1 Inkix mawh gumlox sijax mukheu pa hoik tawm Simiang Siyiex ka Mose, sonsang yuh inkix tau mai ceu pui Isarelax khankix, daux haktiex Mawbax, pa lheu khaing gumlox sijax mukheu pa hoik yuh Nawh Cao tau mai kix ka daux baoh haktiex Hawrax. 2 Mose kok ka ceu pui Isarelax khankix hoek ah nin. “Pex hoik yaox ceu pa hoik yuh Simiang Siyiex ka plak sivoe ngai pex khawmuik, ka daux meung Ejiptux ka Pharaw mai ka kawncau mau soi nawh khankix mai ka haktiex nawh khankix, ” 3 grawng pa cheuk cheu pa hoik yaox pex ka ngai tix mai mhai rug pa daox deng, pa ting lhaong ankix. 4 Viang mawh nan, Simiang Siyiex ang nyang tawx pa chix keud sawn daux rhawm pex mai pa chix yaox ka ngai tix mai pa chix mhong ka yhaok tix khankix tom hoek daux in singaix. 5 Aux hoik thong pex hu daux tiag tixpon num, kraung ceep pex ang nyang griah khaing pex mai kiep pex kawx ang nyang laux khaing pex, 6 pex ang yaox ti ih blah mai ang yaox ti nyaux rawm plix siiet mai plai, sonsang tawng pex mawh Aux Simiang Siyiex pex. 7 Yam hoik hoek pex dah dee in, Sihon simiang haktiex HeshabonRef 29:7 Si 21:21-30. mai Awgax simiang haktiex Bashan khankix hoek ti puing ka ex daux bang naing mai ex hoik pex ka kix, 8 Ex hoik teei haktiex kix mai hoik tawx ka ceu pui Rubin mai ceu pui Gat mai ceu pui ManasheRef 29:8 Si 32:33. tix plak mawh sinngao son kix. 9 Mawh kheu nan, priex ti hawt gumlox sijax mukheu in khankix mai hawt ti yuh, sonsang pon pex tix haok hwan ka daux krax pa sang yuh pex kuceu. 10 Daux in singaix pex khawmuik hoik cung ka plak sivoe Simiang Siyiex pex, jah ka cao thong pex mai cao kaing doeh ru pex khankix mai kuad riex ju khawm cao pa kwang pex mai cub kawn simex ceu pui Isarelax khankix, 11 mai kawn pex, moeng pex mai nyo sinie pa ot ka daux bang pex, khawm pui kid khix pex, tom hoek ka pui pa kin rawm pex khankix, 12 sonsang pon pex tix laig ka daux been gumlox sijax mukheu tau mai Simiang Siyiex pex mai daux krax pa tiextu Nawh Cao khankix, pa yuh Simiang Siyiex pex tau mai pex daux in singaix, 13 mai Nawh Cao hoik yaog ti deuh maix mawh ceu pui tix cub son cao tix daux in singaix mai Nawh Cao mawh Siyiex maix awm pa hoik krai Nawh Cao ka pex mai krax pa hoik tiextu Nawh Cao ka keeing pex Abraham, Icak mai Yakop khankix. 14 Aux ang joeng yuh gumlox sijax mukheu in mai krax pa tiextu in tau mai pex khaing. 15 Aux hoik yuh tau mai can kix pa cung tin tau mai ex ka daux in ngaix, ka plak sivoe Simiang Siyiex ex, khawm kix pa ang ot tau mai ex ka daux in singaix. 16 Pex hoik tawng ka ot ex daux meung Ejiptux mai ex hoik lih khaing sinax pui tang ceu pa hoik yaox ex nawh, yam hoik tiang ex ti hu, 17 mai pex hoik yaox ka ceu pa seeing pa koe daux sinax kix, pa mawh khaox, simaox khankix mai mau khri khankix, 18 mai khi rhawm ka daux sinax pex, simex, bun mai kawn nyiex ma pex ka daux doeh ru pex khankix, pa tang tiah rhawm tix singai khaing Simiang Siyiex pex daux in singaix mai pa sang hu yuh kaing jhaw siyiex pui tang ceu khankix mai lhat riah khaox ghin pa song lih kuah ka daux sinax pex, Ref 29:18 He 12:15. 19 yam mhong nawh ka lox pa jhax lawg in, nawh tang nawb bwanson ka tokaux cao tix daux rhawm tix ah nin, aux koe pa nhim, viang aux yuh alo tix, awm pon cao pa yoek ka plai tix viex ka daux sinax pui pa twah plai khankix. 20 Simiang Siyiex tak ang pluat ploi ka nawh, krax song rhawm Simiang Siyiex mai krax pa bak pa viang Nawh Cao, tak lih awm taox ngu piang pui an mai pa jhax lawg kuceu pa hoik tiiem ti ka daux phuk lai in, tak koe ka piang nawh, mai Simiang Siyiex tak preet ti tik ceukau nawh khaing greem raoma. 21 Simiang Siyiex tak gwieh nawh khaing doeh ru ceu pui Isarelax khankix, sonsang kham geu phimap, awm pa jhax lawg pa koe ka daux gumlox sijax mukheu in khankix, pa hoik tiiem ti ka daux phuk lai beenli in, 22 doeh ru kawn praix maix, pa yaog ti kaoh khaix maix khankix mai pui tang meung pa hoek khaing daux haktiex dee singai khankix, yam yaox kix jhawm saux preng daux haktiex an mai jhawm saux pa hoik deuh Simiang Siyiex ka pui ankix. 23 Ka daux haktiex khawmuik hoik kieh mawh dee koe mhat mai khaix hax ngu, ang koe pa pon sum plix simie nghox koi mai ang koe plix koe tai mai ang koe rib riem pa kuah baoh tan tix ceu kawx, awm pluk pliak Simiang Siyiex ti tik ka veng Sawdom mai veng Gawmawrax, Ref 29:23 Jah 19:24-25. veng Adama mai veng Zibo-im ka daux pa song rhawm tix mai pa meet rhawm tix. 24 Can ceu pui khankix tak ah nin, “Simiang Siyiex hoik yuh ceu inkix ka haktiex in, kheu jao patix lie? Krax pa hax krax song rhawm ting in mawh pa koe dee bleeh yuh ka mawx lie?” 25 Pui khankix ah nin. “Mawh kheu hoik tik vud kix ka gumlox sijax mukheu Simiang Siyiex keeing kix, pa hoik yuh Nawh Cao tau mai kix, yam hoik viex Nawh Cao kix lih khaing meung Ejiptux. 26 Mawh kheu kix hoik yuh kaing jhaw siyiex tang kaux mai hu krub ka siyiex pa ang kix tawng mai pa ang Nawh Cao sax tawx ka kix. 27 Mawh kheu nan, krax song rhawm Simiang Siyiex, hoik yaog ti lih ka daux haktiex in mai kieh Nawh Cao pa jhax lawg kuceu, pa hoik tiiem ti deuh daux phuk lai in lih hoek piang haktiex an kix. 28 Simiang Siyiex hoik reeig ti tik kix khaing daux haktiex kix, ka daux krax pa song rhawm mai daux pa meet rhawm tix mai daux pa kied song rhawm tix mai teei ti tik kix ka daux haktiex tang dah, awm pa koe an daux in singaix. 29 Can kaing pa glip khankix mawh pa dex mai Simiang Siyiex ex mai ceu an khankix pa deeh plak jhi kieh sidawng hoik mawh pa dex ka ex mai ka kawn praix ex leeing ju, sonsang pon yuh ex awm gumlox beenli in khawmuik heue.