1 Phan maix priex rhawm tix nghiet ka lox Simiang Siyiex tix mhawm mhawm mai hawt yuh awm gumlox pingnyap Nawh Cao khawmuik, awm pa tawm aux ka maix daux in singaix, Simiang Siyiex maix tak deuh maix lhaong khaing ceu pui khawmuik ka piang ca haktiex in. 2 Phan maix cu nghiet ka lox Simiang Siyiex maix, bwanson inkix khawmuik tak lih hoek piang maix mai hawt khaix maix, 3 maix ot daux veng, daux yaong ka tak pon bwanson ot ka daux kaung daux ma ka tak pon bwanson. 4 Kawn praix tokaux maix mai can ceu plix pa lih khaing daux haktiex maix mai cub tobrie maix khankix, pa mawh kawn mawie mai kawn yung maix khankix, tak pon bwanson pa pre haoh hun, 5 ka daux khrawng maix mai ka daux tawg klong ku klao maix blah khankix kawx, tak mawh pa pon bwanson. 6 Yam laig maix ka daux nyiex tix maix ka pon bwanson mai yam lih maix khaing nyiex tix kawx maix ka pon bwanson. 7 Simiang Siyiex tak kieh pui koeng maix, pa yaog tix tieh feen ka maix khankix, mawh pa som nai khaing sivoe ngai maix, kix lih hoek puing maix ka daux krax tix nyaing mai kix tak yaox ti to daux krax aliah nyaing ka plak sivoe maix. 8 Simiang Siyiex tak nawb bwanson hoek piang maix, ka daux krao pa priex maix kraung khrai tix mai ka can pa yuh maix ka taix ti khawmuik. Nawh Cao tak nawb bwanson piang maix, daux haktiex pa sang tawx Simiang Siyiex pex ka maix. 9 Phan maix priex ti hawt gumlox pingnyap Simiang Siyiex maix khankix mai phan hawt hu ka daux krax Cao Simiang Siyiex, tak deuh maix mawh pui pa singax ka son tix, awm pa hoik tiextu Nawh Cao ka maix. 10 Khaix an pui haktiex khawmuik tak yaox ka mawh maix pa hoik kok tix ka daux ceu kaux Simiang Siyiex mai kix tak koe krax lhat graung ka maix. 11 Simiang Siyiex tak sang tawx maix magmi tom nie mai kawn prai maix mai tobrie eei maix khankix mai plix khaox plix ox pa lih khaing haktiex maix, daux haktiex pa hoik tiextu Simiang Siyiex ka keeing maix, son pa sang tawx ka maix. 12 Simiang Siyiex tak paoh krao raoma khaing dee priex Nawh Cao kraung khrai ceu pa mhawm, sonsang tawx Nawh Cao rawm lhiex lih ka piang tiex maix, ka daux bawg yam praix klawng an khankix mai nawb bwan piang kaing jhaw pa yuh maix ka taix tix. Maix tak pon ti tawx ceuk rom ka ceu pui tom nie, viang mawh nan maix tak ang pon ti ceuk ka kix. 13 Phan maix koe krax cu nghiet ka gumlox pingnyap Simiang Siyiex maix, ka pa tawm aux ka maix daux in singaix mai phan maix priex rhawm tix hawt yuh ka ceu an khankix, Simiang Siyiex tak kieh maix mawh kaing ang kieh maix mawh sidax maix tak ot ka piang mai ang ot ka greem. 14 Mawh kheu nan maix tak ang pon veeh ti khaing lox pa tawm aux khankix ka maix, ka daux in singaix, ka plak khawn gwiex, khawn dawm mai hu hawt khaix siyiex tang kaux mai yuh kaing jhaw kix heue.Ref 28:1-14 Pi 11:13-17.

15 Viang mawh nan, phan maix ang cu ang nghiet ka lox Simiang Siyiex tix mai ang hawt ti yuh awm gumlox pingnyap Nawh Cao mai been pa deuh Nawh Cao, ka pa tawm aux ka maix, daux in singaix khawmuik, krax pa jhax lawg tak hawt maix mai hoek piang maix. 16 Mawx ot daux veng daux yaong ka pon pa jhax lawg, ot ka daux kaung daux ma ka pon pa jhax lawg. 17 Krax pa jhax lawg tak koe ka daux khrawng maix mai ka daux tawg klong ku klao maix blah, 18 krax pa jhax lawg tak koe piang kawn praix maix mai piang plix khaox plix ox pa lih khaing daux haktiex maix, khawm piang tobrie eei maix, pa mawh mawie, yung maix khankix. 