14
Jonathan ii Ngalhan Nasepna
1 Ni khat ni in Jonathan in ngalhiamte a pua pa munah, “Philistine te ngiaphual kaantan in pai tawng,” ci hi. Ahihang Jonathan in a pa Saul munah a son bua hi,
2 a pa sia Gibeah pan a khuala ngawl Migron khua, talee kung nuai khat ah ngiaphual saat hi; ama in a kithuapui mihing 600 bang nei hi.
3 Ephod a silh thiampi sia Ichabod ii suapuipa Ahitub ii tapa Ahijah hi a, tua pa sia Phinehas ii tapa, Eli ii tupa hi a, Shiloh ah Topa ii thiampi ahi hi. Jonathan ii paisat hunlam sia a mite in he ngawl hi.
4 Philistine te ngiaphual a thet thei natu in a kaantan tu a kul Michmash mualciangh ah suangpi dok nii a lang le a lang ah om a: tuate khat sia Bozez kici a, a dang khat sia Seneh kici hi.
5 Khat zaw sia Michmash maingat a, mualciangh saksang ah om in, a khat sia a thang sangah Geba sang nga in om hi.
6 Jonathan in tangvalpa munah, “Pathian he ngawl Philistine te ngiaphual kaantan tawng. Topa in hong hu thei tu hi; hong hu a ahile bangza in ih tawmbel hang, zawna hong piak natu sia bangma in khak ngawl tu hi,” ci hi.
7 Tangvalpa in, “Na vawt nop babang hi hen, kei sia nangma taw pang khi hi,” ci in zo hi.
8 Jonathan in, “Pha hi. Ei ih paitan tu a Philistine te in ih musak tu hi.
9 Ama te ei kungah hong pai nuam a, ngakin hong sawl le ih omna mun san ah ih om nginge tu hi.
10 Ahihang amate kungah pai in hong sawl le ih pai tu hi, banghang ziam ci le tuasia sia Topa ii ngal zaw natu lim hong piakna hi tu hi,” ci hi.
11 Tuabangin amate sia Philistine te in mu in, “En vun! Hebrew mite pawlkhat leihawng sung a bukna pan hong pusuak hi!” ci hi.
12 Tua zawkciang amate in Jonathan le tangvalpa oksan in, “Hi sungah hong paito tavun! Kong son nop khat om hi!” ci in sam hi.
Jonathan in tangvalpa munah, “Hong zui ta'n. Topa in amate tungah Israel te zawna hong pia zo hi,” ci hi.
13 Jonathan sia mualciangh pan a khut le a khup taw bokvak in kaato a, tangvalpa in zui hi. Jonathan in Philistine te simin vaatvawk a, tangvalpa in zongh tua teng that hi.
14 A kithalupna masa phitbel tuasung acre lang bang a zaina munah Jonathan le tangvalpa in mihing kul bang thatlum uh hi.
15 Ngam sungah a om Philistine te theampo lau ngawp uh hi; a suttolte le ngiaphual a om ngalkapte lau in liing uh hi; lei liingin patauna lianpi om hi.
Philistine te ii Lelna
16 Benjamin ngamsung Gibeah encik in a om, Saul ii mite in Philistine te lungmangin a tai mu uh hi.
17 Tua ahikom Saul in a mite munah, “Ih ngalkap teng sim sin vun, akua om ngawl ziam, kan vun,” ci hi. Amate in tuabangin ahi uh ciang Jonathan le a ngalhiam pua tangvalpa a om ngawl hunlam he uh hi.
18 “Ephod sia hi sungah hong paipui tavun,” Saul in thiampipa Ahijah munah ci hi. Tua ni in Ahijah in tuasia Israel mite mai ah pua hi.
19 Saul sia Ahijah taw a papau laitakin, Philistine ngiaphual ah nasia buai vaial ahikom Saul in, “ Topa tung thu dok tu hun om nawn ngawl hi!” ci hi.
