15
Amalek te Taw Kisimna
1 Samuel in Saul munah, “A Israel mite kumpipa tu in nang sathau noai a Topa ii hong sawl sia keima khi hi. Tu in Topa Vaanglianpipa son teng ngai in. Ref 15:1 1 Sa 10:1
2 Ama in Amalek te daan pia nuam hi, banghang ziam cile amate ii taanghpupite in Israel mite Egypt ngam pan a pusua lai in na nalh uh hi. Ref 15:2 Pu 17:8-14; Thkna 25:17-19
3 Kuan ta'n a, Amalek te a neisa theampo uh taw a vekpi in susia cip in. Na khat zongh khoaikhe heak in: pasal, numei, patang le nausen; a khui, a tuu, a kalaoh le a laate thatlum siat in,” ci hi.
4 Saul in a ngalkapte Telem ah khawmtua in sit hi. Israel panin ngalkap 200,000 le Judah pan 10,000 pha uh hi.
5 Tuaciang ama le a ngalkapte Amalek te khuapi ah kuanin ngun luanna munko khat pan a suam tu in pang uh hi.
6 Ama in a taanghpupite in Egypt pan a pusua uh lai in Israel te tungah a dik Ken te tungah a kidop natu kam thaak hi. Tuate munah, “Pai vun a Amalek te nusia vun, amate taw cipin kong thalup ngawl natu in tai vun,” ci hi. Tua ahikom Ken te in khua a nusia uh hi.
7 Saul in Amalek te, Havilah pan Egypt nisuana Shur dongin zo a;
8 ama in Amalek kumpipa Agag a hingtang in man a, tuaciang a mite theampo thatlum hi.
9 Ahihang Saul le a mite in Agag ii nuntakna sia khoaikhe a, tuaciang a tuu le a khui a phabel teng, khuino le tuuno a phabel teng le na a pha theampo khe in, a man nei ngawl le a mannung ngawl teng bek susia uh hi.
Saul sia Kumpipa a hina pan Kinial
10 Topa in Samuel tungah,
11 “Saul sia kumpipa in ka koi sia khuangai khi hi; ama in kei hong nusia a, tuaciang ka thupiakna hong ni ngawl hi,” ci hi. Samuel thin uuk a, zan khua in Topa tungah pakaai hi.
12 A khuavak ni zing tuungin Saul zong tu in ama pai hi. Saul sia Carmel khua ah pai in tua munah ama atu in khansuang khat phut a, tua zawkciang Gilgal ah paisuak hi ci in za hi.
13 Samuel in Saul omna dong va pai in, Saul in muak a paupui hi, “ Topa in thupha hong pia tahen, Samuel awng! Topa thupiak ni khi hi,” ci hi.
14 Samuel in, “Tua ahile khui ham aw le tuu ham aw te banghangin za khi ziam?” ci in dongh hi.
15 Saul in, “Ka mite in Amalek te tung pan la hi. Tuu le khui a phabel teng la in Topa na Pathian tungah sangaw biakpiakna in nei sawm uh hi, a dang teng sia maaimot siat hi,” ci in zo hi.
16 Samuel in, “Na pau tawp in, tu zanin Topa ii kei hong son teng hong sonsawn tu khi hi,” ci in thupia hi.
Saul in, “Hong son ta'n,” ci hi.
17 Samuel in, “Nangma le nangma sia thupi na kisak ngawl hang, nang sia Israel te ii lampui pa ni hi. Topa in Israel Kumpipa tu in sathau hong noi sa ni hi,
18 tuaciang ama in nang sia tua a seksol Amalek te a lalcipsak tu in hong paisak hi. Amate na thalup siat dong sim tu ni hi ci in thu hong pia hi.
19 Tua ahile banghangin a thu ni ngawl ni ziam? Banghangin a neisa uhte phuul tu in kinaw liang in Topa ii diksak ngawl tu in ngamta ni ziam?” ci in zo hi.
20 Saul in, “ Topa thu ni khi hi. Hong sawl bangin ka kuan a, kumpipa Agag ka ciapui hi, Amalek te theampo ka thatlum hi.
21 Ahihang ka mite in tuu le khui a matte sung pan a phabel teng a thatlum bua uh hi; tuabang ahi luangin Topa na Pathian tungah sangaw biakpiakna tu in, hi sung Gilgal ah hong paipui uh hi,’ ci in zo hi.
22 Samuel in, “Thunitna ahibuale biakpiaknate le sangaw biakpiakna Topa in koisia dei zaw ziam? Ama tungah tuu phabel taw sangaw biakpiakna sangin thunitna phazaw hi.
23 Ama leedona in bum le aitoaina bangma in sia a, kiphatsakna sia milim biakna za in mawna hi. Nangma in Topa thupiakna nial na hi man, ama in nang ii kumpi na hina hong nial zo hi,” ci hi.
24 “Hi hi, maw zo khi hi,” ci in Saul in zo kik hi. “ Topa thu piakna le nong hilna te ni ngawl khi hi. Ka mite ka kiitak manin amate dei bangin ngamta khi hi.
25 Ahihang tu in ka mawna hong maisak ta'n a, Topa ka biak thei natu in kei taw paikhawm kik tawng,” ci hi.
26 “Nang taw pai kik ngawl tu khi hi. Nang in Topa thupiaknate nial na hikom, ama in nang sia Israel kumpipa na hina hong nial zo hi,” ci in Samuel in zo hi.
27 Tua zawkciang Samuel sia ama nusia tu in hong kiheak a, ahihang Saul in a puanpuasilh pan a let le a puan ki eau hi.
28 Samuel in ama munah, “ Topa in Israel kumpi ngam sia tuni in na khut sung pan hong eaukeaksak zo hi, tuaciang nang sangin a phazaw mihing khat tungah pia zo hi. Ref 15:27-28 1 Sa 28:17; 1 Kum 11:30-31
29 Israel ii minthang kumpi Pathian sia leilot ngawl, a thin kheal ngawl hi. Ama sia mihing khat hi ngawl hi — a thin kheal ngawl hi,” ci hi.
30 Saul in, “Keima maw zo khi hi. Ahihang ka mite ii lampuite le Israel theampo ii mai ah zatakna beak hong lak ta'n. Keima taw hong heak kik ta'n a, Topa na Pathian ka biak thei natu hong hi ta'n,” ci in zo kik hi.
31 Tua ahikom Samuel sia Saul taw heak kik a, tuaciang Saul in Topa bia hi.
32 “Kumpipa Agag hi lai kei kungah hong paipui tavun,” ci in Samuel in thupia hi. Agag sia ama kungah lau vadil in hong pai a, “Thi tu sia bangza in na ziam?’. ci in ngaisun hi.
33 Samuel in, “Na namsau in nute tam mama ta selsak ahi bangma, tu in na nu zongh tasel tu hi,” ci hi. Tuabangin Samuel in Agag sia Gilgal biaknatau mai ah neensem hi.
34 Tua zawkciang Samuel sia Ramah ah pai a, Saul kumpipa sia Gibeah khua a inn ah cia hi.
35 Samuel ii nuntak sungah kumpipa a mu kik ngei nawn bua hi; ahihang ama tungtaang khuangai hi. Saul sia Israel kumpipa in a koi hu in Topa hee hi.