19 Yam laig maix ka daux nyiex tix ka pon pa jhax lawg mai yam lih maix khaing nyiex tix ka pon pa jhax lawg, 20 Simiang Siyiex tak kieh pa jhax lawg mai pa tuktiak mai pa map nai hoek piang maix, daux kaing jhaw pa yuh maix ka taix ti tak pon pa laux leeing mai tom hoik khran grai grup maix, kheu jao pa caox caig yuh maix ka pa hoik tik vud maix Nawh Cao, 21 Simiang Siyiex tak kieh jhawm saux preng hoek piang maix, tom sidah yuh Nawh Cao maix but khaing haktiex pa sang hu teei maix ti cie. 22 Simiang Siyiex tak sivied maix mai tawx krax kham geu jhawm saux nhao, jhawm saux hoek, jhawm saux uah mai jhawm saux ngu, pa kied lang teung khaing lawm vaig mai bhaung si oh, pa yum yuh pang khaox, jhawm saux lih rawm im, an kix tak hawt khaix maix tom sidah grai grup maix. 23 Mai raoma piang kaing maix, tak lih ti mawh tawng lheung mai tiex ka greem caong maix tak lih ti mawh rhiem, 24 Simiang Siyiex tak kieh rawm lhiex pa sang lih piang haktiex maix, deeh tieh ti mawh phawng tiex phawng tug lih khaing raoma mai hoek piang maix, tom sidah laux leeing maix. 25 Simiang Siyiex tak kieh maix som nai ka plak sivoe pui koeng maix, maix lih hu sonsang puing kix ka daux krax tix nyaing mai maix tak to sivoe kix ka daux krax aliah nyaing maix tak lih ti mawh pui pa vung viang piang haktiex khawmuik. 26 Tokaux yum maix tak mawh priex ih sim raoma mai totiag piang haktiex, pui mawx kawx tak ang pon ti grheu an kix. 27 Simiang Siyiex tak kieh maix kham geu jhawm saux muad haktiex Ejiptux, jhawm saux glhua nex, jhawm saux ngoi, jhawm saux dao, pa ang maix lai pon pai moi. 28 Simiang Siyiex tak kieh maix kham geu jhawm saux yhot, jhawm sau dug ngai, jhawm saux lung lang rhawm khankix, 29 mai maix tak pu pi ti hu bawg yam jung singaix, awm pui dug ngai pa pu pi ti hu ka daux krax pa faik, kaing pa yuh maix khankix tak ang koe krax pa haok hwan maix tak kha rhawm tix, pui tak tud rhim maix jheung jheung mai ang koe pui pa pon taoh maix. 30 Viang maix hoik teei ti koe moeng kawx, pui tang kaux tak it tau mai nawh, viang maix hoik sum sipeem plix siiet kawx maix tak ang yaox ti ih plix khankix, 31 mawie eei maix viang pah ka plak sivoe ngai maix kawx maix tak ang yaox ti ih nex, la eei maix viang mawh pa tud rhim khaing plak sivoe maix kawx, tak ang lai deeh tawx ka maix, yung eei maix tak tawx ka pui koeng maix mai ang lai koe pui pa sang deeh taoh ka ankix tix kaux kawx. 32 Kawn simex kawn bun maix, tak mawh pa hoek ka pui tang kaux mai ngai maix maong ti jhak ka kix, leeing lang singaix mai koe krax pa laux rhawm mai taix maix kawx tak mawh pa ang lai koe riang. 33 Ceu pui pa ang maix sax tawng, tak teei ti ih plix khaox plix ox haktiex maix, khawm can ceu pa pon maix khaing riang tokaux ti mai maix tak mawh pa kham geu krax pa khin pa thux pui jheung jheung. 34 Mawh kheu nan maix tak mawh pa yhot, kheu jao pa yaox maix ka ngai cao tix khankix. 