1 Ka daux ceucao pa koe ka daux veng Antiuk, koe pui pa mawh cao jhai mai cao gau, pa mawh Banabax mai Simeon pa kok mawh Nika. Mai Lukix pui meung Kurene mai Manaen pa hoik yuh ti mawh puxaik simiang Herut mai Sawlux heue. 2 Yam kawn tak krub kix ka Simiang Yesux mai twah pa ih. Khuan Singax Singeh ah nin, “Gwieh ti een Banabax mai Sawlux, son kaing pa hoik kok Aux kiex yuh heue.” 3 Khaix hoik twah kix pa ih mai rawg bwan. Mai hoik deuh taix tix piang kiex. Kix ploi kiex hu heue.

4 Mawh kheu Khuan Singax Singeh ploi kiex hu. Kiex lih hu ka veng Selukix mai kiex brug reu tan hu ka klawn tiex Kuparux heue. 5 Yam ot kiex ka daux veng Salamix, kiex sidiex gau lox bwan Siyiex ka daux nyiex sidiex pui Yudax khankix. Viang mawh Yohan kawx kiex koe son cao teem heue. 6 Khaix hoik lai ling kix ka daux klawn tiex an khawmuik, kix hoek ka veng Phapux mai yaox cao sibawk tix kaux, pa mawh cao jhai pa ang mawh ang meh, pa mawh pui Yudax, pa kaux Bayesux heue. 7 Nawh ot tau mai simiang Seragix Pawlux pa mawh pui pa lhak pa tawng. Simiang aux kok Banabax mai Sawlux hoek ka tix mai sawg ti mhong ti nghiet gumlox Siyiex heue. 8 Eluma cao sibawk an mawh kheu toe ceu kaux nawh dee bleeh mawh nan heue. Kieh tie kix mai sawg ti kieh simiang an via khaing krax yum rhawm heue. 9 Viang mawh nan Sawlux, pa kok khawm ceu kaux Pawlux, naog ka Khuan Singax Singeh mai jeung ngai tix piang kaw an, 10 ah nin, “Pui pa naog mai pa nieb pie lhen mai pa caox caig kuceu khawmuik, kawn phicaox eue, maix pa mawh pa koeng ka pa rahsee khawmuik maix tak ang naox, ceu pa yieh krax pa rahsee Simiang Yesux lie? 11 Yam in, jhak heue, taix Simiang hoik koe piang maix mai maix tak dug ngai ang chix yaox singaix tix vong heue.” Dom mawx dom an paiawm mai pa faik grhup piang nawh mai nawh vuvie sawg pui pa sang tuk taix tix heue. 12 Yam yaox simiang an grawng pa hoik yuh nan, nawh yum rhawm kheu daox deng nawh ka lox sidiex lox gau Simiang Yesux heue.

13 Pawlux mai cub nawh brug reu kaoh khaing veng Phapux mai hoek ka veng Perage pa koe ka daux meung Pampuli mai Yohan gwieh khaing kiex tan mai deeh ing ka veng Yerusaliem heue. 14 Kiex kaoh khaing veng Perage mai hoek ka veng Antiuk ka daux meung Pisidix mai kiex laig ka daux nyiex sidiex singaix twah mai ngawm heue. 15 Khaix hoik phat lai beenli mai lai cao jhai khankix, pui giex kaing nyiex sidiex an khankix, ploi pui hu ka kiex ah nin, “Puxaik eue, phan pax koe lox sidiex ka pui khankix tix ceu ceu, sidiex heue.” 16 Pawlux kaoh cung yuh kix yaox taix tix ah nin, “Pui Isarelax mai pui pa lhat ka Siyiex khankix eue, nghiet ha. 17 Siyiex pui ceu Isarelax in, hoik laug tax du ex mai yaog pui khankix ting, yam mawh kix nyo ka daux haktiex meung EjiptuxRef 13:17 Lih 1:7. mai Nawh teei plawng taix pa hoik yaog lhaong tuk kix lih khaing tan heue.Ref 13:17 Lih 12:51. 