20
Been Kwang Krax Ot Krax Koe
1 Yam lih hu puing pex naing ka pui koeng pex khankix, yam yaox pex ka brung, ka ling lawx brung mai ka pui hun khaing pex, paw lhat graung ka kix, mawh kheu Simiang Siyiex, Siyiex pex, pa hoik viex pex lih khaing Ejiptux, ot tau mai pex.
2 Yam dex bawg yam sang puing naing cao giex kaing li tak hoek sivoe mai krai lox ka pui hun,
3 ah nin ka kix, Isarelax khankix nghiet heue, daux in singaix pex tak hu daux naing mai puing ka pui koeng pex khankix pex paw koe krax khi rhawm, paw lhat graung, paw siyaung mai paw yaoh yee ka kix,
4 mawh kheu Simiang Siyiex, pa mawh Siyiex pex hu tau mai pex, sonsang puing ka pui koeng ka son pex mai tawx pex, pex ka.
5 Cao kaing naing tak ah nin ka pui hun, pui mawx pa sum nyiex khraox mai ang nyang appong lie? Kieh nawh deeh ing ka nyiex tix, lhat nawh yum ka daux naing mai pui tang kaux tak appong nyiex an.
6 Pui mawx pa hoik sum sipeem plix siiet mai ang nyang yaox ti ih plix lie? Kieh nawh deeh ing ka nyiex tix, lhat nawh yum ka daux bang naing mai pui tang kaux tak ih ka plix an.
7 Pui mawx pa chawk ka bun sonsang moeng mai ang nyang yuh kupaox koe lie? Kieh nawh deeh ing ka nyiex tix, lhat nawh yum ka daux bang naing mai pui tang kaux tak moeng ka nawh.
8 Cao kaing naing tak baox krai ka pui hun ah nin, mawh koe pui ot tin pa koe rhawm lhat mai pa khi rhawm lie? Kieh nawh deeh ing ka nyiex tix, lhat rhawm puxaik nawh iak rhawm awm iak rhawm nawh,
9 yam hoik krai cao kaing naing lox ka pui hun mai kieh kix laug cao kaing kru naing kieh mawh cao kaing piang pui hun.
10 Yam laig pex dex veng sonsang puing ka, pex tak krai pao sonsang yuh pa nhim tau mai pui veng an.
11 Phan kix deeh pawk lox pex daux pa nhim mai paoh siviex veng ka pex, pui hun pa ot ka daux veng an, tak tawx gha ka pex mai yuh kaing jhaw son pex.
12 Phan veng an ang yuh pa nhim mai pex mai phan kix sang yuh naing ka pex, pex tak lai lawm ka veng an,
13 yam ap Simiang Siyiex pex kix daux tawm taix pex, pex tak pah simex ku kaux ka lawm vaig,
14 viang mawh nan bun, kawn nyawm, tobrie mai can pa koe daux veng khankix mai kraung khrai pa rhim an khawmuik, pex tak teei ti cie, mai pex tak gaux rhawm ka kraung pa rhim tix khaing pui koeng khankix, pa tawx Simiang Siyiex, Siyiex pex ka pex.
15 Pex tak yuh awm in ka veng khankix pa ot singai khaing pex, pa ang mawh veng ceu pui in khankix.
16 Viang mawh nan, veng ceu pui in khankix, pa ap Simiang Siyiex, Siyiex pex, pex cie, pex tak ang pon kieh ceu pa toek bhawm khankix im ju tix ceu kawx,
17 pex tak yuh pui Hetax, pui Amawrix, pui Khananix, pui Pherazix, pui Hiwix mai pui Yebusix khankix, laux lak pak leeing awm lox tawm Simiang Siyiex, Siyiex pex, ka pex,
18 son ang kix gau pex yuh pa seeing brai, awm pa yuh kix kaing jhaw son siyiex kix, mawh kheu pa yuh ka ceu an mawh pa lud ka Simiang Siyiex pex.
19 “Yam lai lawm pex ka veng tix veng tom rheung, yam puing pex ka veng an, pex paw kid khaox laux leeing ka moe, mawh kheu pex tak ih plix khaing khaox an, paw pex kid goh. Khaox pa koe daux kaung khankix mawh pa koe bwanson son pui, mawh kheu nan, lai lawm mai priex ka.
20 Mawh ngie khaox pa tawng pex pa ang chix ti ih plix pa chix yuh laux leeing mai kid goh, sonsang shiao ka kaing jhaw lai lawm veng, pa sang puing naing mai pex tom sidah laux leeing veng an heue.