35 Siyiex tak sivied maix ka krax pa kham geu jhawm saux muad pa lang teung pa ang maix pon pai moi ka nge ngawng mai ka gawng caong maix khankix, jah ka tiag caong maix tom hoek ka piang kaing maix. 36 Simiang Siyiex tak viex tokaux maix khawm simiang pa hoik yaog maix kwang ka piang tix, hoek ka ceu pui pa ang maix, mai keeing maix nyang sax tawng mai maix tak yuh kaing jhaw siyiex tang kaux, pa mawh siyiex pa yuh tix ka khaox mai siyiex pa yuh tix ka simaox khankix tan. 37 Mai maix tak lih ti mawh pa daox deng mai been lox tiag mai ka lox map lox sibriem, ka daux sinax ceu pui khankix, ka dee sang grheu Simiang Siyiex maix hu, 38 maix tak viex simie nghox tom nie lih hu daux tong kaung mai deeh yaox ti kraix khrawm ceeix khaing, mawh kheu sido tak ih ankix khawmuik, 39 viang maix sum sipeem plix siiet mai priex rien mhawm mhawm kawx maix tak ang yaox ti nyaux rawm plix siiet mai ang yaox ti khrawm, grawh grawng nawh viag tak ih ankix. 40 Viang maix koe khaox sanlun daux haktiex dee pa sang kwang maix khawmuik maix tak ang yaox ti kraix bee an ka tokaux tix, mawh kheu plix khaox sanlun maix hoik khrum sivoe sang teem. 41 Viang maix keh kawn simex kawn bun kawx, kix tak ang mawh cie maix. Grawh grawng nawh, kix luan ti mawh pui pa giex laung ka daux taix pui koeng maix khankix, 42 Sido tak ih pang khaox maix, khawm ceu pa sang pon maix khaing daux haktiex maix khankix. 43 Ceu pui tang ceu pa ot ka daux sinax pex khankix, tak yaog tix lheu laong mai baox nie lheu laong khaing maix, maix tak mawh pa tiiem mai baox nie lheu tiiem khaing kix. 44 Nawh tak pon tawx maix ceuk rawm, viang mawh nan maix tak ang pon tawx nawh ceuk rom, nawh tak mawh kaing mai maix tak mawh sidax, 45 krax pa jhax lawg inkix khawmuik, tak hoek piang maix mai hawt khaix maix mai krup maix, tom hoek maix krax laux leeing, kheu jao ang maix cu nghiet ka lox Simiang Siyiex maix, ang priex rien tix hawt yuh awm gumlox pingnyap Nawh Cao mai ka beenli pa deuh Nawh Cao khankix, ka pa hoik tawm Nawh Cao ka maix. 46 Ceu pa jhax lawg ankix tak mawh mhai pa tang siyox mai pa daox deng piang maix, khawm piang doeh ru maix leeing ju. 47 Grawh grawng nawh, yam magmi maix mai ang gaux rhawm ti yuh kaing jhaw Simiang Siyiex tix, 48 mawh kheu nan maix tak yaox ti yuh kaing jhaw pui pa koeng tix khankix, pa ploi Siyiex hoek ka maix, ka daux pa cai rhawm tix mai pa sang nyaux nie rawm mai pa ang koe kraung ceep mai ka pa cud cha kuceu mai Nawh Cao tak sau iak rhiem piang ngawg maix, tom sidah yuh Nawh Cao maix laux leeing. 49 Siyiex tak viex ceu pui tix ceu khaing dee singai dee sidah haktiex mai kieh kix hoek puing ka maix, awm phai pu klang ting, pa mawh ceu pui pa ang maix sax tawng ka lox sikah kix. 50 Ceu pui in mawh pa riex hak pakngai, pa ang koe krax nab yam ka kwad song khankix mai pa ang koe krax caux rhawm ka kawn nyawm khankix. 51 Mai kix tak ih tobrie eei maix mai plix khaox pa lih ka daux haktiex maix khankix, tom hoek maix krax laux leeing, nghox koi ang ah, rawm plix siiet pa khraox ang ah, rawm bee ang ah mai can tobrie pa eei maix ang ah mai kawn yung kawn mawie maix ang ah, kix tak ang lai prah maix cie tom sidah hoik yuh maix laux leeing. 52 Kix tak lai lawm ka maix hawt diang siviex maix, tom hoek bawg yam grhup guh veng pa lhaong pa kaux pa cong maix, ka piang tiex khawmuik, ka dah dee pa een maix rhawm tix ka mai kix tak lai lawm maix hawt diang siviex veng pex, pa koe ka daux haktiex pex, ka dee pa hoik tawx Simiang Siyiex pex ka maix. 53 Yam ot maix ka daux pa lai lawm pui koeng maix khankix, ka daux pa nied tix kin kha rhawm khankix maix tak ih ka kawn praix tokaux ti, pa mawh nex kawn simex kawn bun maix, pa hoik tawx Simiang Siyiex maix ka maix. 54 Simex pa awn nex nham kaux hak ka daux sinax pex, tak koe rhawm pa koeng ka puxaik nawh mai ka moeng pa koe piang naok nawh mai khawm kawn praix pa kawn deuk khankix, 55 Nawh ang lai rhawm tawx nex kawn praix tix khankix sonsang ih pui pa dex mai nawh, kheu jao ang nawh lai koe ceu pa ih tix ceu kawx, ka daux bawg yam ot nawh, ka daux pa lai lawm pui koeng khankix mai ka daux pa hoik kied kin yuh pui koeng maix, krax kha rhawm ka daux veng ot pex khawmuik. 