11
Plak Jhi Pui Mhong Pa Yaox tix
1 Kawncau pa ting khankix mai puxaik khankix pa ot ka daux meung Yudax, mhong grawng pui tang ceu kawx, hoik rieb ti teei gumlox bwan Siyiex.
2 Mawh kheu nan Petrux haok hu ka veng Yerusaliem, cub pui been pa pat hak, thung thiang mai nawh,
3 Ah nin, “Maix hoik laig ka daux nyiex pui pa ang pat hak khankix mai hoik sawm tau mai kix heue.”
4 Petrux plak jhi kix mhong grawng ceu an jah ka num tom sidah ah nin,
5 “Yam ot aux ka daux veng Yawppax mai rawg bwan, yam lip lu aux yaox riang susai, pa mawh tix ceu pa awm man tawm pa ting, pa hoik phyawk pon daog, mai ploi lih khaing raoma mai hoek dex ka aux heue.
6 Yam jeung aux ngai tix kah, aux jhak ti yaox mhawm mhawm mai yaox totiag pa koe caong pon khawn piang haktiex mai totiag pa chix hu chix mu khankix mai sim raoma khankix heue.
7 Lox kawx, aux mhong pa ah nin ka aux, Petrux eue, kaoh mai pah ti ih heue.
8 Aux ah nin, Ang doh mawh Simiang eue, mawh kheu ceu pa seeing, phan ang mawh nan ceu pa ang singax ang sax laig ka daux jheeh aux heue.
9 Lox an baox deeh pawk khaing raoma ra bawg tix bawg ah nin, Ceu pa hoik kieh Siyiex singax singeh, maix paw kok mawh pa seeing heue.
10 Khaix hoik yuh nan loe bawg, deeh bluh khawmuik haok ka daux meung raoma heue.
11 Jhak heue. dom an, pui loe kaux cung sivoe nyiex dee ot ex an, pa hoik ploi hoek ka aux khaing veng Kesarix heue.
12 Khuan Cao nhie aux hu tau mai kix mai paw yuh tang siyox heue. Puxaik liah kaux kawx hu tau mai aux mai ex laig ka daux nyiex pui an,
13 mai nawh krai ka ex grawng hoik yaox nawh kawncau Siyiex pa cung ka daux nyiex nawh ah nin, ploi hu ka veng Yawppax mai viex Simon pa kok mawh Petrux heue.
14 Nawh tak sang krai gumlox ka maix, pa sang pon maix mai pui nyiex maix khawmuik krax taoh heue.
15 Yam jah aux ti sidiex, Khuan Singax Singeh lih piang kix, awm hoik lih piang ex yam jah heue.
16 Aux doh keud ka gumlox Simiang, pa hoik ah Nawh nin, Yohan cubcom ka rawm tete heue. Pex tak sang cubcom ka daux Khuan Singax Singeh heue.Ref 11:16 Cau 1:5.
17 Mawh kheu nan phan Siyiex hoik tawx totaix ka kix, awm hoik tawx Nawh ka ex, yam yum rhawm ex ka Simiang Yesux Khrit, aux mawh pui pa yuh ka mawx, pa sang pon tieb tie ka Siyiex?”
18 Yam mhong kix grawng ceu an khankix, kix ang nye kah, mai yaogyaw Siyiex ah nin, “Phan mawh nan ka pui tang ceu khankix kawx, hoik tawx ceu pa doh keud, tom pon ju pa im heue.”
19 Kix pa hoik prung prang rairuat hu ku dah dee, kheu krax kha rhawm pa hoik mawh kheu grawng Sathephan,Ref 11:19 Cau 8:1-4. hu tom hoek ka meung Phinit mai ka meung Kuparux mai ka veng Antiuk, sidiex gau ngie gumlox bwan ka pui Yudax khaing heue.
20 Kix tix blah pa mawh pui meung Kuparux mai meung Kurene, yam hoek kix ka veng Antiuk, kix sidiex gau grawng Simiang Yesux ka khawm pui Helasax kawx heue.
21 Taix Simiang ot tau mai kix mai pui tom nie pa yum rhawm deeh tieh ti hoek ka Siyiex heue.
22 Grawh grawng lox inkix hoek ka yhaok ceu cao pa koe ka daux veng Yerusaliem mai kix ploi Banabax hu tom hoek ka veng Antiuk heue.
23 Yam hoek nawh tan mai hoik yaox bwanson Siyiex, nawh gaux rhawm kah mai sidiex gau kix khawmuik, sonsang deuh kix rhawm tix kaux mai kawm ka Siyiex tom sied.
24 Kheu mawh nawh pui pa mhawm mai pa naog ka Khuan Singax Singeh mai pa yum rhawm heue. Pui tom nie baox haoh hun yum rhawm ka Simiang Siyiex heue.
25 Banabax lih hu ka veng Tasux, sonsang sawg Sawlux,
26 Yam hoik yaox nawh ka nawh, nawh viex nawh hoek ka veng Antiuk. Kix khrawm ti ot tau mai ceucao tan, tom naog tix num mai sidiex gau ka pui tom nie. Mawh ka daux veng Antiuk, dee jah ti kok kawncau mau soi khankix, mawh kawn Khrit phao ka heue.
27 Ka daux singaix an khankix cao jhai tix blah yaog ti lih khaing veng Yerusaliem hoek ka veng Autiuk heue.
28 Ka daux kix tix kaux pa kaux Agabux kaoh cungRef 11:28 Cau 21:10. mai grux krai lox jhai ka daux Khuan, grawng tak sang kied sibhawm praix piang haktiex khawmuik heue. Sibhawm ting an hoek ti mawh ka daux bawg yam singaix simiang Kesa Klawdi heue.
29 Kawncau khankix, ku kaux daux pui, keud ti sang sipaox ceu pa teem ka puxaik khankix pa ot ka daux meung Yudax, awm pa chix tix kaux mawx kaux an heue.
30 Kix kawx yuh awm an mai sipaox ceu pa teem hu tawx ka kuad song khankix, ka daux tawm taix Banabax mai Sawlux heue.