1 Ka daux num kwang simiang Belashaza ka haktiex loe num tix num, riang susai hoik plak jhi ka aux Danyelax, mawh khaix hoik yaox aux riang susai phao voe heue. 2 Yam yaox aux ka riang susai an mai aux hoik yaox ka ot tix ka daux nyiex tab lhaong veng Shushan, pa koe ka daux haktiex Elam mai aux baox yaox ka hoik ot ti hawt rawm klawng Ulie, ka daux riang susai heue. 3 Yam yaog aux ngai tix jhak mai yaox ka yung mhaing pa koe rung ra mu pa cung hawt praok rawm klawng mai rung ra mu an hoik lhaong mai rung in tix mu nie lheu lhaong khaing an tix mu mai rung pa nie lhaong an tix mu, mawh pa ghoik tix kuah heue. 4 Aux hoik yaox preung yung mhaing an ti hu ka plak klip singaix, ka plak laong mai ka plak seh, totiag khankix tix mu kawx ang pon cung ka plak sivoe nawh mai pa pon glawd ti luan khaing daux taix nawh ang lai koe tix kaux kawx, viang mawh nan, nawh hoik yuh awm krax pa koe rhawm tix mai tang yaog tix ting lhaong heue. 5 Yam kawn keud aux ti yaox ka grawng ankix, pex mhaing tix mu hoik bleeh ti hoek sijaox khaing ka plak klip singaix mai hoik tah hu piang haktiex mai pa ang caong tix cux tiex mai pex an koe rung pa sidaing laoh lie ka daux sinax ngai nawh heue. 6 Khaix an nawh hu hoek ka yung mhaing pa koe rung ra mu, pa yaox aux cung hawt praok rawm klawng an mai to ti hoek glung ka nawh ka krax pa kied ting riang tix heue. 7 Aux hoik yaox ka hoek nawh dex yung mhaing an mai kied koe krax song rhawm ka nawh mai teed ka yung mhaing an mai hoik pot yuh rung nawh khawm ra mu heue. Yung mhaing an ang lai koe riang rao ti pon cung ka sivoe ngai nawh mai pex mhaing teed nawh goh piang tiex mai dig ti hu piang nawh mai pui tix kaux kawx ang lai pon ti taoh yung mhaing an khaing daux taix nawh heue. 8 Mawh kheu nan, pex mhaing an hoik yuh jhawm ti ting lhaong mai yam tak ting riang nawh rung pa ting an hoik pot mai khaix num rung an, rung pa sidaing laoh lie pon mu, hoik kuah ti haok ka plak see raoma pon pak heue. 9 Khaing ka daux an kix tix mu, hoik baox kuah rung pa iak tix mu mai hoik lhaong hu sinyek sinyek ka plak seh mai ka plak lih singaix mai ka plak dee pa kied mhawm haktiex heue. 10 Nawh hoik ting lhaong sinyek sinyek tom cux ka ceu pa koe raoma mai nawh teei ti tik ceu pa koe ka raoma khankix mai simuing khankix tiblah piang tiex mai dig ka an kix heue.Ref 8:10 Jhi 12:4 11 Nawh tang yaog tokaux tix ting lhaong awm krax pa ting lhaong Kawn lauxsimiang cao raoma mai krax pa appong khankix ku singaix, nawh hoik teei ti tik mai dee pa singax singeh Nawh Cao kawx hoik teei ti tik heue. 12 Kheu jao grawng koe krax pa lud, cub kru naing tix cub mai krax pa appong khankix ku singaix hoik ap ti tawx ka rung an heue. Nawh teei ti tik krax pa mawh meh lih piang tiex, nawh hoik yuh ceu inkix khawmuik mai hoik haok hwan ka heue. 13 Ref 8:13 Luk 21:24Khaix an aux mhong sikah pui pa singax singeh tix kaux mai pui pa singax singeh tang kaux an tix kaux chawk ka pui pa hoik sikah lox an tix kaux ah nin, “Mawh tak sang rheung riang susai grawng krax tan pa appong ku singaix an mai krax lud pa laux leeing an, ka daux krax pa kieh ti dee pa singax singeh mai cub kru naing khankix mawh pa kham krax dig miex grheung lie? 14 Nawh ah nin ka aux, tak rheung ra rheng loe yieh singaix. Khaix an dee pa singax singeh tak deeh mawh pa singax heue.

