23
1 Pawlux jeung ka cub kuad song cao prawng ca khankix ah nin, “Puxaik khankix eue, aux hoik yuh ceu pa khaw aux ti yuh sivoe Siyiex tom sidah hoek ngaix in mai rhawm aux ang koe dee deuh phimap ka tokaux tix ka grawng an heue.”
2 Cao giex kaing li pa ting Ananix nhie kix pa cung liep nawh, simang jheeh nawh heue.
3 Yam an Pawlux ah nin ka nawh, “Siyiex tak sang lah ka maix, pa awm ding pa kraix simaox ceed eue Ref 23:3 Mat 23:27-28.maix ngawm sonsang prawng aux hawt lox lai beenli mai nhie pui lah aux ka pa ang khaw mai been lie?”
4 Kix pa cung dex tan chawk ah nin, “Maix lai map ka cao giex kaing li pa ting Siyiex lie?”
5 Pawlux deeh ah nin, “Puxaik khankix eue, aux ang tawng grawng mawh nawh cao giex kaing li pa ting, mawh kheu hoik tiiem ti deuh ah nin, maix tak ang ah lox pa caox grawng cao giex kaing pui ceu maix heue.”Ref 23:5 Lih 22:28.
6 Viang mawh nan yam tawng Pawlux grawng cub kuad song cao prawng ca khankix, tix blah mawh Sadukie mai tix blah mawh Pharishie, nawh yo lox sinum sinax kix ah nin, “Aux mawh Pharishie, pa mawh kawn Pharishie Ref 23:6 Cau 26:5; Phim 3:5.mai aux kham geu pa chawk cheng tin, kheu keud pot jun pot aux ka ceu pa sang deeh kaoh im khaing krax yum heue.”
7 Khaix hoik ah nawh nan, Pharishie mai Sadukie khankix thung thiang ang khaw paox tix mai cub kuad song cao prawng ca khankix, tang gwieh tix heue.
8 Mawh kheu Sadukie khankix dhua krax deeh kaoh khaing krax yum ang koe, viang mawh kawncau Siyiex mai khawm khuan kawx, kix dhua ang koe.Ref 23:8 Mat 22:23; Mak 12:18; Luk 20:27. Viang mawh nan, Pharishie khankix ah, koe khawm ra ceu heue.
9 Yam an lih mawh krax lawh maw pa ting mai pui tiiem lai plak Pharishie tix blah, kaoh cung mai riex thiang ah nin, “Ex ang yaox pa caox ka daux pui in ceeix kawx, viang mawh khuan phan ang mawh nan kawncau Siyiex hoik sikah mai nawh kawx, mawh pa yuh ka mawx?”
10 Yam kix nie ang khaw, ting thung thiang paox tix, cao giex kaing naing pa ting lhat kix rud Pawlux tom mawh khik mawh phoi, nawh tom tawx lox kieh pui naing hu teei nawh lih khaing sinax kix mai viex nawh laig ka dee ot pui naing heue.
11 Daux sawm ngaix pasax, Simiang Yesux cung liep nawh ah nin, “Kieh koe rhawm kaux rhawm cong heue, awm hoik kham maix mhai rug grawng Aux ka veng Yerusaliem, viang mawh ka veng Romax kawx maix tak lai kham mhai rug yuh nan heue.”
Sang Teei Ju Pawlux Yum
12 Yam hoik riang praix pui Yudax tix blah yuh sijax mai vien rhawm tix tau greem lox tiex tu ah nin, “Ka ang ex nyang bax pon ti teei Pawlux yum ex ang ih ang nyaux heue.”
13 Kix pa hoik yuh sijax yuh nan koe tixpon kaux haoh heue.
14 Kix hu ka cao giex kaing li pa ting khankix mai kuad song khankix ah nin, “Ex hoik vien rhawm tix tau greem lox tiex tu pa ting, son ang ex sang cim tix yaox tidtix, tom hoik teei Pawlux yum heue.
15 Mawh kheu nan pex khawm cub kuad song cao prawng ca khankix, nhie cao giex kaing naing pa ting viex Pawlux lih hoek ka pex mai yuh awm sang mie pex tix nie grum cox chawk nawh mai ka sang hoek nawh dex tin ex hoik rien tix pah nawh yum heue.”
16 Viang mawh nan kawn simex nan Pawlux mhong grawng sang jawm kix nawh mai nawh hu laig dee ot pui naing mai krai ka Pawlux heue.
