15
Kum Daux Veng Yerusaliem
1 Pui tix blah lih hoek khaing meung Yudax mai gau ka puxaik khankix ah nin, “Phan pex ang pat hak hawt been Mose, Ref 15:1 Krub 12:3. pex ang tau ti hoek krax taoh heue.”
2 Khaix Pawlux mai Banabax hoik thung thiang kix mai ang khaw mai kix ceeix ngie ang mawh, puxaik khankix laug ti ploi Pawlux mai Banabax mai pui tang kaux tix blah, sonsang haok hu ka veng Yerusaliem ka kawncau pa ting khankix mai ka pui pa bung kaing ceu cao khankix, ka grawng ceu an heue.
3 Pui ceucao tawx kix ka krax tix baux mai kix hu preeng ka meung Phinit mai khawm meung Samarix mai krai grawng pui tang ceu khankix hoik tieh ti ih li heue. Kix kieh puxaik khankix kied gaux rhawm kah heue.
4 Lheu khaing an yam hoek ka veng Yerusaliem, kawncau pa ting khankix mai pui pa bung kaing ceucao mai pui ceu cao khankix caong rieb kix heue. Kix kawx krai grawng ceu pa hoik yuh Siyiex tau mai kix kuceu khawmuik heue.
5 Viang mawh nan pui tix blah daux cub Pharishie, pa hoik yum rhawm kaoh cung ah nin, “Tak lai pat hak kix mai tawm lox nhie kix priex ti hawt lox lai beenli Mose heue.”
6 Kawncau pa ting khankix mai pui pa bung kaing ceu cao khankix khrawm paox tix, sonsang keud grawng an heue.
7 Khaix hoik chawk cheng paox tix tom nie, Petrux kaoh cung mai ah nin ka kix, “Puxaik khankix eue, pex tawng grawng Siyiex hoik laug ti teei khaing ka daux ex, daux yam nhaox nhaox, sonsang kieh pui tang ceu khankix mhong gumlox bwan gaux rhawm khaing daux jheeh aux mai yum rhawm heue.Ref 15:7 Cau 10:1-43.
8 Siyiex Kaw pa tawng rhawm, kham mhai rug son kix mai tawx Khuan Singax Singeh ka kix,Ref 15:8 Cau 10:44. awm pa hoik tawx Nawh ka ex heue.Ref 15:8 Cau 2:4.
9 Nawh ang yuh tang siyox sinax ex mai kix mai yuh rhawm kix singax singeh kheu krax yum rhawm heue.
10 Mawh kheu nan, yam in, pex lai cheuk ti yaox Siyiex, sonsang sau pex iak piang ngawg kawncau mau soi khankix, pa ang ex mai tax du ex pon kham ti fak yuh ka mawx?
11 Viang mawh nan ex yum rhawm grawng sang hoek ex krax taoh ka daux bwanson Simiang Yesux Khrit awm kix heue.”
12 Cub pui hun khawmuik ang nye kah mai nghiet lox krai Banabax mai Pawlux grawng mhai ceu pa daox deng, pa hoik yuh Siyiex sinax pui tang ceu ka daux kiex heue.
13 Khaix hoik ah kiex nan, Yakop ah nin, “Puxaik khankix eue, nghiet lox aux liak,
14 Simon hoik krai grawng hoik lai ling Siyiex ti teei ka pui tang ceu tix ceu phao ka, ka son ceu kaux tix heue.
15 Gumlox cao jhai khankix kawx, khaw ka grawng an, pa hoik tiiem ti deuh ah nin,
16 Khaix ceu in khankix Aux tak sang deeh hoek mai deeh sum nyiex gox Davit pa hoik grhup hoik goh. Aux tak deeh sum nyiex gox pa hoik laux an mai deeh kieh nawh jung heue.
17 Kheu son kawn pui pa deuk khankix, tak sang sawg Simiang Yesux mai pui tang ceu khawmuik, pa hoik kok ceu kaux Aux piang kix heue.
18 Siyiex pa hoik kieh tawng ceu in khankix tom didix, ah nin heue.Ref 15:16-18 Amo 9:11-12.
19 Mawh kheu nan, pa keud aux mawh nin, ex ang khaw ti lak lheut kix, ka daux pui tang ceu pa deeh tieh ti hoek ka Siyiex heue.
20 Viang mawh nan ex khaw ti tiiem lai ka kix, son kix tak ang dex ang teeh ka ceu pa hoik seeing kheu riang grang Ref 15:20 Lih 34:15-17. mai khaing pa lud vao Ref 15:20 Krub 18:6-23.mai khaing pa hoik rhawt ghok mai khaing nham heue.Ref 15:20 Krub 17:10-16.
