7
Tangval ii sak
1 Nang sia a tuanngen ngaknu khat na hi hi!
Na peangdap sungah na peangte hoi lawlawm hi.
Na pheizangte phatzia sia
limsuai thiamte ii limsuai taw kibang hilhel hi.
2 A kamh ngeingawl sapittui namtui
kuang khat tua munah om hi.
Mangtaang vawng khat tua munah om a,
unok paakte in kiim uum hi.
3 Na noaite sia a taa khawm vahel apeang sangai,
a omkhawm vahel saza nii taw kibang hi.
4 Na ngawng sia saiha tausaang khat taw kibang hi.
Na mitte sia Heshbon khuapi kongpi hui ah a om tuicingte bang ahi hi.
Na naak sia, Damascus khua a cing Lebanon tausaang bangin ithuai hi.
5 Na lutang sia Carmel Mual bangin saangto kiukiau hi.
Na sam kipheakte sia naipuan cii phabelte bangin tee vasip a;
ama ii phatna in kumpipa ii mit le thin suu hi.
6 Na mealpha mama a, hoi lawlawm nii hi;
Nong itna in ka lung hong kimsak siat hi.
7 Palm thingkung khat bangin na ngaibaang a,
na noaite sia date nga bom kaaite bang ahi hi.
8 Palm kung khat tungah kaato in a nga ka lo tu hi.
Kei atu in na noaite sia sapit bom bang hi a,
na ngim sia apple min bang namtui in,
9 Na muk sia sapittui phabel taw kibang hi.
Ngaknu ii sak
Tua ahile sapittui sia ka ngaino kungah luang tahen a,
a muk le a ha khuum tahen.
10 Ka ngaino neisa ka hi a, ama in dik hong sa hi.
11 Kong it ngaino awng, hong pai ta'n a,
ngam sungah pai in khuanote ah zan ngiak tawng.
12 Zingtuung in ih tho tu a sapitkungte, a khang ziam,
paakte a palh ziam, talee kungte a paak ziam ih en tu hi.
Tua munah kong itna kong pia tu hi.
13 Mandrakes dei aikung ngim namtui na za tu a,
tuaciang thingnga lim theampo sia
ih kongbiang hui ah om tu hi.
Kong it ngaino awng, thingnga a lui le a thak
nang atu in kong khealsiasak hi.