6
Ngaknute ii sak
1 A mealphabel numei awng,
na it na lawmpa koi sungah pai ziam?
Na mu natu kong hu thei natu uh in
bang lampi tawn ziam, hong son ta'n.
Ngaknu ii sak
2 Ka ngaino sia balsam thing pona mun a huan sungah pai zo hi,
Ama in a tuu honte a huan sungah tha a, unok paakte lo hi.
3 Ka ngaino sia keima aa hi a, keima in ama aa ka hi hi.
Ama in a tuu honte unok paak sungah tha hi.
La A ngui ngana
Tangval ii sak
4 Ka ngaino awng, nang sia Tirzah bangin na mealpha a,
Jerusalem khuapi bangin ithuai in,
hi khuapi liante bangin na mealphatna in
husan ngawngawn hong tawpsak tha liang hi.
5 Na mittangte kei sang panin heam in,
tuate in kei hong cimawsak hi.
Na samte sia Gilead mual pangh suk ah
keal honte tai valet bangin kithing hi.
6 Na hate sia a kisilthiang tuu honte bangin paak hi.
Khat beak zongh a peuhe om ngawlin kikim diimdiam hi.
7 Na mai sealna dial nungah na biangkhote san sitset hi.
8 Kumpipa in zi sawmluk, zino sawmliat,
a kisim zo ngawl ngaknu moi nei tahen!
9 Ahihang keima in khat bek ka it a,
ama sia vakhu khat bangin ithuai hi.
Ama sia a nu ii tanu khat bek a nei hi a,
a nu ii a it mama tanu ahi hi.
Numei theampo in ama en in pok uh hi;
a zi le a zinote in ama pokna lasa uh hi.
10 Zingsang khuavak taw a kibang hisia nu akua ziam?
Ama a mealpha a, taang hiihee a, ni bang tha bangin tee hi.
11 Ngamkuam sungah thingnote en tu,
sapitkung tung a, a teeno suakte en tu le
talee kung tung a, a paakte en tu in
Almond kungte sungah ka paisuk hi.
12 Siphu ngalleang hawlpa ii ngal sim tu lawpin
a liin bangin nang kong it hu in ka liing hi.
Ngaknute ii sak
13 Shulam ngaknu awng, laam in, laam in,
Na lap kong en tu uh hi.
Ngaknu ii sak
A ngual a ngual a hong en te ii kilaklaw ah
ka lap sia banghangin hong en nuam nu ziam?