18 Son dex tixpon num Nawh priex kix ka daux tiag awm Keeing pa chix eei heue.Ref 13:18 Si 14:34; Pi 1:31. 19 Khaix hoik yieh Nawh pui aliah ceu laux ka daux haktiex meung Khanan,Ref 13:19 Pi 7:1. Nawh tawx haktiex ankix ka kix, sonsang mawh sin, son dex pon yieh tixphwan num heue.Ref 13:19 Yaw 14:1. 20 Khaix an Nawh tawx cao prawng ca ka kix, Ref 13:20 Cao 2:16.tom hoek ka cao jhai Samoelax heue.Ref 13:20 1Sa 3:20. 21 Khaix an kix rawg mhaing son simiang Ref 13:21 1Sa 8:5.mai Siyiex tawx Sawlux kawn Kiesa ka kix, pa mawh pui ceu Binyamen, Ref 13:21 1Sa 10:21.son bawg yam tixpon num heue. 22 Khaix hoik gah ti tik nawh,Ref 13:22 1Sa 13:14. Siyiex yaog ti kieh Davit mawh simiang kix, pa hoik kham Nawh mhai rug ka kix ah nin, Aux hoik yaox Davit pa mawh kawn Yessie, pui pa khaw pa hawt rhawm Aux, pa tak sang yuh alo Aux khawmuik heue.Ref 13:22 1Sa 16:12; Yaog 89:20. 23 Ka daux ru pui an Siyiex hoik viex Yesux pa mawh Cao Taoh ka pui Isarelax khankix awm pa khaw mai lox mukheu heue. 24 Ka sang hoek Nawh Cao Yohan hoik sidiex gau been cubcom daux rawm, pa dex dawd mai krax doh keud ka phimapRef 13:24 Mak 1:4; Luk 3:3. ka pui Isarelax khawmuik heue. 25 Yam kawn tak yuh Yohan sonsang naog pa yuh tix, nawh ah nin, Pex ce aux mawh pa yuh ka mawx? Aux ang mawh Kaw an.Ref 13:25 Yo 1:20. Viang mawh nan jhak heue, khaix aux tak sang hoek tix Kaux, pie maox kiep caong Nawh ang aux keung ti kah heue.Ref 13:25 Mat 3:11; Mak 1:7; Luk 3:16; Yo 1:27. 26 Puxaik khankix pa mawh kawn ru Abraham mai pui ka daux pex pa lhat ka Siyiex eue, gumlox bwan grawng krax pa taoh in hoik sipaox ka pex heue. 27 Mawh kheu kix pa ot ka daux veng Yerusaliem mai simiang kix khankix ang tawng Nawh Cao, kheu ang kix tawng lox pa hoik grux krai cao jhai khankix, pa phat ku singaix twah, kix kieh gumlox an kix naog, ka daux pa prawng ca kix ka Nawh heue. 28 Viang kix ang yaox grawng pa khaw Nawh ti yum kawx, kix rawg mai nhie Pilat teei Nawh yum heue.Ref 13:28 Mat 27:22-23; Mak 15:13-14; Luk 23:21-23; Yo 19:15. 29 Khaix hoik yuh kix kuceu khawmuik naog, pa hoik tiiem ti deuh grawng Nawh Cao, kix teei Nawh lih khaing khaox an mai een Nawh ka daux simeeig heue.Ref 13:29 Mat 27:57-61; Mak 15:42-47; Luk 23:50-56; Yo 19:38-42. 30 Viang mawh nan Siyiex hoik kieh Nawh deeh kaoh im khaing krax yum heue. 31 Kix pa hoik haok ti hoek tau mai Nawh, khaing meung Galilie ka veng Yerusaliem,Ref 13:31 Cau 1:3. hoik yaox Nawh tom nie singaix, yam in kix mawh pui pa kham mhai rug grawng Nawh ka pui khankix heue. 32 Yiex viex lox gaux rhawm ka pex, pa dex dawd mai lox mukheu pa hoik dawg tawx ka tax du ex. 33 Grawng hoik kieh Siyiex lox an naog ka kawn praix ex, ka daux pa hoik kieh Nawh, Yesux deeh kaoh im, awm pa hoik tiiem ti deuh ka daux Lai Yaogyaw simin ting ra, ah nin, Maix mawh Kawn simex Aux, Aux hoik kieh Maix keh ka daux singaix in heue.Ref 13:33 Yaog 2:7. 