24
Pui Yudax Yuh See Ka Pawlux
1 Khaix an phwan ngaix cao giex kaing li pa ting Ananix mai kuad song tix blah mai pui tix kaux pa kaux Teratulu, pa chix nih nai krai lox, lih hoek mai kix krai grawng Pawlux ka simiang heue.
2 Yam hoik kok Pawlux, Teratulu jah ti deuh phimap ka nawh ah nin, “Simiang Felit pa ting pa mhawm eue, kheu yaox ex, mawh kheu maix ex pon ti ot ka daux pa nhim mhawm mhawm mai grawng mawh kheu bwanson maix ceu pa caox khankix, deeh cox mhawm son meung in,
3 ex tom yaogyaw bwanson maix mai rieb ti teei nawh, ka daux kuceu khawmuik mai ku dah dee heue.
4 Viang mawh nan son ang aux baox kieh maix nyhap, aux khyox khaw maix, viex rhawm awn caux rhawm mai nghiet lox ex tix gum ra gum liak ha.
5 Mawh kheu yaox ex, grawng pui in mawh preng lukliak mai pa kieh pui tieh feen ka daux pui Yudax khankix piang haktiex khawmuik mai cao bung cub beenli Nazariet heue.
6 Viang mawh nyiex bwan kawx nawh yuh ti yaox, sonsang kieh seeing, ex tom giex nawh mai mie ti prawng ca nawh hawt been ex.
7 Viang mawh nan Lusi cao giex kaing naing pa ting, hoek ka ex mai nied tix rud rhim nawh hu khaing tawm taix ex heue.
8 Kieh pui pa deuh phimap ka nawh hoek ka maix. Phan tokaux maix chawk cheng nawh maix sang tawng grawng pa deuh ex phimap ka nawh mawh pa yuh ka mawx heue.”
9 Pui Yudax khankix kawx dhua ceu in khankix mawh pa caw heue.
Krai Lox Tiebtie Sivoe Ngai Simiang Filit
10 Khaix hoik yuh simiang mhai ka taix tix nhie Pawlux sikah, Pawlux krai lox ah nin, “Mawh kheu tawng aux, grawng hoik mawh maix cao prawng ca son pui meung in tom nie num, aux nie lheu koe krax gaux rhawm ti sang krai lox tiebtie, son tokaux tix heue.
11 Grawh grawng nawh maix pon ti tawng, grawng khaix hoik haok aux ti krub ka veng Yerusaliem, ang lheu khaing kao ra ngaix heue.
12 Viang mawh ka daux nyiex bwan ang ah, phan ang mawh nan ka daux nyiex sidiex khankix ang ah mai ka daux veng an ang ah kix ang yaox aux thung thiang ka pui tix kaux kawx mai cheeik cub pui heue.
13 Viang mawh ceu pa deuh kix phimap ka aux yam in kawx, kix ang pon jhi mhai rug heue.
14 Viang mawh nan aux krai doh ka maix, grawng hawt aux ka krax been pa ah kix ang khaw mai krub ka Siyiex tax du ex mai yum rhawm ka kuceu khawmuik, pa dex dawd mai lox lai beenli mai pa hoik tiiem ti deuh ka daux lai cao jhai khankix heue.
15 Kwe krax keud pot jun pot plak Siyiex, awm tokaux kix kawx krox jun ka grawng pui rahsee mai khawm pui pa ang rahsee tak sang deeh kaoh khaing krax yum heue.
16 Mawh kheu nan aux tom nied ti coca son rhawm aux dee chix keud tawng tak ang koe pa lud ka plak Siyiex mai plak kawn pui ku jheung jheung heue.
17 Khaix hoik luan num tom nie, aux hoek ka pui ceu aux, sonsang viex totaix ti yuh bwanson kah mai sonsang yuh krax tan heue.
18 Yam kawn yuh aux nan, kix yaox aux ka daux nyiex bwan, khaix hoik singax singeh mai ang ot tau mai cub pui pa khrawm paox tix mai ang koe krax lawh maw heue. Viang mawh nan pui Yudax meung Asix tix blah,Ref 24:17-18 Cau 21:17-28.
19 Khaw ti ot tin sivoe maix mai krai grawng pa deuh kix phimap, phan kix koe pa sang deuh phimap ka aux.
20 Phan ang mawh nan kieh tokaux pui pa ot tin khankix, krai grawng pa lud pa yaox kix, yam cung aux sivoe cub kuad song pa prawng ca.
21 Phan ang mawh lox in tix gum, pa hoik yo aux yam cung sinax kix, Aux kham geu ceu pa chawk cheng sivoe pex singaix, kheu grawng pa deeh kaoh im khaing krax yum heue.”Ref 24:21 Cau 23:6.
22 Viang mawh nan kheu simiang Felit nie lheu tawng grawng krax been an, nawh kawn grham pa prawng ca tix ah nin, “Yam lih hoek Lusi cao giex kaing naing pa ting sax, aux koi prawng grawng see pex heue.”
23 Nawh tawx lox ka cao giex kaing naing tix kaux, sonsang gang Pawlux, viang mawh nan nyawk ka yuh nawh mai son sang kieh raw paox grawm nawh khankix hoek ti khre rien nawh heue.
Moeng Simiang Filit Kok Pawlux
24 Khaix singaix tix blah simiang Felit hoek tau mai moeng nawh Drusila pa mawh pui Yudax mai kok Pawlux mai nghiet lox nawh grawng pa dex dawd mai krax yum rhawm ka daux Yesux Khrit heue.
25 Yam sidiex gau Pawlux ka grawng pa rahsee mai ka grawng pa priex rhawm tix mai grawng krax prawng ca pa tak sang hoek sax, simiang Felit die lhat kah ah nin, “Phao in hu dee hu maix ha mai yam tien aux mai mhawm bawg yam, aux tak kok maix hoek ka aux heue.”
26 Nawh keud pot jun pot grawng sang tawx Pawlux mau ka nawh, mawh kheu nan nawh tom nie kok Pawlux law lawx mai kum tau mai nawh heue.
27 Viang mawh nan khaix hoik naog ra num, Pawki Fittux, pon ti yuh simiang khaix simiang Felit mai kheu simiang Felit mie pui Yudax caw rhawm ka tix, nawh tom laung tix grham Pawlux heue.