1 Ka daux num kwang simiang Kurux haktiex Pasha loe num tix num, koe grawng pa plak jhi ka Danyelax pa hoik kok ceu kaux mawh Belatashaza, grawng an hoik mawh pa mawh meh, mawh grawng pa plak jhi naing ting mai nawh hoik tawng ka grawng an mai hoik tawng sidawng ka riang susai an heue. 2 Ka daux singaix ankix, aux pa mawh Danyelax hoik koe krax khi rhawm tom naog loe vang twah heue. 3 Aux ang lai ih priex preem pa nyawm tix ceu kawx mai khawm nex mai rawm plix siiet khankix ang lai laig ka daux jheeh aux mai ang lai awt tokaux tix ka rawm bee, tom hoik naog loe vang twah heue. 4 Ka daux khix tix tixnga pon ngaix, aux ot hawt rawm klawng ting Hetakelax heue. 5 Aux yaog ngai tix jhak mai yaox ka pui tix kaux pa ceep kraung man pa rhi, pa hoik rawd nyoi tix ka maox khri Upharax heue.Ref 10:5-6 Jhi 1:13-15, 2:18, 19:12 6 Kaux nawh awm siang simaox pa klai paing mai pakngai nawh awm riang pukplak praix mai ngai nawh awm kawk ngu mai plawng taix plawng caong nawh khankix, awm tawng lheung pa plang mai lox sikah nawh, awm lox sinum cub pui hun khankix heue. 7 Mawh ngie aux Danyelax tix kaux khaing pa hoik yaox ka riang susai heue. Can pui pa hoik ot tau mai aux khankix, ang tie pon ti yaox ka grawng an heue. Kix deeh tieh tix koe krax pa lhat graung pa kied ting lhaong mai kix to tix mox tokaux kix heue. 8 Mawh kheu nan, deuk ngie aux tix kaux khaing yam hoik yaox aux ka riang susai pa ting lhaong in mai aux hoik khrup ang lai koe riang rao pie ceeix kawx, pakngai aux kawx hoik khleep mai aux ang lai deeh pon ti koe riang ka heue. 9 Aux mhong lox nawh mai yam hoik mhong aux ka lox sikah nawh, aux hoik lhiak it mai gup pakngai tix piang tiex heue.

10 Khaix an taix tix khawn hoik teeh sijaox ka aux mai hoik kieh ngawng aux mai tawm taix aux siyaung heue. 11 Nawh ah nin ka aux, “Danyelax pa mawh pui pa kied moh eue, tawng ka gumlox can pa krai aux ka maix mai kaoh cung heue. Grawh grawng nawh, yam in aux mawh pui pa hoik ploi ti hoek ka maix heue.” Yam krai nawh gumlox in ka aux, aux hoik siyaung mai kaoh cung heue. 12 Khaix an nawh ah nin ka aux, “Danyelax eue, paw lhat graung! grawh grawng nawh, tom singaix jah maix hoik viex rhawm tix sonsang tawng maix grawng singaix pa sang hoek mai hoik pon gun rhawm tix ka plak sivoe Siyiex maix mai Nawh Cao hoik mhong ka gumlox maix mai aux kawx hoik hoek kheu gumlox Maix heue. 13 Viang mawh nan, simiang meung Pasha hoik tiebtie aux tixnga tix ngaix, khaix an Mikhelax pa mawh cao kaing ting tix kaux khaing daux cub Simiang khankix, hoik hoek tix teem ka aux heue. Aux tom deeh pon ot tan tau mai cub simiang haktiex Pasha khankix heue. Ref 10:13, 21 Jhi 12:7 14 Yam in aux hoek sonsang kieh maix tawng ka ceu pa tak sang lih ti koe piang ceu pui maix khankix ka daux singaix pa sang hoek, mawh kheu grawng riang susai an mawh pa dex dawd ka son singaix an tom nie mai son grawng pa sang hoek heue. 15 Yam krai nawh gumlox ankix ka aux, aux hoik gum pakngai tix lih piang tiex mai ang lai chix sikah heue. 16 Koe pui tix kaux pa awm kawn kawn pui hoik hu teeh sijaox siyieb jheeh aux mai aux hoik paoh daux jheeh tix mai ah nin ka nawh pa hoik cung ka plak sivoe aux heue. Cao Siyiex aux eue, mawh kheu jao yaox aux riang susai in, krax pa laux rhawm aux hoik kheem piang aux mai aux ang lai koe riang rao ka heue. 17 Kawncau cao Siyiex aux tak sang pon ti sikah tau mai maix, pa mawh cao Simiang aux yuh ka mawh lie? Phan mawh son aux, riang rao ang lai koe ka daux aux pie ceeix kawx, daux yam in mai krax pa toek bhawm kawx ang lai deuk pie ceeix kawx ka daux aux heue.” 18 Khaix an kaw pa awm grang pui tix kaux hoik baox hu teeh ka aux mai hoik kieh aux koe riang rao heue. 19 Nawh ah nin, “Pui pa kied moh eue, paw lhat graung kieh krax pa nhim koe piang maix mai teei riang rao mai kieh koe riang rao kah heue.” Yam sikah nawh ka aux, aux hoik koe riang rao mai aux ah nin, “Kieh cao Simiang aux krai lox tix heue. Mawh kheu maix hoik kieh aux koe riang rao heue. 20 Khaix an nawh ah nin, mawh tawng maix ka grawng pa hoek aux ka maix lie? Yam in, aux sang yaox ti ing puing ka simiang haktiex Pasha mai khaix hoik lih hu aux, simiang haktiex Helasax tak sang hoek heue. 21 Viang mawh nan, aux tak sang krai maix mhong grawng ceu pa hoik tiiem tix khankix ka daux phuk lai pa mawh meh heue. Lheu khaing Mikhelax pa mawh simiang pex, pui tix kaux kawx ang pon teem aux tiebtie ka simiang an kiex heue.”