19
Veng Hoek Pui To
(Si 35:9-28)
1 “Yam teei Simiang Siyiex ti tik ceu pui khankix, pa mawh haktiex pa tawx Simiang Siyiex ka pex mai pex grheu kix lih mai ot ka daux veng daux nyiex kix,
2 Pex tak tang gwieh veng loe vengRef 19:1-13 Yaw 20:1-9. son tix ka daux haktiex tawx Simiang Siyiex, Siyiex pex, pex cie.
3 Pex tak cox khre krax mai gwieh haktiex pa tawx Simiang Siyiex pex, pex cie loe son, sonsang to pui pa pah pui t peung tan.
4 In mawh grawng pa dex mai cao pah pui to ti klawd mai pa loe ti pah paox plawg ti mai pa ang koe krax cang krax khoi ka nawh, bawg yam pa luan,
5 awm yam hu pui tix kaux kid khix daux tiag mai paox plawg tix mai yam kid nawh khaox goh ka moe, moe goh khaing krong tix, mai moe loe krox ka paox plawg nawh mai yum, nawh tak to ka veng an tix veng veng mai pon ti im ju,
6 Phan cao pawk bix nham pheet sonsang krub ka cao pah pui yam kawn song rhawm tix, kheu kied singai krax mai sang pah nawh, nawh ang khaw tix yum, mawh kheu ang nawh koe krax cang krax khoi ka pui yum an, ka bawg yam pa luan.
7 Mawh kheu nan, Aux tawm lox ka pex, pex tak tang gwieh veng loe veng.
8 Phan Simiang Siyiex greed mee haktiex pa hoik tiextu Nawh ka keeing pex khankix mai ap haktiex pa hoik yuh Nawh sijax mukheu sonsang tawx ka keeing pex khankix,
9 mawh kheu nan, yuh satix pex mai hawt ka lox tawm pingnyap pa tawm Aux ka pex daux in singaix, sonsang moh pex ka Simiang Siyiex tix, mai hawt daux krax Nawh Cao jheung jheung, khaix an pex tak baox veng loe veng piang veng in loe veng,
10 mawh kheu lhat pui ang koe phimap jauh nham ka daux haktiex pex, pa mawh haktiex pa tawx Simiang Siyiex pex cie, mawh kheu nan, nham phimap tak hoek piang maix.
11 Phan pui tix kaux kaux, koeng ka paox plawg ti, jawm tix pau mai tap toi nawh, phan nawh hoik yum mai pui an tak to ka veng an tix veng veng,
12 mai kwad song ka daux veng ot pui an, tak ploi pui hu teei pui an ing khaing tan mai ap pui an ka daux tawm taix cao pawk bix nham, sonsang teei nawh yum.
13 Pex tak ang pon ti koe krax pa caux rhawm ka nawh mai pex tak teei ti tik krax lud pa ang koe phimap khaing pui Isarelax, sonsang hu mhawm ing mhawm pex khawmuik.
Mee Haktiex Sinngao Cie Isarelax.
14 Pex ang pon gah ka lhak simaox mee haktiex paox plawg tix, Ref 19:14 Pi 27:17. pa hoik sum pui didix ka, ka daux sinngao haktiex pa tawx Simiang Siyiex ka pex.
Beenli Pa Kham Mhai Rug
15 “Ka pui tix kaux kaux pa yuh krax caox tix ceuceu mai pa yuh phimap tix ceuceu ang ah, phan cheuk cheu ka nawh, mhai rug pa kham pui tix kaux khaing ang chix grum naog, phan pui kham sakse koe ra loe kaux tom chix grum naog.Ref 19:15 Si 35:30; Pi 17:6; Mat 18:16; 2Kaw 13:1; 1Ti 5:19; He 10:28.
16 Phan koe mhai rug pa ang mawh ang meh pa kham krax lud pui tix kaux kaux,
17 mai kieh pui koe see khawm ra kaux hoek sivoe Simiang Siyiex, sivoe cao giex kaing li mai sivoe cao prawng see, pa yuh kaing jhaw ka daux singaix an,
18 Cao prawng see tak jawg tix chawk cheng ka grawng an, phan mhai rug an mawh mhai rug pa lud mai yuh see ka puxaik nawh awm krax lud nawh,
19 pex tak yuh ka nawh, awm krax keud nawh ti yuh ka puxaik ti, mawh kheu nan, pex tak teei ti tik pa caox caig khaing daux sinax tix.
20 Pui pa deuk khankix, tak mhong grawng an mai lhat graung ang lai baox yuh pa caox caig daux sinax pex.
21 Pex paw koe krax caux rhawm ka, ju tak mawh son ju, ngai son ngai, rhang son rhang, Ref 19:21 Lih 21:23-25; Krub 24:19-20; Mat 5:38. taix son taix mai caong son caong heue.