21 Grawh grawng nawh tom ju didix, Mose hoik koe pui pa sidiex grawng nawh ku veng mai phat lai nawh ka daux nyiex sidiex khankix ku ngaix twah heue.”
Tawx Lai Hu Ka Pui Tang Ceu
22 Yam an kawncau pa ting khankix mai pui bung kaing ceu cao mai pui ceu cao khawmuik, ce mhawm ti laug pui khaing ka daux cub kix Yudax pa kok mawh Basabax mai Silax pa ao min plakngai ka daux puxaik khankix mai ploi kiex hu ka veng Antiuk, tau mai Pawlux mai Banabax heue.
23 Kix viex lai pa yuh nin hu mai kix, “Kawncau pa ting, khankix mai pui bung kaing ceu cao khankix mai puxaik khankix, sipaox lai in sonsang nawb hu ka puxaik khankix pa mawh pui tang ceu, ka daux veng Antiuk mai ka meung Surix mai ka meung Kiliki heue.
24 Mawh kheu ex hoik mhong grawng pui tix blah pa lih hu khaing ex, pa ang ex tie nhie hu, hoik lak lheut pex ka lox mai kieh rhawm pex sung sang kah,
25 ex tom ih rhawm ka paox tix mai keud mhawm ti laug pui mai ploi kiex hu ka pex, tau mai Banabax mai Pawlux pa moh ex,
26 pa mawh pui pa hoik koe rhawm ti pon yum tang ceu kaux Simiang Yesux Khrit heue.
27 Mawh kheu nin ex tom ploi Yudax mai Silax, tokaux kiex kawx, tak sang krai grawng lox ceu in khankix ka jheeh tix heue.
28 Mawh kheu Khuan Singax Singeh mai khawm ex, keud mhawm ti ang deuh kraung pa lheu cien, khaing ceu in khankix pa phan ang pon.ti deuh.
29 Pa mawh pa ang pex khaw ti dex ti teeh, ka ceu pa hoik tan ka riang grang mai khaing nham mai khaing ceu pa hoik rhawt ghok mai khaing pa lud vao. Phan pex priex tokaux tix mai via khaing ceu in khankix tak sang mhawm son pex heue. Kieh nyawm ot liak.”
30 Mawh kheu ploi kix hu, kix lih hu ka veng Antiuk mai kieh pui khankix raug rum grum phroik mai kix tawx lai an kah heue.
31 Yam hoik phat kix lai an, kix gaux rhawm, kheu lox nyawm rhawm an heue.
32 Yudax mai Silax, kheu tokaux kiex kawx mawh cao jhai, kiex gau puxaik khankix ka lox tom nie mai kieh kix kaux cong kah heue.
33 Khaix hoik ot kiex tan tix vong, puxaik khankix deeh ploi kiex ing ka kix pa hoik ploi kiex hoek nhim mhawm mhawm heue.
34 Viang mawh nan Silax koe rhawm ti kawn ot tan heue.
35 Pawlux mai Banabax kawn ot ka daux veng Antiuk mai sidiex gau lox bwan Simiang Yesux Khrit, tau mai pui tang kaux tom nie heue.
Pawlux Mai Banabax Gwieh Paox
36 Khaix an uik kub rheung singaix, Pawlux ah nin ka Banabax, “Hu ax lai ling ka puxaik khankix pa ot ka daux veng ku veng, dee hoik sidiex ax lox bwan Simiang Yesux, sonsang yaox yuh kix ka mawx nieh.”
37 Banabax koe rhawm ti sang viex Yohan pa kok mawh Makux hu mai kiex heue.
38 Viang mawh nan Pawlux keud ang khaw ti viex hu mai kiex, kaw pa hoik grham mai lih khaing kiex ka daux meung Pampuli Ref 15:38 Cau 13:13. mai ang hu mai kiex dee yuh kaing heue.
39 Mawh kheu grawng an kiex ang khaw paox tix mai gwieh paox tix tang hu mai Banabax viex Makux hu mai tix mai brug reu hu ka klawn tiex Kuparux heue.
40 Viang mawh nan Pawlux laug ti teei Silax mai lih hu, khaix puxaik khankix hoik tawx pong ka bwanson Simiang Yesux heue.
41 Nawh hu lai ling ka meung Surix mai meung Kiliki mai kieh ceucao khankix kaux cong heue.