27
Gumlox Beenli Piang Simaox
1 Khaix an Mose mai kwad song ceu pui Isarelax khankix tawm lox ka pui khankix ah nin. “Priex tix hawt gumlox pingnyap pa tawm aux ka pex khankix daux in singaix awx.”
2 Ka daux singaix yam tiang maix ka plak toi rawm klawng Yawdan, ka haktiex pa sang tawx Simiang Siyiex pex, ka maix, maix tak sum ti deuh lon simaox ting mai kraix simaox ceed piang an kix.
3 Maix tak tiiem gumlox beenli inkix khawmuik piang, yam hoik tiang maix toi plak an, sonsang pon maix ti laig daux haktiex pa sang tawx Simiang Siyiex ka maix, pa mawh haktiex lih rawm teeih mai rawm hia, awm pa hoik yuh Simiang Siyiex sijax mukheu tix ka keeing maix khankix.
4 Yam hoik tiang maix ka plak toi rawm klawng Yawdan, yam hoik hoek maix piang gawng Ebalax maix tak sum lon simaox inkix, awm pa tawm aux maix daux in singaix mai maix tak kraix simaox ceed piang.
5 Maix tak sum khu dee tan ka lon simaox son Simiang Siyiex maix tan tix mu maix tak ang pon ti shiao kraung rhiem tix ceu kawx piang simaox an.
6 Maix tak sum khu dee tan Simiang Siyiex maix ka simaoxRef 27:5-6 Lih 20:25. pa ang max mai maix tak tan krax tan pa gleeing piang son Simiang Siyiex maix.
7 Maix tak tan krax tan pa nhim khankix mai maix tak ih tan tau mai krax gaux rhawm tix ka plak sivoe Simiang Siyiex.
8 Mai maix tak tiiem gumlox beenli in khawmuik sidawng laing piang lon simaox an.Ref 27:2-8 Yaw 8:30-32.
9 Khaix an, Mose mai cao giex kaing li khankix mai ceu pui Lewix krai ka ceu pui Isarelax khankix ah nin. “Ceu pui Isarelax khankix eue, jawg tix nghiet, singaix in maix hoik lih mawh ceu pui Simiang Siyiex maix.”
10 Mawh kheu nan maix tak cu nghiet ka lox Simiang Siyiex maix mai hawt ti yuh gumlox pingnyap Nawh Cao mai ka gumlox been Nawh Cao khankix, pa tawm aux ka maix, ka daux in singaix heue.
Jhax Lawg Piang Gawng Ebalax
11 Mose tawm ka pui khankix daux singaix an ah nin,
12 inkix tak mawh pa cung piang gawng Gerazim mai pa sang nawb bwan piang pui khankix, Ref 27:12 Pi 11:29; Yaw 8:33-35. yam hoik tiang maix ka plak toi rawm klawng Yawdan, pui inkix mawh Simion, Lewix, Yudax, Issakha, Yosiep mai Binyamin khankix.
13 Inkix mawh pa cung piang gawng Ebalax, sonsang krai pao pa jhax lawg mai pui kix mawh Rubin, Gat, Asha, Zebulun, Dan mai Napthalix khankix.
14 Ceu pui Lewix khankix, yo lox ting sinum ah nin ka pui Isarelax khankix,
15 “Kieh krax pa jhax lawg koe piang pui pa yuh riang grang pa saik ang ah, Ref 27:15 Lih 20:4; 34:17; Krub 19:4; 26:1; Pi 4:15-18; 5:8. riang pa raug ang ah, pa mawh ceu pa seeing Simiang Siyiex ka mai kaing jhaw pa yuh ka taix, cao yuh kaing taix mai pa jung ti deuh an khankix ka dah dee pa glip, pui khawmuik deeh pawk lox mai ah Amen!
16 Kieh pa jhax lawg koe piang pui pa yuh pa ang khaw ang jiet ka miex keeing tixRef 27:16 Lih 20:12; Pi 5:16. mai pui khawmuik deeh pawk lox mai ah Amen!
17 Kieh pa jhax lawg koe piang pui pa gah rong mee haktiex paox plawg tix, Ref 27:17 Pi 19:14. mai pui khawmuik deeh pawk lox mai ah Amen!
18 Kieh pa jhax lawg koe piang pui pa kieh pui dug ngai lud hu khaing daux kraxRef 27:18 Krub 19:14. mai pui khawmuik deeh pawk lox mai ah Amen!
19 Kieh pa jhax lawg koe piang pui pa tieh lox prawng pa rahsee piang nyo sinie mai piang miexmai kawn doeRef 27:19 Lih 22:21; 23:9; Krub 19:33-34; Pi 24:17-18. khankix mai pui khawmuik deeh pawk lox mai ah Amen!
20 Kieh pa jhax lawg koe piang pui pa it tau mai moeng keeing tix, Ref 27:20 Krub 18:8; 20:11; Pi 22:30. mawh kheu hoik peeik nawh kraung ceep keeing tix mai pui khawmuik deeh pawk lox mai ah Amen!
21 Kieh pa jhax lawg koe piang pui pa lud vao mai totiag tix ceuceuRef 27:21 Lih 22:19; Krub 18:23; 20:15. mai pui khawmuik deeh pawk lox mai ah Amen!
22 Kieh pa jhax lawg koe piang pui pa it tau mai pux bun tixRef 27:22 Krub 18:9; 20:17. pa mawh kawn bun pa hawt keeing tix ang ah mai kawn bun hawt miex tix ang ah mai pui khawmuik deeh pawk lox mai ah Amen!
23 Kieh pa jhax lawg koe piang pui pa it tau mai miex moeng tixRef 27:23 Krub 18:7; 20:14. mai pui khawmuik deeh pawk lox mai ah Amen!
24 Kieh pa jhax lawg koe piang pui pa tawk ka paox plawg tix ka dah dee glip mai pui khawmuik deeh pawk lox mai ah Amen!
25 Kieh pa jhax lawg koe piang pui pa ih mau chun praok, sonsang pah ka pui pa ang koe phimap tix kaux mai pui khawmuik deeh pawk lox mai ah Amen!
26 Kieh pa jhax lawg koe piang pui pa ang kaux sijax ka gumlox beenli in khawmuik Ref 27:26 Ka 3:10. mai pui khawmuik deeh pawk lox mai ah Amen heue.”