25
Pawlux Rawg Ti Hu Ka Simiang Kesa
1 Khaix simiang Fittux hoik hoek ka daux haktiex an loe ngaix, nawh kaoh khaing veng Kesarix mai haok hu ka veng Yerusaliem heue.
2 Cao giex kaing li pa ting khankix mai kuad giex kaing pui Yudax khankix, krai lox ka nawh deuh phimap ka Pawlux mai kix khyox khaw ka nawh,
3 rawg mhaing nhie nawh yuh bwanson mai ploi ti kieh Pawlux hoek ka veng Yerusaliem. Kix keud kix yiag ti sang pah nawh yum yam lawng nawh krax heue.
4 Viang mawh kawx nan simiang Fittux deeh pawk ti krai, grawng hoik gang Pawlux ka veng Kesarix mai grawng tokaux nawh uik dex sang hu tan heue.
5 Nawh tom ah nin, “Kieh kix pa koe sibrawm ka daux pex, lih hu tau mai aux mai phan koe dee lud ka pui an, kieh kix deuh phimap ka nawh heue.”
6 Khaix hoik ot nawh sinax kix ang lheu khaing daix ngaix, phan ang mawh nan kao ngaix, nawh lih hu ka veng Kesarix mai ngaix pasax nawh ngawm piang dee ngawm tix prawng ca mai tawx lox nhie viex Pawlux hoek heue.
7 Yam hoik hoek nawh, pui Yudax khankix pa hoik lih hoek khaing veng Yerusaliem, cung rob nawh mai deuh phimap pa nu pa khawm tom nie ka nawh, pa ang kix pon ti jhi mhai rug kah heue.
8 Pawlux krai lox tiebtie phimap ti ah nin, “Viang mawh ka been pui Yudax ang ah, ka nyiex bwan ang ah, ka simiang Kesa ang ah, aux ang lud tidtix heue.”
9 Mawh kheu mie simiang Fittux ti pon plakngai pa khaw rhawm pui Yudax, nawh tom deeh pawk ti chawk Pawlux ah nin. “Maix sang haok hu ka veng Yerusaliem mai kham pa prawng ca ka grawng ceu in khankix sivoe aux lie?”
10 Viang mawh nan Pawlux ah nin, “Aux uik cung sivoe dee ngawm ti prawng ca simiang Kesa, dee khaw ti prawng ca aux. Awm maix kawx hoik tawng mhawm mhawm, aux ang sax lud tidtix ka pui Yudax khankix heue.
11 Mawh kheu nan phan aux mawh pui lud mai hoik yuh pa khaw ti yum tix ceu ceu, aux ang thiang ti yum, phan grawng pa deuh kix phimap ka aux khankix mawh pa ang mawh meh, pui tix kaux kawx ang pon ti tawx pong aux ka kix heue. Aux khyox khaw ti deuh rhawm ka simiang Kesa heue.”
12 Yam an khaix hoik kum kawng simiang Fittux mai cub kuad cao prawng ca, nawh deeh pawk ah nin, “Maix hoik khyox khaw ti deuh rhawm ka simiang Kesa maix tak hu ka simiang Kesa heue.”
Pawlux Plak Sivoe Ngai Akrippax
13 Khaix hoik luan ngaix tix blah ang awt rheung, simiang Akrippax mai Beranit hoek ka veng Kesarix, sonsang nawb ka simiang Fittux heue.
14 Kix ot tan tom nie rheung singaix nyao, simiang Fittux krai grawng see Pawlux ka simiang ah nin, “Koe pui tix kaux pa hoik laung simiang Felit ti prah ploi,
15 yam ot aux ka daux veng Yerusaliem, cao giex kaing li pa ting khankix mai kuad song pui Yudax khankix, krai grawng nawh mai mhaing tix kieh aux prawng phimap nawh heue.
16 Aux tom krai ka kix grawng ang khaw mai been pui Romax, ti tawx pong pui tix kaux kawx sonsang ciyang, ka ang nawh nyang bax pon ti taing tawx ka pakngai pui pa deuh phimap ka nawh mai hoik pon ti krai lox tiebtie ka grawng phimap ceu pa hoik deuh piang nawh heue.
17 Mawh kheu nan khaix hoik khrawm kix paox tix tin, aux ang lai nien mai ngaix pasax aux ngawm piang dee ngawm ti prawng ca mai tawx lox nhie kix viex pui an hoek heue.
18 Yam hoik kaoh cung pui pa deuh phimap ka nawh, kix ang deuh phimap ceu pa caox tidtix, awm pa hoik grux keud ce aux kix sang deuh heue.
19 Viang mawh nan kix deuh phimap ka nawh, grawng ceu pa dex dawd mai been bwan kix mai grawng Yesux tix kaux, pa hoik yum mai pa dhua Pawlux Nawh kawn im heue.
20 Kheu sivix aux, keud ang doh, grawng khaw ti chawk cheng ka grawng ceu in khankix yuh ka mawx, aux tom chawk Pawlux, ka grawng nawh sang hu ka veng Yerusaliem mai kham pa prawng grawng ceu in khankix tan lie.
21 Mawh kheu Pawlux hoik khyox khaw sonsang priex tix, ti kieh simiang ting Awgutux prawng see nawh, aux tom tawx lox kieh priex nawh, tom sang ploi aux nawh hu ka simiang Kesa heue.”
22 Simiang Akrippax ah nin ka simiang Fittux, “Tokaux aux kawx mie ti nghiet lox pui an heue.” Simiang Fittux deeh pawk ah nin, “Ngaix pasax maix tak mhong nawh heue.”
23 Mawh kheu nan ngaix pasax yam simiang Akrippax mai Beranit hoik viex sinngao pa ting mai hoek, kiex laig dee nghiet lox see tau mai cao giex kaing naing pa ting khankix mai khawm pui pa ting lhaong ka daux veng an, yam tawx simiang Fittux lox, kix viex Pawlux hoek heue.
24 Simiang Fittux ah nin, “Simiang Akrippax mai pui pa ot tau mai ex tin khawmuik eue, pex pon ti yaox pui in, pui Yudax pa ot ka daux veng Yerusaliem khawmuik mai pa ot tin kawx, hoik yo ti ah nin ka aux, kaw in ang keung ti kawn baox klawd heue.”
25 Viang mawh nan aux yaox grawng nawh ang yuh ceu pa keung nawh ti yum mai mawh kheu hoik khyox khaw nawh ti deuh rhawm ka simiang ting Awgutux, aux tom yiag tix sang ploi nawh hu tan heue.
26 Aux ang koe ceu pa sidawng ti sang tiiem grawng nawh ka simiang ting ex tix ceu kawx, mawh kheu nan aux tom viex nawh lih sivoe pex mai lheu khaing paox tix, ka sivoe maix simiang Akrippax eue, yuh ka mawx khaix hoik chawk cheng ka nawh, aux tak koe grawng ceu pa tiiem tix heue.
27 Mawh kheu phan aux keud ti yaox, ang khaw ti ploi pui pa hoik laung hu, phan ang jhi ang krai grawng pa deuh phimap ka nawh heue.”