1 Ka daux num jah simiang Darix kawn simex Ashoerux, ceu pui Medix kwang piang meung ceu pui Khaladie, 2 ka daux num jah nawh kwang ka haktiex, aux pa mawh Danyelax hoik tawng grawng phuk lai gumlox Siyiex pa hoik tawx ka cao jhai Yeramix, sonsang grum naog yuh Nawh Cao grawng ceu ankix ka daux atixgliah num, ka daux dee pa laux leeing veng Yerusaliem an khankix heue. Ref 9:2 Ye 25:11, 29:10 3 Mawh kheu nan, aux hoik veeh pakngai tix ka see plak Siyiex, pa mawh Siyiex, khyox khaw mai rawg bwan mai twah pa ih khawm ceep tix chee rhix mai nyaox khankix heue. 4 Aux hoik rawg bwan ka Siyiex, pa mawh Siyiex aux mai hoik deeh doh keud ka phimap tix ah nin, “Siyiex pa kied ting lhaong mai Siyiex pa khaw ti lhat graung kah, pa priex rien ka gumlox sijax mukheu tix mai pa koe krax caux rhawm ka pui an kix pa moh ka Nawh Cao mai ka pui an kix pa priex ti hawt gumlox ping nyap Nawh Cao heue. 5 “Ex hoik lud mai koe phimap. Ex hoik yuh ceu pa caox mai hoik tieh feen ka Maix Cao mai hoik singai hu khaing daux been pa deuh Maix Cao mai khawm lox tat jhawm prawng Maix Cao khankix heue. 6 Ex ang koe krax cu nghiet ka lox krai kawncau cao jhai Maix khankix ka daux ceu kaux Maix Cao, ka simiang yix khankix mai simiang khankix mai ka cub keeing yix khankix mai ka pui haktiex khankix khawmuik heue. 7 Siyiex eue, Maix Cao mawh pa rahsee, pakngai yix mawh pa kaig tua, awm koe an kix ka daux singaix in, ka pui meung Yudax, ka can pui pa ot ka daux veng Yerusaliem mai ka ceu pui Isarelax khankix pa ot dee dex ang ah mai pa ot dee singai ang ah ka daux haktiex khankix khawmuik, ka pui pa hoik grheu Maix Cao kix, kheu pa ang kix kaux sijax mai pa hoik lud kix ka Maix Cao heue. 8 Siyiex eue, krax kaig tua hoik koe ka plakngai yix, ka simiang yix, ka kawn lauxsimiang yix khankix, mai ka cub keeing yix, kheu hoik lud yix ka Maix Cao heue. 9 Viang ex hoik tieh feen ka Nawh kawx, Nawh Cao pa mawh Siyiex ex, mawh pa caux rhawm pa pluat ploi phimap heue. 10 Ex ang tie koe krax cu nghiet ka lox Siyiex, pa mawh Siyiex ex, sonsang hawt tix ka daux gumlox been Nawh khankix, pa hoik deuh Nawh Cao ka plak sivoe ex khaing kawncau cao jhai Nawh khankix heue. 11 Mawh heue, ceu pui Isarelax khawmuik hoik lud mai tang hu khaing been Maix Cao mai ang koe krax cu nghiet ka lox Maix Cao heue. Mawh kheu nan, krax pa jhax lawg mai krax pa tiextu, pa hoik tiiem ti ka daux gumlox been Mose, pa mawh kawncau Siyiex hoik glup piang yix, kheu hoik lud yix ka Nawh Cao heue. 12 Nawh Cao hoik sidah yuh gumlox pa hoik krai Nawh ti deuh ka ex mai ka cao prawng see, pa kwang piang ex khankix, ka daux krax pa kieh ceu pa laux leeing pa ting hoek piang ex heue. Grawh grawng nawh, ceu pa awm an ang sax mawh pa yuh tix ka greem raoma khawmuik, awm krax ceu pa hoik yuh tix ka veng Yerusaliem heue. 13 Awm pa hoik tiiem tix ka daux gumlox been Mose, krax pa laux leeing in khawmuik hoik bleeh ti hoek piang ex heue. Ex lai ang tie sax yuh krax pa rawg mhaing bwanson ka plak sivoe Siyiex pa mawh Siyiex ex, sonsang pon veeh ex ti hu khaing phimap ex khankix mai koe krax tawng yung ka pa mawh meh Maix Cao heue. 14 Mawh kheu nan, Siyiex hoik rien ti kieh krax pa laux leeing an hoek piang ex heue. Grawh grawng nawh, Siyiex pa mawh Siyiex ex, koe krax pa rahsee ka daux kaing pa yuh Nawh Cao khankix khawmuik, ex kawn ang cu nghiet ka lox Nawh heue. 15 Yam in Siyiex pa mawh Siyiex ex eue, Maix hoik viex ceu pui Maix Cao lih hu khaing daux meung Ejiptux, ka taix pa kied ting riang rao tix mai pa hoik yuh min ceu kaux cao tix koe, awm krax pa koe an ka daux singaix in, yix hoik lud mai hoik yuh pa caox heue. 16 Siyiex eue, awm koe