34 Hoik kieh Nawh Cao deeh kaoh khaing krax yum, son ang sang baox deeh hoek ka krax cux krax sium, Nawh hoik ah nin, Aux tak tawx bwanson pa singax mai pa kaux cong cie Davit ka maix heue.Ref 13:34 Isa 55:3. 35 Mawh kheu Nawh baox ah nin ka daux Lai Yaogyaw tang pheen, Maix tak ang tawx kieh Kaw Pa Singax Singeh cie Maix sium heue.Ref 13:35 Yaog 16:10. 36 Kheu khaix hoik hawt yuh Davit alo Siyiex ka daux bawg yam ju tix, nawh laig it mai deuh nawh tau mai tax du nawh khankix mai nawh yaox krax cux sium heue. 37 Kaw pa hoik kieh Siyiex nawh deeh kaoh, ang yaox krax pa cux sium heue. 38 Mawh kheu nan puxaik khankix eue, kieh pex tawng grawng ceu pa sidiex gau in ka pex, grawng pa pluat ploi phimap, mawh ka daux Kaw an heue. 39 Pa yum rhawm ka Nawh ku kaux daux pui, pon hoek krax rahsee khaing kuceu khawmuik, pex ang tau pon rahsee kheu lox lai beenli Mose heue. 40 Mawh kheu nan, rien rhawm tix, yuh son ceu pa hoik krai daux lai cao jhai, tak ang sang hoek piang pex, pa ah nin, 41 jhak heue, pex pa mawh pui ang nab yam khankix eue, daox deng mai laux leeing heue. Kheu Aux tak yuh kaing tix ceu daux bawg yam singaix ju pex. Viang pui krai kaing an ka pex kawx, pex tak ang tau ti yum rhawm kah heue.Ref 13:41 Ha 1:5. 42 Yam lih hu kiex, kix khyox khaw kiex sonsang baox deeh sidiex lox ceu in khankix, daux singaix twah hoek heue. 43 Yam gwieh pui, pui pa khrawm paox tix ka daux nyiex dee sidiex an, pui Yudax tom nie mai khawm pui pa laig been kix, hawt Pawlux mai Banabax, kiex sikah ka kix, nhie kix ot kaux cong daux bwanson Siyiex heue. 44 Yam hoek ngaix twah khaix, pui dex khawm veng khrawm paox tix sonsang nghiet gumlox bwan Siyiex heue. 45 Yam yaox pui Yudax khankix pui hun khankix, kix naog krax boh rhawm mai thiang grawng ceu pa krai Pawlux khankix mai salao kah heue. 46 Pawlux mai Banabax viex rhawm kwa sidiex gau ah nin, “Tak lai sidiex gau gumlox bwan Siyiex in ka pex phao ka heue. Viang mawh nan kheu nyhot pex ti tik khaing, pex prawng ca tokaux tix, mawh pa ang keung pon ju leeing ju. Yiex tom veeh ka pui tang ceu khankix heue. 47 Mawh kheu Simiang hoik tawm lox ka yiex ah nin. Aux hoik deuh Maix sonsang mawh pa riang ka pui tang ceu khankix, sonsang mawh Maix ceu pa taoh tom sidah ghoik haktiex heue.”Ref 13:47 Isa 42:6; 49:6. 48 Yam mhong pui tang ceu lox an khankix, kix gaux rhawm mai yaogyaw gumlox bwan Siyiex. Kix pa hoik ciak laug sonsang pon ju leeing ju khawmuik yum rhawm heue. 49 Gumlox bwan Simiang Yesux tah hu daux praix an khawmuik. 50 Pui Yudax khankix, chuik bun pa chix nab yam ka Siyiex, pa ting min plakngai khankix, pui ting ka veng an khankix, kieh lih koe krax tuktiak ka Pawlux mai Banabax mai grheu kiex lih khaing haktiex kix heue. 51 Kiex khruah phawng tiex khaing caong tix sonsang mawh mhai rug ka kixRef 13:51 Mat 10:14; Mak 6:11; Luk 9:5; 10:11. mai hu hoek ka veng Ikawnix heue. 52 Kawncau khankix naog ka pa gaux rhawm mai ka Khuan Singax Singeh heue.