14
Rien Rhawm Son Pa Ang Khaw Caw
1 “Pex mawh kawn praix Simiang Siyiex pex, pex tak ang pon ti pat nex cao tix mai ang pon khlao ka hauk dieb dong tix pak son pui yum.Ref 14:1 Krub 19:28; 21:5.
2 Grawh grawng nawh pex mawh ceu pui pa singax singeh, son Simiang Siyiex pex. Simiang Siyiex hoik laug pex mawh ceu pui Nawh CaoRef 14:2 Lih 19:5-6; Pi 4:20; 7:6; 26:18; Ti 2:14; 1Pe 2:9. khaing ceu pui pa ot piang haktiex khawmuik.
Totiag Pa Singax Pa Ang Singax
(Krub 11:1-47)
3 “Pex tak ang pon ti ih ceu pa seeing brai tix ceu kawx.
4 Inkix mawh totiag pa pon pex ti ih, mawie, yung mai pex,
5 cak mai poh ceu pa ting mai kiah, pex rang, mawie praix, cak lang rung mai yung tiag,
6 pex tak pon ti ih totiag kuceu pa koe gip, pa gwieh tix koe ra plak mai totiag pa deeh sai roing tix khankix.
7 Viang mawh nan, khaing daux sinax totiag pa deeh sai roing tix mai pa koe gip ra mu, pex tak ang pon ti ih kala-uk mai pietla, Ghot. Grawh grawng nawh, viang ceu ankix, mawh totiag pa deeh sai roing tix kawx, kheu jao ang kix koe gip ra mu, ceu an khankix mawh pa ang singax son pex.
8 Lig mawh pa ang singax son pex, viang koe gip ra mu kawx, kheu ang mawh totiag pa deeh sai roing tix, pex tak ang pon ti ih nex mai pex ang pon ti hu krox hu teeh ka to pa yum ankix.
9 Inkix mawh pa pon pex ti ih pa koe daux rawm khankix, pex tak pon ti ih can ceu pa koe kak pruik mai sibiak khankix.
10 Can ceu pa ang koe kak pruik mai sibiak khankix, pex tak ang pon ti ih, an mawh pa ang singax son pex.
11 Pex tak pon ti ih sim pa singax khawmuik,
12 viang mawh nan, pex tak ang pon ti ih, klang lung, klang preng, klang ting,
13 klang raoh, klang ce mai can ceu pa mawh paox klang,
14 lak kuceu mai paox ceu lak,
15 mai sim kala-uk, sim pang plawh dawd yhaok, sim sivik rawm mai paox ceu klang khankix,
16 sim pang plawh iak, sim teek kreei, sim pang plawh paing hauk khankix,
17 lak tiag, klang preng, sim klang kax,
18 sim paing ting, sim sigaig mai paox ceu an khankix, sim gawx cux mai blak khankix.
19 Can ceu pa chix mu kuceu, pa koe pruik, mawh pa ang singax son pex. An khankix mawh pa ang pon ti ih.
20 Pex tak pon ti ih sim pa singax khawmuik.
21 Pex tak ang pon ti ih to pa tang yum, tix ceu kawx, pex tak tawx nyo sinie pa ot daux veng pex khankix ih, phan ang mawh nan, pex tak coh ka pui tang meung, grawh grawng nawh pex mawh ceu pui pa singax ka Simiang Siyiex pex heue. Pex tak ang pon ti ngaik kawn pex iak ka daux rawm teeih miex nawh.Ref 14:21 Lih 23:19; 34:26.
Grawng Tan Kao Son tix Son
22 “Pex tak gwieh ti deuh kao son tix son mhawm mhawm khaing daux plix nghox plix koi pa pon pex, Ref 14:22-29 Krub 27:30-33; Si 18:21. pa lih khaing daux kaung pex khankix tix num hoik tix num.
23 Pex tak ih can kao son tix son khaing daux plix nghox plix koi pex mai rawm plix siiet khraox pex mai rawm bee pex mai khaing pa liang pex tix pon phao ka khaing cub yung cub mawie pex, ka plak sivoe Simiang Siyiex, ka dah dee pa laug Nawh Cao ti deuh ceu kaux tix ot ka, phan yuh nan mawh sonsang gau pex tix koe krax lhat graung ka Simiang Siyiex jheung jheung.
24 Viang mawh nan, phan krax hu pex mawh pa kied singai ka son pex mai phan pex ang pon viex krax tan kao son tix son an khankix ang ah mai phan dah dee laug Simiang Siyiex ti deuh ceu kaux tix mawh pa kied singai khaing dee ot pex, khaix hoik nawb Simiang Siyiex bwanson piang pex.
25 Pex tak deeh coh ceu an khankix, teei ti viex mau an ka daux taix pex mai hu ka dah dee pa hoik laug Simiang Siyiex pex.
26 Pex tak cai mau an son ceu pa sang simie pex ti yuh ka daux rhawm pex, liag mawie ang ah, yung ang ah, rawm plix siiet ang ah mai rawm plai khankix mai son can ceu pa sang mie pex ti yuh ka daux rhawm pex, pex tak ih ka plak sivoe Simiang Siyiex pex tan mai pex tak koe krax gaux rhawm, maix mai kawn nyiex ma maix.
27 Pex tak ang pon ti prah ceu pui Lewix khankix, pa ot ka daux veng pex. Grawh grawng nawh kix mawh ceu pui pa ang koe nyum cie, mai pa ang pon sinngao tau mai pex.
28 Yam hoik naog loe num ku num, pex tak viex kao son tix son khaing daux plix nghox plix koi pa pon pex daux num an mai khrawm ti deuh ka daux veng ot pex.
29 Pui Lewix khankix kheu ang kix koe nyum cie, mai ang kix pon sinngao tau mai pex, khawm nyo sinie mai miexmai kawn doe pa ot daux veng pex khankix, tak hoek mai ih tom sak, phan pex yuh nan Simiang Siyiex tak nawb bwan piang pex mai ka kaing jhaw pa yuh pex heue.