix tak deeh khrawm maix hoek khaing tan,
5 Siyiex maix tak deeh viex maix hoek ka haktiex pa hoik tawx Nawh Cao keeing maix cie, mai maix tak sang pon ti cie ankix. Nawh Cao tak kieh maix haok hwan mai kieh maix baox nie lheu pre haoh hun khaing keeing maix.
6 Simiang Siyiex maix tak pat hak rhawm maix mai khawm hak rhawm doeh ru maix, sonsang moh maix ka Simiang Siyiex tix khawm rhawm tix mai khawm ju tix khawmuik sonsang pon maix ti im ju.
7 Simiang Siyiex maix, tak deuh pa jhax lawg inkix khawmuik piang pui koeng maix khankix mai piang pui pa koeng ka maix mai piang pui pa tuktiak ka maix khankix.
8 Maix tak cu nghiet ka lox Siyiex mai hawt yuh awm gumlox pingnyap Nawh Cao khawmuik, ka pa tawm aux ka maix daux in singaix.
9 Phan maix koe krax cu nghiet ka lox Simiang Siyiex tix mai priex ti hawt gumlox tawm pingnyap Nawh Cao mai beenli pa deuh Nawh Cao khankix mai lox tat jhawm prawng pa hoik tiiem ti ka daux phuk lai in mai phan maix deeh veeh ti ing ka Simiang Siyiex tix, khawm rhawm tix mai khawm ju tix khawmuik,
10 Simiang Siyiex maix, tak kieh maix nie baox haok hwan, daux kaing pa yuh maix ka taix tix khawmuik mai kawn praix maix mai tobrie eei maix khankix, khawm plix nghox plix koi pa lih khaing daux haktiex maix, son ceu pa mhawm khankix, mawh kheu Simiang Siyiex tak deeh koe krax khaw rhawm ka maix mai nawb bwan piang maix, awm hoik koe krax khaw rhawm Nawh Cao piang keeing maix khankix heue.
Laug Krax Im Ju Mai Krax Yum
11 Gumlox pingnyap pa tawm aux ka maix daux in singaix, ang mawh ceu pa nu son maix mai ang mawh pa koe dee singai khaing maix.
12 Ankix mawh pa ang koe piang raoma, sonsang ah maix nin. “Pui mawx sang haok piang raoma mai deeh viex ceu an lih ka son ex, sonsang pon ex ti mhong mai hawt ti yuh ceu ankix?”
13 Ceu ankix mawh pa ang koe ka plak toi rhawm sigrit sigra, sonsang ah maix nin, “Pui mawx pa sang tiang hu ka plak toi rhawm sigrit sigra mai deeh viex ceu ankix hoek ka son ex, sonsang pon ex ti mhong mai hawt ti yuh ceu ankix?”
14 Gumlox in mawh pa kied dex hawt maix mai mawh pa koe daux jheeh maix, khawm daux rhawm maix, sonsang pon maix ti hawt yuh ankix.Ref 30:12-14 Ro 10:6-8.
15 “Jhak heue, aux hoik deuh krax im ju mai pa mhawm, krax yum mai pa caox caig plak sivoe maix daux in singaix,
16 Aux tawm maix moh ka Siyiex tix, sonsang hawt maix grawng, lawng khaix Nawh Cao mai sonsang priex rien maix ti hawt gumlox pingnyap Nawh Cao mai gumlox beenli pa deuh Nawh Cao khankix mai lox tat jhawm prawng Nawh Cao, sonsang pon maix ti im ju mai baox nie pre haoh hun, Simiang Siyiex maix tak nawb bwan ka maix, daux haktiex pa sang hu teei maix ti cie.
17 Viang mawh nan, phan rhawm maix veeh ti hu singai mai ang nghiet lox Nawh Cao mai tieh ti hu krub ka siyiex tang kaux mai hawt ti yuh kaing jhaw kix,
18 Aux krai pao sidawng ka maix daux in singaix maix tak sang grai grup tete maix tak ang lang ju daux haktiex pa sang tiang maix plak toi rawm klawng Yawdan, sonsang laig maix teei ti cie an.
19 Aux kok yo raoma mai haktiex kham sakse son maix daux in singaix, Aux hoik deuh krax im ju mai krax yum, krax nawb bwan mai krax pa jhax lawg khankix plak sivoe maix, mawh kheu nan, laug maix teei krax im ju, sonsang pon maix ti im ju khawm doeh ru maix khankix,
20 sonsang moh maix ka Simiang Siyiex tix, sonsang cu nghiet ka lox Nawh Cao, sonsang een maix rhawm tix ot dex Nawh Cao, mawh kheu Nawh Cao mawh krax im ju maix mai krax lang ju maix, sonsang pon maix ti ot daux haktiex pa tiextu Simiang Siyiex tix tawx ka keeing maix Abraham, Ref 30:20 Jah 12:7. IcakRef 30:20 Jah 26:3. mai YakopRef 30:20 Jah 26:3. heue.