15 Yam hoik yaox aux Danyelax ka riang susai an mai kawn sawg aux tix tawng ka dee bleeh grawng an kix, koe pui tix kaux pa awm grang pakpeung kawn pui, cung sijaox ka plak sivoe aux heue. 16 Aux mhong lox pui khaing daux sinax praok rawm klawng Ulie, pa kok yo lox tix ah nin, “Gabrelax eue, kieh pui in tawng ka grawng riang susai in heue.” Ref 8:16 Luk 1:19, 26 17 Nawh hoek dex dee cung aux, mai yam hoek nawh, aux koe krax lhat graung mai gup pakngai tix piang tiex heue. Nawh ah nin ka aux, kawn pui eue, tawng ka grawng riang susai an, mawh pa dex dawd mai bawg yam sidah heue. 18 Yam kawn sikah nawh ka aux, aux gup pakngai tix piang tiex mai lhiak it tix heue. Nawh teeh aux ka taix tix mai yaog aux cung heue. 19 Nawh ah nin, “Jhak heue, aux sang kieh maix tawng ka ceu pa tak sang lih ti koe, ka daux bawg yam koe krax pa song rhawm daux singaix pa sang hoek heue. Grawh grawng nawh, in mawh pa hoik tat ti deuh bawg yam pa sidah du heue. 20 “Yung mhaing pa hoik yaox maix, pa koe rung ra mu an, mawh simiang haktiex Medix mai haktiex Pasha heue. 21 Pex mhaing an, mawh simiang haktiex Helasax heue. Rung ting pa koe ka daux sinax ngai nawh mawh simiang phao voe heue. 22 Phan mawh son rung pon mu an pa hoik kuah ti lhaong khaing daux dee koe rung pa hoik pot an mawh meung haktiex pon meung, pa tak sang yaog ti kaoh khaing daux haktiex an heue. Viang mawh nan, ang koe sibrawm awm nawh heue. 23 Ka daux bawg yam sidah sidu meung haktiex kix, yam hoik naog phimap pui pa lud khankix, simiang tix kaux tak sang yaog ti kaoh mai simiang an koe grang pa kied kin mai pa meed shiao tix krax ceu pie lhen heue. 24 Sibrawm nawh tak mawh pa ting, viang mawh nan, an ang tie mawh ka riang rao nawh, nawh tak sang yuh laux leeing pa kied koe krax lhat mai tak koe krax haok hwan heue. Nawh tak laux leeing yuh cub pui pa singax singeh cao pa kied ting riang rao khankix heue. 25 “Ka daux krax pa lhak lhiiem, nawh tak sang kieh pie lhen koe krax haok hwan greem taix nawh mai nawh koe rhawm pa ting lhaong ka daux tokaux tix, yam ang pui nyang tien khre rien tix, nawh yuh laux leeing tom nie heue. Nawh tak sang baox deeh yaox ti tieh feen ka simiang piang simiang, viang mawh nan, nawh tak mawh pa hoik pot tix laux, daux krax pa ang kawn pui yuh ka taix tix heue. 26 Grawng riang susai pa yaox ponbo mai ponngawb an khankix, tak mawh grawng ceu pa mawh meh heue. Mawh kheu nan maix nyeep tix priex ka lox grawng riang susai an awx. Grawh grawng nawh, an mawh grawng pa dex dawd mai singaix pa sang hoek tom nie heue. 27 Aux pa mawh Danyelax hoik yum pi mai koe krax saux ngia ka tom nie singaix heue. Khaix an aux yaog ti kaoh mai hu yuh ti tawx kaing jhaw simiang heue. Aux koe krax daox deng ka grawng riang susai an mai pui tix kaux kawx ang pon tawng ka dee bleeh an heue.”