5
Tangval ii sak
1 Kong it ka ngaino,
ka angkoai awng,
Ka huan sungah ka tum zo hi.
Ka hel namtuite le ka myrrh
thingnamtuite khawmtua in;
ka khuaitui le ka khuaiphaangte ka ne a;
ka sapittui le ka noai ka ne hi.
Ngaknute ii sak
Lawmtate awng, itna taw
na kham teakin ne in, dawn vun!
La A ngui lina
Ngaknu ii sak
2 Ka mut lanin ka thin ciim hi.
Ka mang in ka ngaino in kongkha hong king hi.
Tangval ii sak
Kong it ngaino, ka vakhu awng,
hong tumsak ta'n, ka lu sia daaitui taw kawt a
ka sam sia meeizunh taw tuamh hi.
Ngaknu ii sak
3 Ka nik ka puante
suut siat zo khi hi,
banghangin silh kik teang kik tu khi ziam?
Ka peangte sil zo khi hi,
banghangin ninsak kik tu khi ziam?
4 Ka ngaino in a khut taw kongkha len a,
ama hong nai ahikom ka lungpeal ngam hi.
5 Ama tumsak tu in ka kingingta khol zo hi.
Kong hon tu ka kipat ciang
ka khutte myrrh thingnaai namtui taw,
ka khutmete myrrh thingnaai tui taw kizut hi.
6 Ka ngaino kongkha ka hon hi,
ahihang ama om nawn ngawl hi.
Ama aw za nuam lawlawm ing!
Ka zon hang ama ka mu zo bua a,
ka biapui hang ama
7 Khuapi a cing, ngalvilte in hong mu a,
amate in hong saatin, hong chidupsak hi.
Khuapi luphung a cingte in
ka lukhu hong eaukeaksak hi.
8 Jerusalem numeite awng,
ka ngaino na mu uh le kei sia ama ngai in vul khi hi, ci in
nong sonsak natu uh in kamciam kei hong pia tavun.
Ngaknute ii sak
9 Numei theampo sung pan a mealphabel nu awng,
na lawmpa sia ngualdang khat po sangin
lamdangin, tum pian zaw ziam?
Tuabang liang a kamciam kong piak tu uh sia,
ama huvau bang a lamdang vahut om na ziam?
Ngaknu ii sak
10 Ka ngaino sia etlawm in hat hi;
ama sia tulsawm sung pan khat ahi hi.
11 A maitang sia taau bang hi a neal hi;
a sam kiil a, va-ak vom bangin vom hi.
12 A mittangte sia luamtui luang khat ii hui ah
vakhute bang, noaitui taw kisil a,
luihui ah a ding vakhute bangin pha kilkel hi.
13 A biangkhote sia paak le
hel namtuite taw a kidim huan khat bangin etlawm hi.
A mukte sia
myrrh thingnamtui tui taw a kawt dikdek
unok paakte taw kibang hi.
14 A khutte sia a et hoi a pha in piang a,
ama in suangmanpha khutzungbute bun hi.
A pumpi sia suangmanpha taw a kizeam
saiha neal taw kibang hi.
15 A pheizangte sia khamh tungah a kingaa
suangngo khuamte taw kibang hi.
Ama sia kumpi mealpu a,
Cedar kung saang pona Lebanon mualte bang ahi hi.
16 A kampaute thum a, zaak nop huai mama hi.
A kampaute ih nial tu khat mama zongh om ngawl hi.
Jerusalem numeite awng,
ka ngaino sia hi bang teng ahi hi.