21
Beenli Pa Dex Mai Grawng Pa Ang Sidawng
1 “Phan pui tix kaux kaux yaox ka tokaux yum pah pui, pa ang tawng ka cao pah ka daux bing pak, haktiex pa tawx Siyiex, Siyiex pex, pex cie,
2 kieh kwad song mai cao prawng see, tiag tix yaox ka veng pa koe rawb rim pui yum an,
3 kwad song pa ot dex veng dee koe tokaux yum an, tak viex mawie shiang tix mu pa ang sax cau mai pa ang nyang sax sau iak piang.
4 kwad song veng an khankix, tak viex mawie shiang an hu ka daux ngawd dee lih rawm, dee ang sax thai mai dee ang sax ruat simie mai kieh raig ngawg mawie shiang ka daux ngawd.
5 Cao giex kaing li kawn simex Lewix khankix tak hoek dex, mawh kheu Simiang Siyiex, Siyiex pex hoik laug kix sonsang yuh kix kaing jhaw Nawh mai kieh nawb bwan daux ceu kaux Simiang Siyiex, krax simah mai krax tap toi, tak yawg kheu cao giex kaing li.
6 Kwad song veng an pa ot dex tokaux yum khankix, tak khoek taix ti, piang mawie shiang pa hoik raig ngawg ka daux ngawd,
7 mai kix kham sakse ah nin, taix yix ang kieh nham pui in lih mai ngai yix ang yaox ka lih nham pui in.
8 Simiang Siyiex eue, pluat ploi ka phimap pui Isarelax, pa hoik taoh Maix Cao mai paw deuh nham pa ang koe krax lud in ka sinax pui Isarelax, kix tak luad luan khaing pa pah ju pui yum.
9 Mawh kheu nan, pex tak teei ti tik phimap nham pa ang koe krax lud khaing daux sinax tix, yam yuh pex pa khaw caw, ka plak sivoe ngai Simiang Siyiex.
Bun Pa Giex Khaing Daux Naing
10 Yam lih hu pex daux naing mai puing pui koeng tix khankix mai Simiang Siyiex ap kix ka daux taix pex mai giex kix mawh pui giex pui laung,
11 mai maix yaox pa mhawm grang ka sinax pui pa giex laung khankix maix koe rhawm mie ti teei mawh moeng tix,
12 maix tak viex nawh hoek ka nyiex tix mai nawh tak khlao hauk kaing tix mai rhip nghim tix.
13 Bun an tak peeik kraung ceep pa giex laung tix mai prah nawh ot ka daux nyiex maix mai kieh nawh yuh krax doe ka miex keeing tix naog tix khix, khaix an maix tak pon hu laig ka nawh mai mawh mex nawh mai nawh tak mawh moeng maix.
14 Khaix an, phan maix ang khaw rhawm ka nawh maix tak ploi nawh hu ka dee sang hu nawh, maix tak ang pon coh ka nawh mai paw kieh nawh mawh siliex, kheu hoik kieh maix nawh kaig.
Kawn Ai Mai Sinngao
15 “Phan pui tix kaux koe moeng ra kaux, nawh moh ka tix kaux mai ang moh ka tix kaux, moeng pa moh nawh mai pa ang nawh moh khankiex keh kawn simex, phan kawn Ai keh khaing moeng pa ang nawh moh,
16 yam hoek singaix gwieh nawh sinngao ka kawn simex tix, nawh tak ang pon tawx sinngao kawn Ai, ka kawn simex khaing moeng pa moh nawh, tang kawn simex khaing moeng pa ang nawh moh pa mawh kawn Ai,
17 mai nawh tak rieb kawn simex khaing moeng pa ang tix moh mawh kawn Ai mai tawx sinngao ka nawh ra son, khaing pa koe nawh khawmuik, mawh kheu kawn Ai an mawh riang rao pa jah son keeing mai Ara kawn Ai mawh cie nawh.
Kawn Simex Pa Tieh Feen
18 “Phan pui tix kaux koe kawn simex pa ang lih grawng mai pa teih feen pa ang nghiet lox miex keeing tix, viang miex keeing sidiex ka nawh kawx, nawh ang nghiet,
19 miex keeing nawh tak giex ti viex nawh hu ka kwad song pa ot ka veng an ka diang siviex veng,
20 mai kix tak ah nin ka kwad song pa ot ka veng an, kawn simex yix ang lih grawng mai teih feen ang nghiet ka lox yix, nawh mawh pa nie luan ih luan nyaux ka priex.
21 Pui pa ot ka daux veng khankix tak dheem nawh yum ka simaox, pex tak teei ti tik pa caox caig khaing daux sinax tix, mai pui Isarelax lhat graung ka mhong tix ka grawng an heue.
Lox Been Son Kuceu
22 Phan pui tix kaux hoik lud ka pa keung tix yum, nawh tak caw tix yum mai preue nawh piang khaox,
23 ang pon ti grham tokaux yum nawh leeing sawm piang khaox, pex tak sipaung nawh ka daux singaix an, son ang pex sang kieh haktiex tawx Simiang Siyiex, Siyiex pex, Ref 21:23 Ka 3:13. pex cie seeing brai, mawh kheu kaw pa preue tix piang khaox ot greem pa jhax lawg Siyiex heue.