14
Daux Veng Ikawnix
1 Ka daux veng Ikawnix kix khrawm ti laig tau ka daux nyiex sidiex pui Yudax mai sidiex gau tom yum rhawm pui hun, pa mawh pui Yudax mai khawm pui Helasax heue.
2 Viang mawh nan pui Yudax pa ang koe krax cu nghiet khankix, cheeik rhawm pui tang ceu khankix mai kieh kix caox ka puxaik khankix heue.
3 Mawh kheu nan kix ot tan tom rheung mai viex rhawm kwa sidiex gau ka daux Siyiex. Siyiex kawx, kham mhai rug ka gumlox bwan Nawh, kieh yuh mhai mai ceu pa daox deng, ka taix kix heue.
4 Viang mawh nan pui veng an ang khaw caw paox tix, tix blah ot plak pui Yudax khankix mai tix blah ot plak kawncau pa ting heue.
5 Yam sang khrawm pui tang ceu mai pui Yudax khawm simiang giex kaing kix khankix, ti hu sonsang yuh ceu pa ang cee cak ka kawncau pa ting mai dheem kix ka simaox.
6 Kix mhong grawng an mai to hu ka veng Lusatra mai veng Derabe mai haktiex sivie siveng tan, daux meung Lukawnix,
7 mai kix sidiex gau lox bwan gaux rhawm tan heue.
Pa Lih Ti Mawh Daux Veng
8 Ka daux veng Lusatra koe pui pa ngawm tan tikaux, pa laux caong, pa hoik laux maung khaing vaig miex tix mai pa ang sax hu ka caong tix, tix bawg kawx heue.
9 Kaw an mhong pa sidiex Pawlux heue. Pawlux jeung ngai tix piang kaw an mai kheu yaox grawng nawh koe krax yum rhawm sonsang kieh tix deeh mhawm,
10 Mai kok lox sinum ah nin, “Kaoh cung ka caong tix rahsee heue.” kaw an jaloh kaoh mai hu ka caong tix heue.
11 Yam yaox pui hun ceu pa hoik yuh Pawlux, kix yo lox sinum ka lox meung Lukawnix ah nin, “Siyiex khankix hoik lih hoek ka ex, awm riang kawn pui heue.”
12 Kix kok Banabax mawh “Zusa,” mawh kheu Pawlux mawh pa nie lheu sidiex, kix kok nawh mawh “Heumi” heue.
13 Yam an cao giex kaing li Zusa, pa ot sivoe veng, viex mawie mai tai pa hoik taing laklo khankix, ka siviex mai koe rhawm ti sang tan tau mai cub pui hun khankix heue.
14 Viang mawh nan yam mhong kawncau pa ting Banabax mai Pawlux grawng an, kiex riah kraung ceep tix mai hu plab sinax cub pui hun khankix, kok yo,
15 ah nin, “Pui khankix eue, pex lai yuh ceu inkix yuh ka mawx? Yiex kawx mawh kawn pui, pa koe ceu pa chix keud awm pex mai viex lox gaux rhawm hoek ka pex, sonsang deeh tieh pex khaing ceu pa giex going inkix, ka Siyiex pa im ju, Kaw pa hoik yuh raoma mai haktiex mai rawm sigrit sigra mai can pa koe ka daux kix khawmuik heue.
16 Daux ju pa hoik luan khankix, Nawh hoik kieh ceu pui kuceu khawmuik, hawt yuh krax pa lak keud kix heue.
17 Viang mawh nan Nawh ang grham tokaux tix, ti ang koe ceu pa kham mhai rug, kheu Nawh hoik yuh pa mhawm mai tawx rawm lhiex khaing raoma ka pex mai bawg yam pa piien plix, kieh rhawm pex sak ka pa ih mai pa gaux rhawm heue.”
18 Kiex ne raw cub pui hun khankix ka lox ceu in, son ang sang yuh krax tan ka kiex heue.
19 Yam an pui Yudax khankix hoek khaing veng Antiuk mai veng Ikawnix mai khaix hoik nyaw glaw kix mai pon cub pui haoh, kix dheem Pawlux ka simaox mai kheu ce kix nawh hoik yum, tom reu nawh lih khaing veng an heue.
20 Viang mawh nan yam cung kawncau khankix rob nawh, nawh kaoh cung mai deeh laig ka daux veng heue. Ngaix pasax nawh lih hu khaing tan, tau mai Banabax mai hu ka veng Derabe heue.
Deeh Hoek Ka Veng Antiuk
21 Yam hoik sidiex gau kiex lox bwan gaux rhawm ka veng an mai hoik yuh kieh koe kawncau mau soi tom nie, kiex deeh ing ka veng Lusatra mai ka veng Ikawnix mai ka veng Antiuk.
22 Kieh rhawm kawncau mau soi khankix kaux cong mai sidiex gau kix yuh ka mawx son kawn sang ot ka daux krax yum rhawm mai krai ka kix yuh nin, “Ex tak lai kham geu pa kha rhawm tix tom nie, mai laig ka daux meung Siyiex heue.”
23 Kiex laug ti teei pui pa bung kaing ceu cao, ka daux ku ceu cao son kix mai khaix hoik rawg kix bwan mai twah pa ih, kiex tawx pong kix ka Simiang Yesux Khrit pa hoik yum rhawm kix kah heue.
24 Kiex hu preeng ka daux meung Pisidix mai hoek ka meung Pampuli.
25 Khaix hoik sidiex gau kiex lox bwan ka daux veng Perage, kiex lih hu ka veng Attali,
26 mai kiex brug reu hu khaing tan ka veng Antiuk, ka dee hoik tawx hoik pong kiex ka bwanson Siyiex, son kaing pa hoik yuh kiex heue.
27 Khaix hoik hoek kiex tan mai hoik raug rum grum phroik tau mai pui ceu cao khawmuik, kiex krai grawng ceu pa hoik yuh Siyiex tau mai kiex kuceu khawmuik mai grawng hoik paoh Nawh siviex krax yum rhawm ka pui tang ceu khankix heue.
28 Kiex ot tau mai kawncau mau soi khankix tan rheung nyao heue.