1 Phan pex yaox ka mawie mai yung puxaik ti lud krax, pex tak ang pon prah grham mai deeh viex hoek ka puxaik tix. 2 Phan puxaik pex ang ot dex pex mai phan pex ang tawng dee ot nawh, pex tak cax ing ka nyiex tix, tom sidah hoek sawg puxaik pex ka mai pex tak deeh tawx ka nawh. 3 Pex tak yuh awm an ka la mai kraung ceep nawh, mai can pa grai cie puxaik pex tix ceuceu, ka pa hoik grai nawh yuh phan pex deeh yaox, pex ang pon prah grham. 4 Phan pex yaox ka la mai mawie puxaik ti goh hawt krax, pex ang pon prah grham ka mai deeh teem nawh yaog cung.Ref 22:1-4 Lih 23:4-5. 5 Bun ang pon ceep kraung simex mai simex ang pon ceep kraung bun, mawh kheu pui pa yuh ceu an mawh pa seeing brai Simiang Siyiex, Siyiex pex ka. 6 Phan pex pub ka mheem sim koe hawt krax, piang khaox mai piang tiex, tau mai kawn nawh mai tawm nawh khankix yam kawn num piang tawm tix, pex paw vi teei khawm miex khawm kawn, 7 pex tak ploi miex pu mai teei kawn son cao pex, sonsang mhawm hu mhawm ing pex mai sonsang lang ju pex. 8 Yam sum pex nyiex khraox, pex tak yuh pa tiebtie hawt braux nyiex tix, sonsang ang pex kieh nham phimap hoek piang nyiex tix, phan pui tix kaux kaux cod khaing an, 9 paw ruat simie ra ceu ka daux sipeem plix siiet pex, phan yuh nan, simie plix mai plix plix siiet khawm ra tak laux leeing ka. 10 Pex ang pon thai ka mawie mai la tau. 11 Paw ceep ka kraung pa taing ka tai mai hauk yung tau.Ref 22:9-11 Krub 19:19. 12 Pex tak yuh ciem tai khankix piang daog pon plak ka kraung ceep pa kheem pex tokaux tix.

13 Phan pui tix kaux kaux koe moeng mai laig it tau mai nawh mai deeh koeng ka bun an, 14 mai yaox bun an yuh ceu pa kaig tua mai min ceu kaux nawh hoik laux ah nin, aux hoik rieb bun in mawh moeng tix, yam it aux mai nawh, aux hoik yaox ang nawh lai mawh bun loig, 15 miex keeing bun an, tak viex nawh sonsang jhi mhai rug pa mawh bun an pa loig, ka kwad song veng an khankix hawt diang siviex veng, 16 mai keeing bun an, tak ah nin ka kwad song khankix, aux hoik tawx pui in moeng ka kawn bun tix, viang mawh nan, nawh deeh tieh tix koeng ka, 17 yam in nawh hoik deuh phimap mai yuh pa kaig tua ka nawh ah nin, “Aux hoik yaox kawn bun maix ang lai mawh bun krih loig.” In khankix hoik mawh mhai rug pa mawh kawn bun aux bun krih loig kix tak nih kraung ceep nawh ka plak sivoe kwad song khankix, 18 kwad song veng an khankix, giex ka pui an mai tap toi ka nawh, 19 kix kieh nawh se mau tix yieh shekhe mai ap mau an ka keeing bun an, kheu jao hoik kieh nawh bun krih pui Isarelax laux ceu kaux, mai bun an tak mawh moeng nawh, mai ang pon tik bun an tom leeing ju tix. 20 Viang mawh nan, phan ceu an mawh tete mai ang yaox mhai rug grawng mawh bun an bun krih loig, 21 kix tak viex bun an lih hoek ka diang siviex nyiex keeing nawh mai simex daux veng an khankix tak dheem nawh yum ka simaox, kheu jao hoik yuh nawh ceu pa kaig tua ka daux pui Isarelax khankix mai kheu jao yuh nawh krax lud vao ka daux nyiex ma keeing nawh, pex tak teei ti tik pa caox caig khaing sinax pex. 22 Phan yaox simex tix kaux it tau mai bun koe mex, kiex tak yum khawm ra tix, khawm simex pa it tau mai bun an mai khawm bun an mai pex tak teei ti tik pa caox caig khaing pui Isarelax. 23 Phan koe bun krih loig tix kaux pa hoik chawk ti deuh mai simex tix kaux pub nawh ka daux veng mai it tau mai nawh, 24 pex tak viex kiex khawm ra kaux lih ka daux diang siviex laig daux veng an mai pex tak dheem kiex yum ka simaox, kheu ang bun an riag yo ka daux veng mai kheu nunai simex an ka moeng paox plawg tix, mai pex tak teei ti tik pa caox caig khaing sinax pex. 25 Phan simex tix kaux pub ka bun krih pa hoik chawk ti deuh ka daux tiag mai simex an khin ka nawh mai it tau mai nawh, mawh ngie simex pa it tau mai nawh pa yum nong nong. 26 Paw yuh tidtix ka bun an, mawh kheu bun an ang lud ka tidtix sonsang tawx phimap nawh tom yum nawh, mawh kheu see in awm pui tix kaux pa puing mai pah ka paox plawg tix. 27 Yam pub nawh bun an ka daux tiag mai bun an riag yo pui teem ka nawh ang koe tix kaux kawx, 28 phan simex tix kaux pub bun krih pa ang pui nyang bax chawk, phan nawh giex mai it tau mai nawh mai phan pui yaox ka, 29 simex pa hoik it tau mai bun an, tak tawx mau tixphwan shekhe ka keeing bun an mai kieh bun an mawh moeng nawh, mawh kheu hoik nunai nawh ka bun an, ang lai pon tik bun an tom leeing ju tix.Ref 22:28-29 Lih 22:16-17. 30 Paw kieh pui tix kaux kawx teei ka moeng keeing tix mai paw kieh seeing yuh kraung it keeing tix heue.Ref 22:30 Krub 18:8; 20:11; Pi 27:20.