12
Pah Yakop, Laung Petrux
1 Yam an simiang Herut, nyeu taix tix sonsang tuktiak ka pui ceu cao tix blah.
2 Nawh teei Yakop puxke Yohan yum ka vaid heue.
3 Yam yaox nawh pa khaw caw rhawm pui Yudax khankix grawng an, viang mawh Petrux kawx nawh baox giex heue. Bawg yam an caw bawg yam singaix blah pa ang sau susaix khankix heue.
4 Yam hoik teei nawh Petrux, nawh sau Petrux daux thawng mai tawx nawh ka pui naing kao kaux liah, sonsang kieh kix pau nawh mai nawh keud ti sang viex nawh lih ka pui khankix khaix hoik hoik pawie Pasakha heue.Ref 12:4 Lih 12:1-27.
5 Mawh kheu nan kawn laung Petrux ka daux thawng, pui ceucao khankix nied ti rawg bwan ka Siyiex son nawh heue.
Petrux Pon Lih
6 Yam dex sang viex Herut nawh lih, daux sawm an Petrux it ka sinax pui naing ra kaux mai hoik phyawk ka ceng ra nyaing mai pui pa pau khankix ot sivoe siviex mai pau thawng an heue.
7 Kawncau raoma cie Siyiex leeing ju tix kaux cung liep nawh mai pa riang jhan ka daux thawng kawncau raoma an dieh paw Petrux mai kieh nawh siduad ah nin, “Nied ti kaoh heue.” Kieh ceng an grhuah khaing taix nawh heue.
8 Kawncau Siyiex ah nin ka nawh, “Nhawt maox rawd nyoi maix mai ceep kiep maix heue.” nawh yuh awm ah nawh. Kawncau Siyiex an baox ah nin ka nawh, “Fua man fua maix mai hawt aux heue.”
9 Nawh lih hawt hu heue. Nawh ang tawng grawng pa yuh kawncau Siyiex an mawh ceu pa mawh meh tete, nawh ce mawh yaox tix riang susai heue.
10 Khaix hoik luan kiex khaing cub pui pa pau sivoe mai pui pa pau ra cub tix cub, kiex hoek ka siviex rhiem pa bleeh ti laig ka daux veng mai siviex an lak baoh nong son kiex mai kiex lih hu lawng krax ti nyaing mai dom mawx dom an kawncau Siyiex an gwieh hu khaing nawh heue.
11 Yam doh rhawm Petrux nawh ah nin, “Yam in aux hoik tawng grawng Siyiex hoik ploi kawncau tix hoek ti taoh aux khaing tawm taix Herut mai ceu pa hoik keud pui Yudax khankix khawmuik tete heue.”
12 Yam hoik keud nawh grawng ceu an, nawh hoek ka nyiex Marix pa mawh miex Yohan pa kok ceu kaux ru nawh mawh Makux, dee hoik khrawm pui tom nie paox tix mai rawg bwan heue.
13 Yam gleuh nawh ka siviex brawk, nyawm bun pa kaux Rode tix kaux hoek ti pawk.
14 Yam tawng nawh mawh lox Petrux, nawh ang paoh siviex kah, kheu gaux rhawm nawh, to laig ka daux mai krai grawng Petrux cung ka sivoe siviex heue.
15 Kix ah nin ka nawh, “Yhot maix” nawh nied ti ah mawh tete heue, mai kix ah, “Mawh kawncau raoma cie Petrux heue.”
16 Petrux baox gleuh siviex mai yam hoik paoh kix siviex, yaox nawh mai kix kied daox deng kah heue.
17 Viang nawh teei taix tix ne kix, nhie kix paw nye mai krai kix mhong grawng Siyiex hoik viex nawh lih khaing daux thawng yuh ka mawx heue. Nawh ah nin, “Krai grawng ceu inkix ka Yakop mai ka puxaik khankix heue.” Khaix an nawh lih hu mai hu tang dah heue.
18 Yam hoik bah riang praix, pui naing khankix lawh maw ceeix ngie ang mawh, grawng hoik mawh pa yuh ka mawx ka Petrux.
19 Khaix hoik sawg Herut Petrux mai ang yaox nawh, nawh chawk cheng grawng an ka pui pa pau khankix mai tawx lox nhie teei kix yum heue. Khaix an nawh lih hu khaing meung Yudax mai hu ka veng Kesarix mai ot tan heue.
Grawng Yum Herut
20 Yam an Herut kied song rhawm ka pui veng Turux mai veng Sidom mai kix viex rhawm tix mu khrawm paox tix hoek mai khaix hoik pon Balasatux, pa mawh kawncau pa rien khre lawg dee it simiang kieh nawh mawh paox grawm kix, kix khyox khaw son pa nhim, kheu kix een rhawm tix ka haktiex simiang an son pa ih heue.
21 Ka daux pa hoik ciak ti deuh tix singaix, Herut ceep kraung ceep simiang mai ngawm piang dang ngeung mai krai lox ka kix heue.
22 Pui khankix yo ah nin, “Lox in mawh lox siyiex tix kaux, ang mawh lox pui heue.”
23 Dom mawx dom an kawncau raoma cie Siyiex tix kaux dieh nawh kah, kheu ang nawh tawx min pakngai ka Siyiex, viag ih kaux nawh mai yum kheu heue.
24 Gumlox Siyiex haok huan mai baox nie haoh hun heue.
25 Banabax mai Sawlux deeh khaing veng Yerusaliem, khaix hoik yuh kiex kaing pa teem pa khan mai kiex viex Yohan pa kok ceukau ru nawh mawh Makux ing mai tix heue.