22
1 “Puxaik mai keeing khankix eue, nghiet lox pa sang tiebtie aux ka grawng ceu pa deuh phimap ka aux mai ka pex yam in heue.
2 Yam mhong kix, nawh sikah ka kix, ka lox Hebrie, kix nie lheu yawg tix heue. Nawh ah nin,
3 “Aux mawh pui Yudax, pa keh ka daux veng Tasux, meung Kiliki, viang mawh nan hoik eei aux ting daux veng in, ka caong Gamalelax Ref 22:3 Cau 5:34-39.mai hoik gau aux ka lox been tax keeing mai ang kluik ang khluk khlaik mai koe rhawm tix son Siyiex, awm koe pex khawmuik singaix heue.
4 Aux tuktiak ka krax been in, tom teei yum mai phyawk khawm simex khawm bun tawx ti sau daux thawng khankix heue.
5 Awm cao giex kaing li pa ting mai khawm cub kuad song khankix mawh mhai rug son aux. Ka kix kawx aux pon lai son puxaik khankix mai lawng krax hu ka veng Damase sonsang phyawk ti viex kix hoek ka veng Yerusaliem, sonsang ciyang kix heue.Ref 22:4-5 Cau 8:3; 26:9-11.
Krai Grawng Tieh Loh Nawh tix
(Kawn 91-19; 26:12-18)
6 Yam hu aux krax mai hoek dex ka veng Damase, yam dex jung singaix, dom mawx dom an pa riang pa ting jhan lih khaing raoma mai jhan rob aux heue.
7 Aux goh gup piang tiex mai mhong lox pa ah nin ka aux, Sawlux eue, Sawlux eue, maix lai tuktiak Aux yuh ka mawx?
8 Aux deeh chawk ah nin, Simiang eue, Maix mawh mawx? Nawh deeh ah nin ka aux, Aux mawh Yesux pui veng Nazariet, pa tuktiak maix kah heue.
9 Kix pa ot tau mai aux yaox pa riang an tete mai lhat graung kah, viang mawh nan kix ang mhong lox Kaw pa sikah mai aux heue.
10 Aux deeh chawk ah nin, Simiang eue, aux tak lai yuh ka mawx? Simiang deeh ah nin ka aux, “Kaoh mai laig ka daux veng Damase mai tak sang krai grawng kuceu ka maix dee an, pa hoik ciak ti deuh sonsang yuh maix heue.”
11 Yam ang aux chix yaox kheu pruh pa riang an, pui pa hu tau mai aux tok taix aux hu mai aux tom hoek ka daux veng Damase heue.
12 Pui tix kaux pa kaux Ananix, pa chix nab yam hawt lox lai beenli, pa yaw pui Yudax pa ot tan khawmuik kah,
13 hoek ka aux mai cung liep aux ah nin ka aux, “Pux Sawlux eue, kieh maix chix yaox heue. Daux nari dom an aux deeh chix yaox mai yaog ti jhak ka nawh heue.
14 Nawh baox ah nin, Siyiex tax keeing ex, hoik ciak tix kieh maix tawng alo Nawh Cao mai kieh maix yaox Kaw pa rahsee mai sonsang mhong lox pa lih khaing jheeh Nawh heue.
15 Mawh kheu maix tak lai mawh pui kham mhai rug son Nawh ka pui khawmuik khawm leeing, ka grawng pa hoik yaox hoik mhong maix heue.
16 Yam in maix kawn gla yuh ka mawx? Kaoh, kok ka ceu kaux Nawh mai cubcom ka daux rawm mai sigrhah phimap maix luan heue.
Kok Pawlux Sidiex Pui Tang Ceu
17 Khaix hoik deeh ing aux ka veng Yerusaliem mai yam rawg aux bwan ka daux nyiex bwan, aux liplu,
18 mai yaox Nawh ah nin ka aux, Nied ti lih hu khaing veng Yerusaliem laung laung, mawh kheu ang kix rieb ti teei lox pa kham maix mhai rug grawng Aux heue.
19 Aux deeh ah nin, “Simiang eue, tokaux kix hoik tawng grawng aux sau daux thawng mai tap toi ka kix pa yum rhawm ka Maix, ka daux nyiex sidiex ku lhang heue.
20 Yam lih nham Sathephan pui pa kham mhai rug son Maix, aux kawx cung dex tan mai kieh yuh mai priex kraung ceep kix pa pah nawh yum heue.Ref 22:20 Cau 7:58.
21 Nawh Cao baox ah nin ka aux, “Lih hu heue, mawh kheu Aux sang ploi maix hu dee singai khaing tin, ka pui tang ceu khankix heue.”
Cao Kaing Naing Giex Ti Chawk Pawlux
22 Kix nghiet lox nawh tom hoek lox pa ghoik an mai kix yaog lox tix yo ah nin, “Tik pui pa yuh nin khaing haktiex, kheu ang keung ti kieh nawh klawd heue.”
23 Yam kawn tak yo kix, kix peeik kraung ceep tix mai rhuat phawng tiex dee lhaong,
24 mai cao giex kaing naing pa ting an tawx lox kieh viex Pawlux laig ka daux dee ot pui naing mai nhie sivied ti chawk nawh, sonsang tawng nawh grawng lox pa yo kix ti deuh phimap ka Pawlux mawh grawng pa yuh ka mawx.
25 Khaix hoik phyawk kix nawh ka maox hak, Pawlux ah nin ka cao giex kaing naing pa cung dex tan, “Pa sivied maix pui pa mawh pui Romax, pa ang nyang bax prawng ca, khaw mai beenli lie?”
26 Yam mhong cao giex kaing naing an lox an, nawh hu ka cao giex kaing naing pa ting mai krai ka nawh ah nin, “Maix dex sang yuh pa yuh ka mawx?” Mawh kheu pui in mawh pui Romax heue.
27 Cao giex kaing naing pa ting an hoek mai chawk ah nin ka Pawlux, “Krai ka aux liak, mawh maix pui Romax lie?” nawh deeh ah nin, “Mawh heue.”
28 Cao giex kaing naing pa ting an deeh ah nin, “Aux pon tix mawh pui Romax, kheu hoik kied nie tawx mau heue.” Pawlux baox ah nin, “Phan mawh aux, hoik keh tix mawh pui Romax heue.”
29 Yam an kix pa dex sang chawk cheng lih hu khaing nawh dom mawx dom an, cao giex kaing naing pa ting an kawx, lhat kah, yam tawng nawh, grawng mawh nawh pui Romax, kheu hoik phyawk nawh Pawlux heue.
Viex Pawlux Hu Sivoe Ngai Kuad Song
30 Viang mawh nan ngaix pasax, kheu simie nawh tix tawng sidawng, grawng deuh pui Yudax phimap ka nawh ka grawng pa yuh ka mawx, nawh tom kah maox ceeng khaing Pawlux mai tawx lox nhie cao giex kaing li pa ting khankix mai cub kuad song pa prawng ca khawmuik khrawm paox tix mai viex Pawlux lih mai deuh nawh sivoe kix heue.