10
Petrux Mai Kawnilix
1 Ka daux veng Kesarix koe pui tix kaux pa kaux Kawnilix, pa mawh cao giex kaing naing, pui naing tix yieh kaux, pa kok mawh cub pui naing Itali heue.
2 Nawh mawh pui pa chix nab yam. Mai pa chix lhat ka Siyiex mai khawm pui daux nyiex nawh khawmuik kawx awm an. Nawh mawh pa sax yuh bwanson tan tom nie, ka pui khankix mai rawg bwan ka Siyiex jheung jheung heue.
3 tix singaix yam dex hoek dim nari nawh sidawng yaox ka daux riang susai, kawncau Siyiex tix kaux laig hoek ka nawh ah nin, “Kawnilix eue.”
4 Nawh lhat ka, jeung ngai tix piang kawncau Siyiex an ah nin, “Mawh patix, Simiang eue?” kawncau Siyiex an ah nin ka nawh, “Ceu pa rawg maix bwan mai ceu pa tan maix, hoik haok, sonsang mawh ceu pa doh keud, ka sivoe Siyiex heue.
5 Yam in ploi pui hu ka veng Yawppax mai viex Simon pa kok ceu kaux mawh Petrux.
6 Nawh ot tau mai Simon, pa mawh pui coh hak tix kaux mai nyiex nawh koe dex rawn sigrit sigra heue.”
7 Khaix hoik hu kawncau Siyiex pa sikah mai nawh, Kawnilix kok kawncau daux nyiex tix ra kaux mai pui naing pa chix nab yam tix kaux, pa rien khre ka nawh jheung jheung,
8 Khaix hoik krai grawng kuceu khawmuik ka kix, nawh ploi kix hu ka veng Yawppax heue.
Petrux Yaox Riieng Susai
(Kawn 1:15-14)
9 Ngaix pasax, yam kawn hu kix krax mai uik dex sang hoek ka veng an, yam dex hoek liah nari Petrux haok piang braux nyiex sonsang rawg bwan heue.
10 Nawh hoik cai rhawm mai mie ti sawm, viang mawh nan yam kawn tak khre kix nawh, nawh lip lu,
11 mai nawh yaox baoh raoma mai tix ceu pa awm man tawm pa ting, pa hoik phyawk pon daog mai ploi lih piang haktiex heue.
12 Ka daux an koe totiag pa koe caong pon khawn kuceu mai pa chix hu mu ka piang tiex mai khawm sim raoma khankix heue.
13 Lox lih hoek ka nawh yuh nin, “Petrux eue, kaoh mai pah ti ih heue.”
14 Viang mawh nan Petrux deeh ah nin, “Ang doh mawh Simiang eue, kheu ang aux sax ih ceu pa seeing brai mai ceu pa ang singax heue.”
15 Lox baox deeh hoek ka nawh ra bawg tix bawg ah nin, “Ceu pa hoik kieh Siyiex singax singeh maix paw kok mawh pa seeing brai heue.”
16 Khaix hoik yuh nan loe bawg, rieb ti deeh teei ceu an haok ka daux meung raoma dom mawx dom an heue.
17 Yam kied daox deng Petrux ka daux tokaux tix, grawng deeh bleeh riang susai pa hoik yaox nawh mawh pa yuh ka mawx, jhak heue, pui pa ploi Kawnilix hoik chawk nyiex Simon mai cung sivoe siviex,
18 mai kok chawk grawng Simon pa kok mawh Petrux, ot tan lie, ang ot lie.
19 Yam kawn keud Petrux grawng riang susai an, Khuan Cao ah nin ka nawh, “Jhak heue, pui loe kaux sawg maix.
20 Kaoh, lih heue. Paw lai keud jee keud blaong, hu tau mai kix, mawh kheu Aux hoik ploi kix hoek heue.”
21 Petrux lih hu ka pui khankix ah nin, “Jhak heue, aux mawh kaw pa sawg pex, mawh kheu nan pex hoek kheu grawng pa yuh ka mawx?
22 Kix deeh ah nin, “Kawnilix pa mawh cao giex kaing naing tix kaux, pa mawh pui rahsee, pa chix lhat ka Siyiex pa yaw pui Yudax ka khawmuik, Siyiex hoik ploi kawncau pa singax tix hu nhie nawh ploi pui hu kok maix hoek ka daux nyiex tix mai sonsang kieh mhong gumlox pa kaoh khaing maix khankix heue.”
Sidiex Kawn Nyiex Ma Kawnilix
23 Mawh kheu nan nawh kok kix laig paung mai tix heue. Pasax nawh kaoh mai lih hu tau mai kix mai puxaik pa mawh pui veng Yawppax tix blah kawx hu tau mai nawh heue.
24 Khaix an tix singaix kix laig ka daux veng Kesarix. Kawnilix hoik kok paox ru nawh mai paox grawm nawh khankix khrawm paox tix mai krox jun son kix heue.
