4
Tangval ii sak
1 Ka ngaino awng, na mealpha lawlawm hi!
Na mai sealna dial ii nungah a ithuai na mittangte tee vakil hi.
Na sam sia Gilead mualpangh suk a, keal hon tai bangin kithing hi.
2 Na hate sia a mul a kimeet tawm,
a kisilthiang tuute bangin paak hi.
Khat beak zongh tongh ngawlin kikim diimdiam hi.
3 Na mukte puansan khaupheang khat bang hi a;
na pau ciang bangza in etlawm ziam?
Na biangte sia na kisealna dial nungah san sitset hi.
4 Na ngawng sia ngalhangte zak lum tulkhat a kikhai zeizoina
ngil kilkel in a beam David ii tausaang taw kibang hi.
5 Na noaite sia unok paak kawm ah an ne a,
a taa khawm saza, apeang sangaite bang ahi hi.
6 Keima in zingvui a vak vahiau mateng le khuavak mahiat dong
myrrh thingnaai namtui mual,
ngimnamtui mualtung ah ka om tu hi.
7 Ka ngaino awng, na mealpha lawlawm a;
8 Ka angkoai awng, Lebanon mual panin kei hong zui ta'n,
Lebanon panin hong zui ta'n,
Tawpite le pawlbeamte teenna,
Amana Mualdawn,
Senir Mualdawn le
Hermon Mualdawn panin hong tuaksuk ta'n.
9 Ka ngaino le ka angkoai awng,
na mit ha zia le
na khi aw ziate in ka thin ka lung hong vut hi.
10 Ka ngaino le ka angkoai awng, nong itna in ka thin hong nuamsak hi.
Nong itna sia sapittui sangin thum zaw a,
na paaknamtui sia a dang hel namtuite sangin namtui zaw hi.
11 Kong it ngaino awng, na muk sia khuaitui bangin thum a,
na leei sia kei atu in, khuinoai le khuaitui ahi hi.
Na puansilhte sia Lebanon ii paaknamtui namcinte nam hi.
12 Ka ngaino,
ka angkoai sia a kiseal huan,
a ki uumcip huan,
aituam tuinaak ahi hi.
13 Tua munah thingkungte dawngin khang hi.
Amate sia talee kung bangin po a, nga pha belte nga hi.
Henna thingnamtui, nard thingnaai namtui,
saffron, calamus le cinnamon pan kipan
thing ngimnamtuite kamh ngeingawl hi.
14 Tua munah a namtuibel myrrh le aloe te po hi.
15 Lebanon Mualte panin luamtui a luangsukte le
ciktui te in tua huan tui kawtsakin lei zenhsak hi.
Ngaknu ii sak
16 Khanglo vun,
Saksang vui awng.
Thangsang vui awng,
ka huan sungah va vun;
ngimnamtui taw dimsak vun.
Ka ngaino sia ama ii huang sungah hong pai in
thingnga a limbel teng ne tahen.