20 Tuaciangin ama le a mite sia amate khat le khat kitel meal ngawlin a kido Philistine te sim tuin hong kuan uh hi.
21 Hebrew mi pawlkhat Philistine te sang pang phot a, amate ngiaphual ah a paikhawm sa te sia hong heak kikin, Saul le Jonathan taw hong kop kik uh hi.
22 Ephraim mual tungah a om a dangte in Philistine te tai keak hi ci-in za ahikom amate zongh hong kipawlin Philistine te sim a,
23 Bethaven kalh dongin do uh hi. Topa in tua ni in Israel hun hi.
Ngal kisim Zawkciang Thupiangte
24 Israel te sia tua ni in ngilkial in thazawm uh hi, banghang ziam cile Saul in ciliap huai kiciamna taw thupia hi: “Ka ngalte tungah phulaakna ka nei uh mateng tu ni in an a ne sia peuma haamsiatna thuak tahen,” ci hi. Tua ahikom kuama in ni buppi bangma ne ngawl hi.
25 A vekpi in thingtaam khat sung hong thengin, mun theampo ah khuaitui mu hi.
26 Taam sungah khuaitui dimteak ahihang kuama in a ne bua hi, banghang ziam cile amate in Saul ii haamsiatna sia kiita uh hi.
27 Ahihang Jonathan in a pa ii haamsiatna taw a tawnna za ngawl a, tua ahikom a ciangkang toai sia taw khuaiphaanglu sung sunin khuaitui tawm ne hi. Thakhat thu in ama hong hat zawhiat paih hi.
28 Ahihang a mite khat in, “Ko sia ngilkial in pukhong khu hi, ahihang na pa in haamsiatna taw hong tawng a, ‘Tuni in an a ne peuma tungah haamsiatna tung tahen hong ci hi,’ ” ci in son hi.
29 Jonathan in, “Ka pa in ih mite tungah bang zata in, a kiitakhuai mama in ngamta thong ziam? En vun, khuaitui tawm ka neak hu in bangza in ka om nuam tuam paih ziam!
30 Ih mipuite in ngalte a zaw uh ciang a laak uh ante ne le tuni bangza in pha tuam seseam tu ziam? Philistine te bangza a tamzaw that zo tu hi ziam, ngaisun vun,” ci hi.
31 Tua ni in Israel te in Philistine te zo a, Michmash pan Aijalon dong lam khom teakin sim uh hi. Hi sia hunin Israel te sia ngilkial in zawm mama uh hi,
32 tua ahikom amate in ngalte khut sung pan a matte la tu in del uh hi, tuu le kealte la in tua munah ngo paih in, a chi thai ngawlin a sa ne uh hi.
33 Saul munah hi thu kikhia a, “En in, mipite in sa le a chi ne khawmin Topa tungah mawna vawt hi,” ci uh hi.
Saul au in, “No sia pawl zuakte nu hi! Suangtum lian khat hi sung keima kungah hong liik tavun,” ci hi. Ref 14:33 Pian 9:4; Thiam 7:26-27,17:10-14,19:26; Thkna 12:16,23,15:23
34 Tua zawkciang ama in thupiakna dang khat nei a, “Mite sungah pai tavun a, khui le tuute hi sungah hong paipui natu sonsiat vun. Amate in tua ngante ngoin hi sung ma ah ne tu hi; amate in sa le chi neak khopna taw Topa tungah maw thei ngawl het tu hi,” ci hi. Tua ahikom tua ni takin amate in a nganno te hong paipui a tua munah ngo uh hi.
35 Saul in Topa atu biaknatau khat sa a, a masabel a vawt biaknatau ahi hi.
36 Saul in a mite munah, “Zan lai paisuk in, Philistine te sim tawng, khuavak dong a neisa te phuulin, thatlum siat tawng,” ci hi.