krax pa rahsee Maix, aux rawg mhaing ti khyox khaw heue. Kieh krax pa song rhawm Maix mai khawm krax pa kied saux rhawm Maix mawh pa veeh ti luan khaing veng Yerusaliem, pa mawh gawng pa singax singeh Maix heue. Grawh grawng nawh, kheu phimap yix mai krax pa lud keeing yix khankix, veng Yerusaliem mai pui Maix khankix hoik lih mawh ceu pa koe lox salao ka can pui pa ot hawt vung viang yix khawmuik heue. 17 Yam in, Siyiex ex eue, nghiet ka lox bwan rawg kawncau Maix mai krax pa khyox khaw nawh khankix mai son ceu kaux Maix, kieh pa riang pakngai Maix jhan piang dee pa singax singeh Maix Cao, pa mawh dee pa riem an heue. 18 Siyiex aux eue, daong yhaok Maix mai nghiet liak, blah ngai Maix mai jhak ka dee pa laux leeing yix khankix mai ka veng pa hoik kok ka ceu kaux Maix liak, Mawh kheu yix ang tie viex krax pa khyox tix hoek ka plak sivoe ngai Maix, kheu pa rahsee tix khankix ang mawh, viang mawh nan, mawh kheu krax caux rhawm pa kied ting lhaong Maix heue. 19 Siyiex eue, nghiet liak, Siyiex eue, pluat ploi liak, Siyiex eue, paw ghlat tom rheung, son ceu kaux cao Maix liak. Siyiex aux eue, mawh kheu veng Maix Cao mai pui maix khankix mawh pa hoik kok ka ceu kaux Maix Cao heue.

20 Yam kawn sikah kawn rawg, kawn khyox khaw aux ka son phimap tix mai ka son phimap pui Isarelax khankix mai yam kawn pao aux lox pa khyox khaw ti ka plak sivoe Siyiex, ka son gawng pa singax singeh Siyiex aux heue. 21 Yam kawn rawg aux bwan, Gabrelax pa mawh pui, pa hoik yaox aux ka daux riang susai phao voe hoik nied ti pu hoek ka aux daux bawg yam krax tan plakbo heue.Ref 9:21 Luk 1:19, 26 22 Nawh krai lox ah nin ka aux, Danyelax eue, aux hoik bleeh ti hoek daux yam in, sonsang kieh maix koe pingnya cuyi mai krax lhak lhiem heue. 23 “Yam jah maix tix pao krax pa khyox khaw, gumlox hoik lih hu mai aux hoik hoek ti sang krai maix mhong heue. Grawh grawng nawh maix mawh pui pa hoik pon krax pa kied ting lhaong, mawh kheu nan, keud ti yaox grawng an mai tawng ka riang susai an heue. 24 Bawg yam atixgliah aliah bawg mawh pa hoik tat tix son pui maix khankix mai son veng pa singax singeh maix, sonsang naox yuh ti krax lud, sonsang sidah yuh phimap, sonsang yuh krax taoh son phimap, sonsang laig daux krax pa rahsee leeing ju, sonsang tawk ti deuh cum ka grawng riang susai an mai lox jhai an kix mai sonsang groi tix rawm bee ka dee pa kied singax singeh an heue. 25 Mawh kheu nan koe krax tawng, ka khaing hoik lih hu gumlox, sonsang deeh sum veng Yerusaliem, tom hoek yam koe simiang pa hoik kham krax pa groi rawm bee, tak sang koe aliah, aliah bawg heue. Khaix hoik luan bawg yam tixgliah ra aliah bawg, krax daux veng mai veng tak sang mawh pa deeh cox sum tix ka daux bawg yam pa tuktiak khankix heue. 26 Khaix hoik luan daux tixgliah ra aliah bawg, kaw pa hoik kham krax groi rawm bee an tak sang kham krax pah ti yum tom ang lai koe tidtix mai simiang pui khankix pa tak sang bleeh ti hoek, tak yuh veng mai dee pa singax singeh an khankix laux leeing heue. Dee sidah tak sang awm krax pa kheem rawm, mai tak koe naing tom hoek dee sidah mai krax laux leeing khankix mawh pa hoik tat tix heue. 27 Khaix an nawh tak kaux cong yuh sijax mukheu tix mai pui khankix tom nie, son tix vang twah heue. Ka daux tix plak vang twah an, Nawh Cao tak sang kieh krax tan pa appong mai krax tan khankix grai grup heue. Ka son tang krax tan khankix koe pa seeing brai mai tak koe pui tix kaux, pa yuh krax laux leeing, tom hoek ka daux bawg yam krax pa grai grup an khankix, pa mawh ceu pa hoik tat ti deuh mai hoik klup ti lih piang kaw pa yuh pa laux leeing an heue.”Ref 9:27 Dan 11:31, 12:11; Mat 24:15; Mak 13:14