25 Yam laig Petrux ka daux nyiex, Kawnilix rieb nawh mai gup ti krub ka caong nawh heue.
26 Viang mawh nan Petrux yaog nawh kaoh ah nin, “Cung heue, tokaux aux kawx mawh ngie pui.”
27 Yam kawn sikah Petrux mai nawh, nawh laig mai yaox pui pa hoik khrawm paox tix tan tom nie,
28 mai nawh ah nin ka kix, “Tokaux pex hoik tawng grawng ang khaw mai been, son pui Yudax ti neuex rom, phan ang mawh nan ti hoek ka pui pa mawh pui tang ceu, Siyiex hoik jhi aux yaox, son ang aux tak mawh pa ang singax singeh heue.
29 Mawh kheu in yam ploi ti kok aux, aux ang thiang mai hoek heue. Mawh kheu nan aux tom chawk pex, pex ploi ti kok aux kheu keud pex yuh ka mawx?”
30 Kawnilix ah nin, “Khaix in pon ngaix, aux twah pa ih tom hoek nari in mai yam hoek dim nari aux rawg bwan ka daux nyiex aux mai jhak heue, pui tix kaux pa ceep kraung pa jhan riang cung sivoe aux,
31 ah nin, Kawnilix eue, hoik mhong lox rawg maix bwan mai ceu pa tan maix khankix kawx, Siyiex hoik doh keud ka heue.
32 Mawh kheu nan ploi pui hu ka veng Yawppax, ti kok Simon, pa kok mawh Petrux hoek tin heue. Nawh ot ka daux nyiex Simon pui pa cox hak, pa ot praok rawm sigrit sigra, yam hoik hoek nawh, nawh tak sang sidiex ka maix heue.
33 Mawh kheu nan aux tom ploi pui hu ka maix dom mawh dom an heue. Kheu hoek maix tin maix hoik yuh mhawm mhawm. Mawh kheu in ex khawmuik ot tin sivoe Siyiex, sonsang mhong sang nghiet kuceu pa hoik tawm Simiang Yesux ka maix heue.”
Sidiex Ka Pui Tang Ceu
34 Petrux ang moing tix ah nin, “Aux hoik tawng tete, grawng mawh Siyiex pa ang jhak ka pakngai kawn pui heue.Ref 10:34 Pi 10:17.
35 Ka daux pui kuceu, pui pa chix lhat graung ka Nawh mai pa yuh pa rahsee, Nawh sang rieb ti teei heue.
36 Nawh hoik ploi lox ka ru pui Isarelax khankix mai kieh kix tawng, lox bwan gaux rhawm pa dex dawd mai pa nhim, ka daux Yesux Khrit, pa mawh Simiang piang khawmuik heue.
37 Pex hoik tawng grawng gumlox bwan an, pa hoik tah hu kudah dee ka daux meung Yudax, pa jah ka meung Galilie, khaix krax pa tawx cubcom, ceu pa sidiex gau Yohan heue.
38 Grawng hoik groi Siyiex rawm bee ka Yesux pui veng Nazariet, ka Khuan Singax Singeh mai sibrawm, Kaw pa hoik hu lailing yuh ceu pa mhawm mai cox pui pa tuktiak phicaox khawmuik moi, mawh kheu Siyiex ot tau mai Nawh heue.
39 Ex mawh pui pa kham mhai rug grawng ceu pa hoik yuh Nawh khawmuik, ka daux veng Yerusaliem mai khawm daux meung pui Yudax khawmuik, Kaw pa hoik preue kix ti teei yum piang khaox heue.
40 Siyiex hoik kieh Nawh deeh kaoh im, ka daux loe ngaix mai kieh Nawh sidawng heue.
41 Viang mawh nan ang kieh sidawng ka pui khawmuik, mawh ngie ka pui pa hoik laug Siyiex, sonsang kieh kham mhai rug, pa mawh ex, pa hoik ih hoik nyaux tau mai Nawh, khaix hoik kaoh Nawh khaing krax yum heue.
42 Nawh Cao tawm lox ka ex nhie ex sidiex gau ka pui khankix mai sonsang kham mhai rug grawng mawh Nawh Kaw pa hoik ciak Siyiex ti mawh Cao Prawng ka pui pa im mai khawm pui yum khankix heue.
43 Cao jhai khawmuik kham mhai rug grawng pui pa yum rhawm ka daux ceu kaux Nawh ku kaux daux pui, tak sang hoek krax pa luan khaing phimap heue.”
Lih Piang Pui Tang Ceu
44 Yam kawn tak ah Petrux gumlox ceu in khankix, Khuan Singax lih piang kix pa mhong gumlox an khawmuik heue.
45 Kix pa dex dawd mai been pa pat hak, pa hoik yum rhawm mai pa hoek tau mai Petrux khankix daox deng kah, mawh kheu piang pui tang ceu kawx, totaix Khuan Singax hoik prauk lih heue.
46 Kheu kix mhong kix sikah ka lox pui tang ceu khankix mai yaogyaw Siyiex heue. Yam an Petrux baox ah nin,
47 “Kaux pui mawx sang pon sidien rawm, son ang pon ti tawx krax cubcom ka pui inkix, pa hoik pon Khuan Singax Singeh awm hoik pon ex?”
48 Nawh tawx lox nhie kix cubcom ka daux ceu kaux Yesux Khrit. Khaix an kix khyox khaw mai nhie nawh ot tan tix vong heue.