“Phabel tu na up bang po vawt in,” ci in amate in zo uh hi.
Ahizong thiampipa in, “Pathian dongh phot tawng,” ci hi.
37 Tua ahikom Saul in Topa dongh a, “Philistine te ka sim tu ziam? Ko nong zosak tu ziam?” ci hi. Ahihang Pathian in tua ni in zo ngawl hi.
38 Tuasia ciang Saul in mipi lampuite munah, “Hi sungah hong pai tavun a, tuni in bang mawna vawt hi ziam, kan vun.
39 Israel zawna hong pia a nungta Topa taw kamciam vawt khi hi, ka tapa Jonathan keak ahizong, a maw sia kithatlum tu hi,” ci hi. Ahihang kuama in bangma son ngawl hi.
40 Tuaciang Saul in amate tungah, “Na vekpi in zia lai ah va ding tavun, Jonathan le kei hi sungah kong ding tu uh hi,” ci hi.
Amate in, “Phabel tu na up bang po vawt in,” ci in zo uh hi.
41 Saul in Topa Israel ii Pathian munah, “ Topa, banghangin tuni ka pau hong zo ngawl ni ziam? Topa, Israel ii Pathian awng, a thiangtho suangte panin hong zo ta'n. Tua mawna sia Jonathan ahibuale kei mawna ahile, Urim panin hong zo ta'n; ahizong na Israel mite ii mawna hang ahile Thummim panin hong zo ta'n,” ci hi. A zona sia Jonathan le Saul tungah tu a, mipite kithiangsak hi. Ref 14:41 Mi 27:21; 1 Sa 28:6
42 Tuasia ciang Saul in, “Ka tapa Jonathan le kei akua hi zaw khu ziam hong khensat ta'n,” ci hi. Tuaciang Jonathan kikawk hi.
43 Tua zawkciang Saul in Jonathan munah, “Bang vawt thong ni ziam?” ci in dongh hi.
Jonathan in, “Ka ciang toai sia taw khuaitui tawm ne khi hi. Hi lai ah om khi hi — a thi tu in kinging khi hi,” ci in zo hi.
44 Saul in Jonathan tungah, “Nang hong kithisak bua le, keima Pathian in hong vaatlum tahen,” ci hi.
45 Ahihang mipite in Saul munah, “Israel atu ngalzawna lianpi hong neisak Jonathan sia thisak tu hi ziam? Hi thei ngawl hi! A nungta Topa min taw kamciam pia khu hi, a luzang samzam khat zongh sumsi thei ngawl tu hi. Tuni in a sep a vawt sia, Pathian ii huna taw a vawt hi,” ci uh hi. Tuabangin mipite in Jonathan sia thi natu pan hun uh hi.
46 Tua zawkciang Saul in Philistine te del nawn ngawl a, amate ngam ah cia kik uh hi.
Saul ii Ngam ukna le a Baangkua
47 Saul sia Israel kumpipa a sua zawkciang, mun theampo ah a ngalte sim hi: Moab, Ammon le Edom mite, Zobah kumpite le Philistine te do hi. Ngal a simna po ama in zo hi.
48 Ama in hangsan takin ngalsim a, Amalek te ngawngawn zo hi. Ama in Israel te hong kisimna theampo panin hun hi.
49 Saul ii tapate sia, Jonathan, Ishvi le Malchishua ahi hi. Ama ii tanu uzaw sia ii min Merab hi a, a nau zaw sia Michal hi.
50 A zi sia Ahimaaz ii tanu Ahinoam hi; a ngalkaphonpi ukpa sia a pano Ner ii tapa, a suapui sealh Abner ahi hi.
51 Saul ii pa Kish le Abner ii pa Ner sia Abiel tate ahi uh hi.
52 A nuntak sung tawntung Saul in Philistine te hangsan takin a sim kul hi. Tua ahikom a thahat, a hang pasal khat a mu na le ngalkap tumsak hi.