11
Grawng Pon Totaix Son Krax Moh
1 “Maix tak moh ka Simiang Siyiex tix mai priex ti hawt gumlox tawm Nawh mai lox lai beenli pa deuh Nawh Cao mai lox tat jhawm prawng Nawh Cao mai lox pingnyap Nawh Cao khankix jheung jheung.
2 Priex tix tawng ka daux in singaix, aux ang krai kawn praix maix khankix pa ang nyang sax koe krax tawng yung mai pa ang nyang sax yaox ka krax sidiex gau Simiang Siyiex maix khankix mai krax pa ting lhaong Nawh Cao mai plawng taix pa hoik nih Nawh Cao lih,
3 mhai rug pa daox deng pa hoik yuh Nawh Cao ka daux sigreung meung Ejiptux ka Pharaw, pa mawh simiang meung Ejiptux mai piang haktiex nawh khawmuik, Ref 11:3 Lih 7:8; 12:13.
4 Ceu pa hoik yuh Nawh Cao ka kru naing meung Ejiptux khawm brung kix mai ling brung kix mai grawng pa yuh Nawh Cao rawm sigrit sigra raoh kheem kix, yam hawt pheet kix khaix pexRef 11:4 Lih 14:28. mai pa hoik yuh Simiang Siyiex kix laux leeing tom hoek ka daux in singaix.
5 Grawng pa hoik yuh Nawh Cao son pex ka daux tiag, tom sidah hoek pex dee in,
6 grawng pa hoik yuh Nawh Cao ka Datan mai Abiram kawn simex Eliabax ceu pui Rubin khankix, haktiex ang jheeh tix mai bleet kix, khawm nyiex khawm ma kix, khawm nyiex gox kix mai khawm kraung khrai tobrie kix khawmuik, ka daux sigreung ceu pui Isarelax khankix, Ref 11:6 Si 16:31-32.
7 mai ngai pex hoik yaox ka grawng kaing pa ting lhaong Simiang Siyiex, ka pa hoik yuh Nawh Cao kuceu khawmuik.
Nawb Bwan Piang Haktiex Tiextu
8 “Mawh kheu nan, pex tak priex ti hawt gumlox pingnyap khawmuik pa tawm aux ka pex ka daux haktiex pa sang laig pex teei ti cie,
9 sonsang lang ju singaix im ju pex ka daux haktiex pa hoik tiextu Simiang Siyiex tix tawx ka keeing pex, ka son kix mai ka son doeh ru kix pa mawh haktiex dee lih rawm teeih mai rawm hia khankix.
10 Grawh grawng nawh haktiex pa sang hu teei pex ti cie, ang lai awm haktiex meung Ejiptux, dee hoik kaoh pex mai ka dee hoik ruat pex simie mai dee shiao pex caong tix see rawm awm sipeem taux lhax.
11 Haktiex pa sang teei pex ti cie, mawh haktiex koe gawng lua mai daux ngawd daux lung, pa pon rawm lhiex,
12 mai mawh haktiex pa priex rien Simiang Siyiex pex, ngai Simiang Siyiex, mawh pa kia ngiien piang haktiex an leeing lang num.
13 Phan pex jawk tix nghiet ka lox pingnyap pa tawm aux ka pex daux in singaix, moh ka Simiang Siyiex pex mai yuh kaing jhaw Nawh Cao khawm rhawm tix mai khawm ju tix khawmuik,
14 Aux tak tawx rawm lhiex ka haktiex pex, bawg yam mawx bawg yam an, khawm rawm lhiex cao mai rawm lhiex lha, sonsang pon pex ti khrawm nghox koi, rawm plix siiet khraox mai bee khankix.
15 Sonsang yaox pex ti ih tom sak mai son to eei brie liang pex kawx Aux tak kieh rib kuah ka daux lung pex khankix.
16 Yuh satix pex phan ang mawh nan, rhawm pex tak hawt khaix tawb kheem mai deeh veeh ti yuh kaing jhaw siyiex tang kaux khankix mai krub ka an kix.