56 Bun pa awn nex nham kaux hak ka daux sinax pex pa ang sax pon kieh caong tix dig piang tiex kheu jao pa awn nex nham kaux hak an, tak koe rhawm pa koeng ka mex pa koe piang naok tix mai ka kawn simex kawn bun tix, 57 rheem pa lih ka sinax ba nawh mai kawn praix pa keh nawh an, nawh tak mox ti ih dee glip, Ref 28:57 2Sim 6:28-29; Doe 4:10. kheu jao hoik cud cha ceu pa ih yam ot nawh ka daux pa lai lawm pui mai ka pa kied kin tix ot son nawh, yam yuh pui koeng maix khankix krax kha rhawm daux veng ot pex khawmuik. 58 Phan maix ang yuh satix tix mai ang hawt ti yuh awm lox lai beenli pa hoik tiiem ti deuh daux phuk lai, sonsang koe krax lhat graung tix ka ceu kaux SIMIANG SIYIEX MAIX, pa ting min mai lhat graung ka. 59 Simiang Siyiex tak viex jhawm saux preng pa lang teung, pa daox deng, jhawm saux preng pa kied rheung, jhawm saux pa nie lheu kin mai pa kied rheung bawg yam hoek piang maix mai piang doeh ru maix khankix. 60 Lheu khaing an Nawh Cao tak deeh viex jhawm saux haktiex meung Ejiptux pa lhat graung maix ka, hoek piang maix, jhawm saux ankix tak haok kawp piang maix. 61 Jhawm saux kuceu mai jhawm saux preng kuceu, pa ang nyang bax tiiem ka daux phuk lai beenli in khankix kawx, Simiang Siyiex tak viex hoek piang maix, tom hoek maix krax laux leeing. 62 Viang maix nie haoh hun awm simuing raoma kawx maix tak lih ti mawh pui tux, pui iak pa deuk ceeix khaing, mawh kheu ang maix cu nghiet ka lox Simiang Siyiex maix khankix. 63 Awm hoik khaw rhawm Simiang Siyiex ti yuh maix mawh pa mhawm mai pre haoh hun, awm an Simiang Siyiex tak khaw rhawm ti yuh maix laux lak pak leeing mai ang lai kieh maix koe ceu koe cak mai tak deeh reeig ti tik maix khaing daux haktiex pa sang hu teei maix ti cie. 64 Simiang Siyiex tak kieh pex prung prang rairuat sinax ceu pui khankix, jah ka haktiex plak in tom sidah hoek ka haktiex plak an mai maix tak yuh kaing jhaw siyiex tang kaux pa ang tokaux maix mai keeing maix sax tawng, pa mawh siyiex khaox mai siyiex simaox tan. 65 Daux sinax ceu pui ankix maix tak ang yaox krax laux lee rhawm tix mai caong maix kawx, tak ang koe dee sang laux lee tix, Simiang Siyiex tak tawx rhawm pa sikua mai iak riang ngai mai pa khrup rhawm maix tan. 66 Ju maix tak koe krax khi glawh ka sivoe ngai maix, maix tak koe krax lhat graung ku singaix mai ang lai deeh pon taoh ka son ju tix. 67 Yam hoek plak ponngawb maix tak ah nin, kieh niied hoek plak ponbo mai yam hoek plak ponbo maix tak ah nin, kieh niied hoek plak ponngawp maix tak ah nan kheu jao pa lhat graung pa yaoh daux rhawm maix, pa yaox maix ka ngai tix. 68 Simiang Siyiex tak deeh teei maix ing ka meung Ejiptux ka reu ting, awm pa hoik sax krai Aux ka maix yuh nin maix tak ang lai baox yaox daux krax an. Maix tak mawh pa coh tix ka pui koeng maix khankix, mawh siliex simex siliex bun, viang mawh nan, tak ang koe pui liag ka maix heue.