17 Pawlux kok cao giex kaing naing tix kaux hoek ka tix ah nin, “Viex pui awn ju in hu ka cao giex kaing naing pa ting liak, kheu koe nawh grawng pa sang krai ka nawh tix ceu ceu heue.”
18 Mawh kheu nan nawh teei kaw an mai viex nawh hu ka cao giex kaing naing pa ting ah nin, “Pawlux pa hoik laung an kok aux hoek ka nawh mai nhie aux viex pui pa awn ju in hoek ka maix, pa koe lox pa sang krai ka maix tix ceu ceu heue.”
19 Cao giex kaing naing pa ting an teei taix nawh mai hu dee ang pui ot mai chawk nawh nong nong ah nin, “Ceu pa koe maix ti sang krai ka aux, mawh pa yuh ka mawx?”
20 Nawh ah nin, “Pui Yudax hoik ih rhawm paox tix, sonsang nhie maix viex Pawlux lih hu ka dee prawng ca pasax mai yuh awm sang simie kix tix nie grum cox chawk grawng nawh heue.
21 Mawh kheu nan maix paw cu lox kix liak, kheu pui ka daux kix tixpon kaux lheu pau tix jawm son nawh, pa hoik vien rhawm tix tau greem lox tiex tu, son ang sang ih sang nyaux tom hoik pah kix nawh yum heue. Yam in kix hoik rien tix mai krox son lox khaing maix heue.”
22 Cao giex kaing naing pa ting an, ploi pui awn ju an hu, khaix hoik tawm nawh ka lox ah nin, “Paw krai ka pui tix kaux kawx, ceu pa hoik krai maix ka aux grawng ceu inkix heue.”
Viex Pawlux Hu Ka Simiang Filit
23 Cao giex kaing naing pa ting an kok cao giex kaing naing greem nawh ra kaux hoek ka tix ah nin, “Rien pui naing ra yieh sonsang hu tom hoek ka veng Kesarix, ka daux sawm in yam loe nari mai pui naing brug brung atixgliah kaux mai pui naing klawm pliah ra yieh awx.”
24 Brung pa sang brug Pawlux kawx nawh nhie kix khre, sonsang pon ti viex nawh hoek ka simiang Felit mhawm mhawm heue.
25 Lai kawx nawh tiiem hu pa ah nin,
26 “Aux pa mawh Klawdi Lusi tawx lai ka simiang Felit pa ting pa mhawm heue. Kieh nyawm ot siu koe liak.
27 Pui Yudax khankix giex pui in mai yam dex sang pah kix nawh yum, aux teei pui naing mai lih hu ka kix mai taoh nawh, kheu hoik tawng aux grawng mawh nawh pui Romax heue.
28 Kheu mie aux tix tawng, grawng deuh kix phimap pa yuh ka mawx ka nawh, aux tom viex nawh lih ka cub kuad song cao prawng ca kix heue.
29 Aux yaox grawng pa deuh kix phimap ka nawh, mawh pa dex dawd mai been kix, viang mawh nan ang koe ceu pa deuh phimap ka nawh, ceu pa keung nawh tix yum, phan ang mawh nan pa keung ti phyawk ti laung nawh kheu heue.
30 Yam pon aux ti mhong grawng hoik keud ti sang yuh pa ang mhawm ka pui in, aux tom ploi nawh hu ka maix dom mawx dom an mai nhie pui pa deuh phimap ka nawh, hu krai grawng nawh ka sivoe maix heue.”
31 Pui naing khankix teei Pawlux, awm pa hoik nhie ka kix mai viex nawh hu yam ponsawm tawx ka Antipatri heue.
32 Viang mawh nan ngaix pasax kix prah pui naing brug brung khankix hu tau mai Pawlux mai deeh ing ka dee ot pui naing heue.
33 Yam kix hoek ka veng Kesarix, teei ti tawx lai an ka simiang mai Pawlux kawx kix teei ti tawx sivoe nawh heue.
34 Khaix hoik phat nawh lai an, nawh chawk ka Pawlux grawng mawh nawh pui meung mawx mai khaix hoik tawng grawng mawh nawh pui meung Kiliki,
35 Nawh ah nin, “Aux tak nghiet maix grum ha, khaix pui pa hoik deuh phimap ka maix kawx hoik hoek.” Simiang tawx lox nhie gang Pawlux ka daux nyiex haw simiang Herut heue.