17 Phan ang mawh nan, krax song rhawm Simiang Siyiex tak lih piang pex mai Nawh Cao tak nyeep raoma, son ang lhiex lai lih mai haktiex tak ang lai chix plix mai pex tak grai grup khaing haktiex pa mhawm, pa tawx Simiang Siyiex ka pex.Ref 11:13-17 Krub 26:3-5; Pi 7:12-16; 28:1-14.
18 Mawh kheu nan, pex tak priex gumlox inkix pa hoik krai aux ka daux rhawm pex mai vien ti deuh awm mhai rug piang taix pex mai piang dong re pex.
19 Pex tak sidiex gau kawn praix pex ka gumlox an mai krai grawng an kix yam ngawm pex daux nyiex ma mai yam lawng pex krax mai yam it yam tum mai yam kaoh pex.
20 Maix tak tiiem ti deuh piang pang siviex nyiex pex mai piang siviex veng, Ref 11:18-20 Pi 6:6-9.
21 sonsang baox nie lang ju pex mai kawn praix pex khankix, sonsang baox nie pre haoh hun pex, ka daux haktiex pa hoik tiextu Simiang Siyiex tix tawx ka keeing pex khankix, awm rheung lang singai raoma piang haktiex kawx awm an.
22 Phan pex yuh satix mai priex ti hawt ka gumlox pingnyap pa tawm aux ka pex khawmuik, moh ka Simiang Siyiex pex mai hawt grawng lawng khaix Nawh Cao mai een rhawm ka Nawh Cao tom kaux cong,
23 Simiang Siyiex tak grheu ceu pui in khankix lih ka plak sivoe pex. Pex tak pon ti cie haktiex ceu pui pa nie lheu ting lhaong mai pa nie lheu ting riang rao khaing pex.
24 Ka dee hoik dig pex ka caong tix kudah tak mawh cie pex, jah khaing daux tiag tom hoek ka gawng Lebanon mai jah ka rawm Yufrethix tom hoek ka plak klip singaix rawm sigrit sigra tak mawh dee kwang pex.
25 Pui tix kaux kawx tak ang pon ti cung ka plak sivoe ngai pex, Ref 11:24-25 Yaw 1:3-5. Simiang Siyiex tak kieh pui lhat graung ka pex mai piang haktiex dee hoik dig pex khankix, awm lox pa hoik ah Nawh Cao ka pex.
26 “Jhak heue, Aux deuh krax nawb bwanson mai krax pa jhax lawg ka plak sivoe pex daux in singaix,
27 phan pex cu nghiet ka lox pingnyap Simiang Siyiex pex, ka pa tawm aux daux in singaix, pex tak pon krax nawb bwan.
28 Phan pex ang cu nghiet ka lox pingnyap Simiang Siyiex mai phan veeh ti khaing daux krax pa hoik tawm aux ka pex, daux in singaix mai hawt khaix siyiex tang kaux khankix, pa ang pex nyang sax tawng pex tak pon krax pa jhax lawg.
29 Yam hoik viex Simiang Siyiex pex laig ka daux haktiex pa sang hu teei pex ti cie, mai pex tak deuh krax pa nawb bwan piang gawng Gerizim mai jhax lawg piang gawng Ebalax.Ref 11:29 Pi 27:11-14; Yaw 8:33-35.
30 Grawng an kieh koe ka toi rawm klawng Yawdan, ka plak glip singaix, ka daux haktiex ceu pui Khanan, pa koe daux lung plak toi veng Gilagalax, hawt dex tiag khaox Piakvan More khankix ang mawh lie?
31 Pex tak sang tiang plak toi rawm klawng Yawdan mai laig daux haktiex pa sang teei pex ti cie, ka dee pa tawx Simiang Siyiex ka son pex mai ot ka daux haktiex an.
32 Pex tak priex ti hawt yuh awm lox lai beenli pa deuh aux khankix mai lox tat jhawm prawng pa deuh aux ka plak sivoe pex khankix daux in singaix heue.