15
Pa Pluat Ploi Ceuk
1 “Yam hoik naog aliah num ku num maix tak pluat ploi ka ceuk rom.
2 In mawh grawng pa pluat ploi, cao tawx ceuk rom ku kaux, pa hoik tawx ceuk rom tix ceuceu ka paox plawg ti khankix, tak pluat ploi ceuk rom an, Nawh tak ang pon ti mhaing ceuk rom an ka paox plawg ti mai ka puxaik ti khankix. Grawh grawng nawh, an mawh pa kok mawh krax pluat ploi Simiang Siyiex.
3 Maix tak pon ti mhaing ceuk rom khaing pui tang meung, viang mawh nan, ceuk rom ceu patix ang ah maix tak pluat ploi ka ceuk rom cie puxaik maix khankix,
4 phan maix priex rhawm tix mai nghiet ka gumlox Simiang Siyiex maix, mai priex ti hawt lox pingnyap khankix, pa tawm Aux ka maix daux in singaix.
5 Pui hot pui sibhawm tak ang lai koe ka daux pex, mawh kheu Simiang Siyiex tak nawb bwan pa ting lhaong piang maix, ka daux haktiex pa sang tawx Simiang Siyiex mawh sinngao cie maix.
6 Simiang Siyiex maix tak nawb bwan piang maix, awm hoik yuh Nawh sijax mukheu ka maix, maix tak tawx pui tom nie ceuk rom. Viang mawh nan maix tak ang pon ti ceuk ka pui maix tak kwang ka ceu pui tom nie, viang mawh nan, kix ang pon ti kwang ka maix.
Pa Koe Rhawm Ka Pui Hot Sibhawm
7 “Phan puxaik pa hot maix koe ka sinax pex tix kaux ka daux veng maix tix veng veng, ka daux haktiex tawx Simiang Siyiex ka pex, paw gun rhawm tix mai paw bhok taix ti khaing puxaik pa hot maix khankix.
8 Maix tak yah taix ti vieh va mai tawx nawh ceuk rom mai pa sibieh rhawm tix tawx tom kub mai naok can ceu pa lo nawh khankix.Ref 15:7-8 Krub 25:35.
9 Yuh satix maix mai ang pon ti keud pa caox caig ka daux rhawm tix ah nin, num aliah, num pa pluat ploi hoik dex phao, ngai maix tak koe krax caox krax caig piang puxaik hot maix khankix mai ang rhawm tawx tix ceu kawx ka nawh mai nawh tak riag yo ka Simiang Siyiex kheu jao maix, phimap tak hoek piang maix.
10 Maix tak tawx ka nawh tete mai rhawm maix tak ang pon ti lhawk yam tawx maix ka nawh, Simiang Siyiex maix tak nawb bwan piang maix, ka kaing jhaw maix khankix mai kaing jhaw pa yuh maix ka taix tix.
11 Mawh kheu pui hot ang jud khaing piang haktiexRef 15:11 Mat 26:11; Mak 14:7; Yo 12:8. dee ot maix, mawh kheu nan, aux tom tawm lox ka maix ah nin, maix tak yah taix ti vieh va ka puxaik maix khankix mai ka pui hot sibhawm khankix mai ka pui pa koe krax cu krax nghiet ka daux haktiex maix.
Been Pa Yuh Son Siliex
(Lih 21:1-11)
12 “Phan puxaik maix pui Hebrie simex, bun tix kaux kaux ang ah, mawh pa coh ti ka maix mai phan kix hoik yuh kaing jhaw maix liah num, khaix an yam hoek daux num aliah maix tak ploi kieh lih hu khaing maix.
13 Yam ploi maix nawh hu luad luan khaing tix maix tak ang pon ti kieh nawh hu mai taix yi tix,
14 maix tak teem nawh tom kub, khaing daux cub yung maix khankix mai khaing daux glah nghox maix mai khaing daux dee biiet maix rawm plix siiet khankix, awm pa hoik nawb Simiang Siyiex bwanson piang maix, maix tak tawx ankix ka nawh.
15 Maix tak doh keud ka hoik mawh maix siliex ka meung Ejiptux, mai ka hoik taoh Simiang Siyiex ka maix, mawh kheu nan, aux tawm lox ka maix daux in singaix.
16 Phan nawh ah nin ka maix, aux ang rhawm hu khaing maix, mawh kheu moh aux ka maix mai kawn nyiex ma maix, aux gaux rhawm ti ot tau mai maix,
17 teei nyex lawm mai toh ka yhaok nawh, hawt diang siviex tan mai nawh tak mawh siliex maix leeing ju, ka siliex bun maix kawx maix tak yuh awm an.
18 Yam ploi maix nawh hu luad luan khaing tix maix tak ang pon ti kieh mawh pa nu son maix, mawh kheu nawh hoik yuh kaing maix liah num, lheu khaix ngawh kaing pui cang ra son, khaix an Simiang Siyiex tak nawb bwan piang maix, ka can ceu pa yuh maix khawmuik heue.Ref 15:12-18 Krub 25:39-46.
Been Son Tobrie Pa Liang tix Keh
19 “Can tobrie maix pa liang tix keh pa mawh mhaing khawmuik, khaing daux cub yung cub mawie maix tak priex mawh pa singax singeh ka son Simiang Siyiex.Ref 15:19 Lih 13:12. Maix tak ang pon ti cau ka kawn mawie pa liang tix keh, khaing daux cub mawie maix khankix mai maix tak ang pon ti rib hauk kawn yung pa liang tix keh khaing daux cub yung maix.
20 Kawn mawie kawn yung pa liang tix keh inkix maix mai kawn nyiex ma maix, tak pon ti ih ankix ka plak sivoe Simiang Siyiex, ku num ka dah dee pa laug Simiang Siyiex ti deuh.
21 Viang mawh nan, phan dee mat dee ne koe mai phan mawh pa pot taix caong ang ah mai dug ngai ang ah mai phan mawh pa nie dee mat dee ne maix tak ang pon ti tan ka Simiang Siyiex.
22 Maix tak pon ti ih ka daux veng ot maix, pui pa ang singax mai pui pa singax khankix, tak pon ti ih awm paox ti, awm pa ih kix ka nex kiah mai nex cak.
23 Maix tak ang pon ti ih ngie nham nawh, Ref 15:23 Jah 9:4; Krub 7:26-27; 17:10-14; 19:26; Pi 12:16, 23. maix tak hieh ti tik piang tiex awm rawm heue.