16
Grawng Pawie Pasakha
(Lih 23:14-17; 34:18-24)
1 Rien rhawm maix daux khix Abibax mai priex rien pawie PasakhaRef 16:1-8 Lih 12:1-20; Krub 23:5-8; Si 28:16-25. son Simiang Siyiex, mawh kheu ka daux khix Abibax, Simiang Siyiex hoik viex maix lih khaing daux meung Ejiptux ka plak ponsawm.
2 Mawh kheu nan maix tak appong tobrie pawie Pasakha ka son Simiang Siyiex, khaing pa koe ka daux cub yung cub mawie maix, ka dah dee pa hoik laug Simiang Siyiex ti deuh ceu kaux tix.
3 Maix tak ang pon ti ih blah pa sau susaix tau mai an aliah ngaix maix tak ih blah pa ang sau susaix pa mawh blah krax kha rhawm, grawh grawng nawh maix hoik lih sijaox khaing meung Ejiptux. Maix tak doh keud ka singaix lih maix khaing meung Ejiptux, glang singaix im ju maix.
4 Blah pa sau susaix tak ang pon ti yaox ka sinax pex, ka daux haktiex pa kwang maix khankix, aliah singaix. Nex pa appong maix plak bo, singaix liang tak ang pon ti deuh tom hoek ka plak ponngawb.
5 Maix tak ang pon ti appong tobrie pawie Pasakha ka daux veng ot maix tix dah kawx, ka pa tawx Simiang Siyiex ka maix.
6 Viang mawh nan maix tak appong tobrie pawie Pasakha plak ponbo, bawg yam hoik laig singaix, awm bawg yam lih hu maix khaing meung Ejiptux, ka dah dee pa hoik laug Simiang Siyiex ti deuh ceu kaux tix.
7 Maix tak tong ti ih ankix ka ngu, ka dah dee pa hoik laug Simiang Siyiex, yam hoek plak ponngawb pex tak deeh ing ka nyiex gox tix.
8 Maix tak ih blah pa ang sau susaix daux liah ngaix, yam hoek ka daux singaix aliah, pex tak khrawm paox ti daux pa singax singeh son Simiang Siyiex. Maix tak ang pon ti yuh kaing ka daux singaix an heue.
Grawng Pawie Aliah Vang Twah
9 Maix tak simin tix yaox aliah twah son cao maix. Maix tak jah tix simin aliah twah khaing bawg yam jah maix ti vawg nghox koi.
10 Khaix an maix tak yuh pawie aliah vang twahRef 16:9-12 Krub 23:15-21; Si 28:26-31. son Simiang Siyiex, tau mai krax tan pa tan maix khawm rhawm tix, ka daux taix maix. Maix tak tan an kix awm pa hoik nawb Simiang Siyiex bwanson piang maix.
11 Maix tak koe krax gaux rhawm ka plak sivoe Simiang Siyiex, khawm kawn simex kawn bun maix khankix mai kawncau simex kawncau bun maix mai khawm ceu pui Lewix khankix, pa ot ka daux veng ot maix mai khawm nyo sinie mai khawm miexmai kawn doe pa ot daux sinax pex, ka dah dee pa hoik laug Simiang Siyiex ti deuh ceu kaux tix.
12 Maix tak doh keud ka hoik mawh maix siliex ka daux meung Ejiptux mai maix tak priex ti hawt yuh awm lox lai beenli in khankix heue.
Grawng Pawie Nyiex Gox Bang
13 Maix tak yuh pawie nyiex gox bangRef 16:13-15 Krub 23:33-36, 39-43; Si 29:12-38. aliah singaix, khaix hoik khrawm maix nghox koi khaing daux glah nghox mai khaing dah dee briet maix rawm plix siiet khankix,
14 Maix tak koe krax gaux rhawm ka daux pawie yuh tix, khawm kawn simex kawn bun maix mai kawncau simex kawncau bun maix khankix mai khawm ceu pui Lewix khankix mai khawm nyo sinie mai khawm miexmai kawn doe pa ot daux veng ot pex khankix.
15 Maix tak yuh pawie aliah singaix son Simiang Siyiex, ka dah dee pa hoik laug Simiang Siyiex, grawh grawng nawh Simiang Siyiex, hoik nawb bwanson piang maix mai ka daux krax haok hwan kaing jhaw yuh maix ka taix ti khawmuik maix tak koe krax gaux rhawm ka tete.
16 tix num loe bawg kawn simex pex khawmuik, tak hoek ti bleeh ka plak sivoe Simiang Siyiex, ka dah dee pa hoik laug Nawh Cao ka daux bawg yam pawie blah pa ang sau susaix mai ka daux bawg yam pawie aliah vang twah mai ka daux bawg yam pawie nyiex gox bang khankix. Kix tak ang pon ti hoek bleeh ka plak sivoe Simiang Siyiex tau mai taix yi ti.
17 Pui ku kaux tak tawx pa pon tawx nawh, awm pa pon nawh bwanson khaing Simiang Siyiex heue.
Cao Prawng Pa Rahsee
18 Maix tak yaog ti deuh cao prawng see mai cao kaing khankix, awm koe doeh ru pex, daux veng pa hoik tawx Simiang Siyiex, ka pex khawmuik. Kix tak prawng see ka ceu pui ka daux pa rahsee.
19 Maix tak ang pon ti veeh khaing krax prawng pa rahsee. Maix tak ang pon jhak pakngai pui tix plak kawx mai maix tak ang pon ti teei kraung chun praok. Grawh grawng nawh kraung chun praok, mawh pa kieh ngai pui pa koe pingnya cuyi dug mai kieh lox sikah pui pa rahsee klung kliien ti mawh pa suksag.Ref 16:19 Lih 23:6-8; Krub 19:15.
20 Maix tak hawt khaix pa rahsee, sonsang pon maix ti im ju mai teei ti cie sinngao haktiex pa tawx Simiang Siyiex ka maix.
21 Maix tak ang pon ti sum khaox riang grangRef 16:21 Lih 34:13. tix ceu kawx son cao tix, hawt dex khu dee tan pa hoik sum maix, ka son Simiang Siyiex.
22 Maix tak ang pon ti jung rong simaox riang grang, Ref 16:22 Krub 26:1. in mawh pa koeng Simiang Siyiex ka heue.